ខេត្តបន្ទាយមានជ័យ ៖ មនុស្សប្រុសស្រីក្មេងចាស់សរុបចំនួន០៤នាក់ បានស្លាប់បាត់បង់ជីវិតភ្លាមៗ នៅក្នុងហេតុការណ៍គ្រោះថ្នាក់ចចរាចរណ៍មួយដែលបង្កឡើងដោយខ្លួនឯង កាលពីវេលាម៉ោង១ និង៣០នាទី នៅរសៀលថ្ងៃទី២២ ខែសីហា ឆ្នាំ២០២១ ត្រង់ចំណុចផ្លូវអភិវឌ្ឍ ភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
ជនរងគ្រោះទាំង៤នាក់ ដែលបានស្លាប់ក្នុងហេតុការណ៍ខាងលើសមត្ថកិច្ចបានអោយដឹងថា ១-ឈ្មោះ គឹម ហេង ភេទប្រុស អាយុ៥៥ឆ្នាំ។ ២-ឈ្មោះ គង់ វណ្ណា ភេទស្រី អាយុ៥៣ឆ្នាំ។ ៣-ឈ្មោះ ហេង រតនា ភេទស្រី អាយុ០៦ឆ្នាំ និង ៤-ឈ្មោះ គឹម ធា ភេទស្រី អាយុ៤២ឆ្នាំ ហើយសពជនរងគ្រោះទាំង៤នាក់រស់នៅជាមួយគ្នាក្នុងភូមិយាងថ្មី ឃុំគប ស្រុកអូរជ្រៅ ខេត្តខេត្តបន្ទាយមានជ័យ ។ តាមប្រភពព័ត៌មានពីកន្លែងកើតហេតុបានឱ្យដឹងថា ជនរងគ្រោះទាំងអស់នៅក្នុងរថយន្តមានគ្នាសរុប ០៤នាក់ មានស្រី០៣នាក់ និងប្រុសម្នាក់ ហើយអ្នកបើករថយន្តត្រូវគេដឹងថា មានមុខរបរជាអ្នកលក់គ្រឿងសំណង់នៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ ដែលបានបើករថយន្តម៉ាក Mazda ពណ៌ស ពាក់ស្លាកលេខ កម្ពុជា- MR.SELLA ។ ប្រភពបន្តថា នៅមុនពេលកើតហេតុ រថយន្តជួបគ្រោះថ្នាក់ខាងលើបានធ្វើដំណើរមកពីទិសខាងកើតឆ្ពោះទៅទិសខាងលិច លុះពេលមកដល់ចំណុចកើតហេតុត្រង់ចំណុច ភូមិខ្វាវលិច ឃុំស្វាយចេក ស្រុកស្វាយចេកដែលជាចំណុចផ្លូវកោងផងនោះ ក៏បានរេ៉ចង្កូតធ្លាក់ពីលើផ្លូវ រួចធ្លាក់ចូលទៅក្នុងទឹកប្រឡាយ ដោយរថយន្តផ្ងារជើងឡើងលើ ជាហេតុបណ្តាលឲ្យស្លាប់អ្នកបើកបរ និងអ្នករួមដំណើរទាំងអស់តែម្តង។
ក្រោយពេលកើតហេតុ សពជនរងគ្រោះទាំង៤នាក់ ត្រូវបានកម្លាំងនគរបាល និងប្រជាពលរដ្ឋជួយស្រង់យកមកដាក់លើគោក ដើម្បីស្រាវជ្រាវររក និងប្រគល់ជូនសាច់ញាតិជនរងគ្រោះយកទៅធ្វើបុណ្យតាមប្រពៃណី៕ដោយ÷ទីសុខ
