កណ្ដាល៖ នៅថ្ងៃ១៤ ខែកក្កដា ឆ្នាំ២០២១ វេលាម៉ោង០៩នឹង៣០នាទី មានករណីមុខសញ្ញាឆក់កាបូបតាមដងផ្លូវម្នាក់ត្រូវបានសមត្ថកិច្ចក្រុងតាខ្មៅ ឃាត់ខ្លួនក្រោយពីជនសង្ស័យរូបនេះជិៈម៉ូតូឆក់កាបូបពី២នាក់ប្តីប្រពន្ធ ខណៈកំពុងជិៈតាមដងផ្លូវនៅចំណុចផ្លូវលេខ ២០៦ ភូមិដើមមៀន សង្កាត់ដើមមៀនក្រុងតាខ្មៅ ខេត្តកណ្តាល។
សមត្ថកិច្ចបានឲ្យដឹងថា ជនរងគ្រោះក្នុងហេតការណ៍ខាងលើឈ្មោះ ស៊ន ស្រីនាង ភេទស្រី អាយុ៣១ឆ្នាំ ជនជាតិខ្មែរ មានទីលំនៅផ្ទះលេខ ៦៦ ផ្លូវលេខ១០ បុរីពិភពថ្មី២ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរបុគ្គលិកក្រុមហ៊ុន BIM។ ចំណែកជនសង្ស័យឈ្មោះ គឹម មនោរម្យ (ហៅណូ) ភេទប្រុស អាយុ២៤ឆ្នាំ ជនជាតិខ្មែរ មានទីលំនៅភូមិព្រែកឫស្សី សង្កាត់ព្រែកឫស្សី ក្រុងតាខ្មៅខេត្តកណ្តាល។ ហើយវត្ថុតាងចាប់យក៖ ម៉ូតូ១គ្រឿងម៉ាកHONDA១២៥ ពណ៌ខ្មៅ ស៊េរីឆ្នាំ២០២១ ផ្លាកលេខភ្នំពេញ1IS-3509 (របស់ជនសង្ស័យជិៈធ្វើសកម្មភាព), កាបូបយួរដៃពណ៌ឈាមជ្រូកចំនួន១, កាបូបដៃពណ៌ឈាមជ្រូកចំនួន១, ទូរស័ព្ទដៃចំនួន២គ្រឿង(ម៉ាកiphone.Xs max ពណ៌មាស និងម៉ាកmeitu ពណ៌សលាយផ្កាឈូក។ សូមបញ្ជាក់ថា ជនសង្ស័យខាងល់មានដីកាបង្គាប់អោយចាប់ខ្លួនរបស់សាលាដំបូងខេត្តកណ្តាល លេខ ២៩៦ ដកបចខ ចេញដោយចៅក្រមស៊ើបសួរ ជួន វណ្ណៈ ចុះថ្ងៃទី១១ ខែឧសភា ឆ្នាំ២០២០ ពីបទលួច មានស្ថានទម្ងន់ទោសប្រព្រឹត្តនៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល កាលពីថ្ងៃ២៣ ខែមីនា ឆ្នាំ២០២០៕
ប្រភពដដែលបន្តថា នៅវេលាកើតហេតុខាងលើពេលដែលជនរងគ្រោះកំពុងតែជិៈម៉ូតូពីរនាក់ប្តីប្រពន្ធដោយប្តីជាអ្នកឌុបតាមផ្លូវលេខ ២០៦ ឆ្ពោះទៅកន្លែងធ្វើការនៅភ្នំពេញ លុះដល់ត្រង់ចំណុចកើតហេតុខាងលើ ស្រាប់តែជនសង្ស័យជិៈម៉ូតូ ១គ្រឿង មកពីក្រោយដល់ទន្ទឹមគ្នា រួចធ្វើសកម្មភាពឆក់កាបូបយួរដៃរបស់ជនរងគ្រោះកាន់ដាក់លើភ្លៅ រួចជិះម៉ូតូគេចខ្លួនភ្លាមនោះជនរងគ្រោះជិៈម៉ូតូដេញតាមស្រែកថាចោរៗ ផ្អើលដល់ប្រជាពលរដ្ឋ ទើបកម្លាំងសមត្ថកិច្ចនគរបាលក្រុងតាខ្មៅ ជួយអន្តរាគមន៍ដេញស្ទាក់ចាប់ឃាត់ខ្លួនជនសង្ស័យបាន រួមទាំងវត្ថុតាង បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរនិងកសាងសំណុំរឿងតាមនីតិវិធី។ ដោយ៖វិន
