កំពង់ស្ពឺ៖ មានករណីរថយន្ដដឹកប្រេងសាំងរបស់ក្រុមហ៊ុន សូគីមិច ១គ្រឿង បានក្រឡាប់ផ្ងារជើងបង្កអោយស្ទះចរាចរណ៍ នៅលើកំណាត់ផ្លូវជាតិលេខ៤ ត្រង់ចំណុចចន្លោះគឺឡូម៉ែត្រលេខ ៨៤ និង ៨៥ ស្ថិតក្នុងភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីវេលាម៉ោង ១០និង៣៩នាទីព្រឹក ថ្ងៃទី១៧ ខែតុលា ឆ្នាំ ២០២១ ។
រថយន្តដែលជួបគ្រោះថ្នាក់ចរាចរណ៍ក្រឡាប់ដោយខ្លួនឯងខាងលើ ម៉ាក Hyundai ពណ៌ក្រហមលាយទឹកប្រាក់ ពាក់ស្លាកលេខ កំពង់ស្ពឺ 3A-0548 ដឹកស៊ីទែនប្រេងរបស់ក្រុមហ៊ុន សូគីមិច បានក្រឡាប់ផ្ងារជើងពប់ហៀរប្រេងសាំង ពេញផ្លូវជាតិលេខ៤ ក្នុងស្រុកភ្នំស្រួច ។តាមរបាយការណ៍បានឲ្យដឹងថា អ្នកបើកបរឈ្មោះ ប៊ិន សុខចាន់ អាយុ ២៧ឆ្នាំ រស់នៅភូមិអូរតាពូង ឃុំភក្តី ស្រុកបសេដ្ឋ ខេត្តកំពង់ស្ពឺ មុនពេលកើតហេតុគេឃើញរថយន្តខាងលើបើកបរមកពីទិសខាងកើតទៅទិសខាងលិច បើកបរក្នុងល្បឿនលឿន មកដល់ចំណុចខាងលើបានរេចង្កូតក្រឡាប់ដោយខ្លួនឯង បណ្តាលអោយ ហូរប្រេងលើផ្លូវជាតិ ។ក្រោយក្រឡាប់រួច សមត្ថកិច្ចដែលឈរ ជើងនៅគោលដៅបានទំនាក់ទំនង រថយន្តអគ្គិភ័យ របស់ស្នងការរដ្ឋាន និងអធិការមកជួយអន្តាគមន៏ និងបានឃាត់រថយន្តដឹកខ្សាច់អោយចាក់នៅកន្លែងហូរប្រេង ។
តាមការបញ្ជាក់ពីសមត្ថកិច្ច ករណីនេះ មិនបណ្តាលអោយរបួសមនុស្សទេ ចំពោះអ្នកបើកបរខាងលើ បានធ្វើការអប់រំ ចំពោះវត្ថុតាំងបានប្រគល់ជូនម្ចាស់យកទៅប្រើប្រាសតាមតម្រូវការវិញ៕ ដោយ÷ប្លុង ហាក់
