អាជ្ញាធរខេត្តកំពង់ចាម ប្រកាសបិទកំណាត់ផ្លូវជាតិលេខ៧ ជាបណ្តោះអាសន្ន មិនអោយរថយន្តដឹកទំនិញធុនធំ និងរថយន្តដឹកជញ្ជូនធុនធ្ងន់ឆ្លងកាត់

អាកំពង់ចាម÷ យោងសេចក្តីជូនដំណឹងរបស់ក្រសួងធនធានទឹក និងឧតុនិយម ស្តីពីស្ថានភាពធាតុអាកាស កាលពីថ្ងៃទី១៨ ខែកញ្ញា ឆ្នាំ២០២១ កន្លងទៅ ដែលធ្វើឱ្យព្រះរាជាណាចក្រកម្ពុជា បាននឹងកំពុងបន្តទទួលរងនូវ ឥទ្ធិពល នៃជ្រលងសម្ពាធទាបឥណ្ឌា និងខ្យល់មូសុងនិរតីខ្សោយ ធ្វើឱ្យមានភ្លៀងជាបន្តបន្ទាប់ក្នុងកម្រិតពីតិច ទៅមធ្យម ។ នៅថ្ងៃទី២១ ខែកញ្ញា ឆ្នាំ២០២១ អជ្ញាធរខេត្តកំពង់ចាម ប្រកាសបិទការឆ្លងកាត់ជាបណ្តោះអាសន្នកំណាត់ផ្លូវជាតិលេខ៧ ចាប់ពីចំណុច បង្គោលលេខ៨៩ ដល់លេខ៩១ ក្នុងភូមិខ្វិតធំ ឃុំខ្វិតធំ ស្រុកព្រៃឈរ សម្រាប់រថយន្តដឹកទំនិញធុនធំ និងរថយន្តដឹកជញ្ជូនធុនធ្ងន់ ឆ្លងកាត់ឡើយដោយសារទឹកជន់លិចផ្លូវ។