សៀមរាប÷ ដាល់អំបុកបន្ទាយស្រីត្រូវបានរដ្ឋបាលស្រុកបន្ទាយស្រី បានប្រកាសរៀបចំពិធីដាល់អំបុកនេះរយៈពេល៣ថ្ងៃ គឺចាប់ពីថ្ងៃទី០៥ ដល់ថ្ងៃទី៧ ខែវិច្ឆិកា ឆ្នាំ២០២១នេះ ក្នុងបរិវេណបរិមណ្ឌល(រង្វង់មូល) បន្ទាយស្រី ចាប់ពីម៉ោង៨ព្រឹក រហូតដល់ម៉ោង៥ល្ងាច និងមានកម្មវិធីតន្ត្រីស្គរដៃ ចាប់ពីម៉ោង៥ល្ងាច ដល់ម៉ោង៧យប់ ។
ការរៀបចំកម្មវិធីដាល់អំបុកនេះ ក្រោមកិច្ចសហការរវាងប្រជាពលរដ្ឋមកពីភូមិព្រះដាក់ ក្នុងឃុំព្រះដាក់ រួមជាមួយសហគមន៍ទេសចរណ៍នានា នៃស្រុកបន្ទាយស្រី ក្នុងគោលបំណងបង្ហាញពីទំនៀមទម្លាប់ប្រពៃណីចាស់បុរាណក្នុងស្រុកភូមិនៅពេលចាប់ផ្តើមប្រមូលផលស្រូវថ្មី និងជាការបង្ហាញឱ្យភ្ញៀវទេសចរ ដែលបានធ្វើដំណើរឆ្លងកាត់រង្វង់មូលនេះ បានឃើញផងដែរ នេះបើតាមការអោយដឹងពីលោក ឃឹម ហ្វីណង់ អភិបាលស្រុកបន្ទាយស្រី ។
លោក អភិបាលស្រុក បន្តថា ស្រូវដែលត្រូវយកមកដាល់អំបុកនាពេលនេះ គឺជាស្រូវច្រូតកាត់ពីរង្វង់មូលបន្ទាយស្រី ដោយច្រូតភ្លាមយកមកដាក់អំបុកភ្លាម ហើយសម្រាប់ភ្ញៀវទេសចរ ដែលមានចាប់ណាប់អារម្មណ៍ជាមួយនឹងអំបុកស្រូវថ្មីនេះ អាចចូលមកទិញបាន ឬអាចច្រូតស្រូវដោយខ្លួនឯង ហើយយកមកដាល់អំបុកដោយខ្លួនឯងក៏បាន ដើម្បីបង្ហាញនូវការសប្បាយផង និងឈ្វេងយល់ពីរបៀបនៃការផលិតអំបុករបស់ប្រជាជននៅតាមភូមិនៃតំបន់ជនបទផង ជាពិសេសសម្រាប់ភ្ញៀវទេសចរដែលចូលមកកម្សាន្តនៅទីនេះ ត្រូវតែពាក់ម៉ាស់ រក្សាគម្លាត ធ្វើយ៉ាងណាធានាឱ្យបាននូវសុវត្ថិភាពសុខាភិបាល ដោយមិនឱ្យមានការប្រមូលផ្តុំកកកុញនោះទេ បើទោះជាយើងចង់ជំរុញឱ្យមានចរន្តទេសចរឡើងវិញក្នុងកម្រិតណាក៏ដោយ ក៏យើងត្រូវតែមានការប្រុងប្រយ័ត្នខ្ពស់ ក្នុងការទប់ស្កាត់ការឆ្លងរាលដានមេរោគកូវីដ-១៩ ។
លោកក៏បានបញ្ជាក់បន្ថែមទៀតថា រង្វង់មូលបន្ទាយស្រី ត្រូវបានធ្វើការកែប្រែ និងអភិវឌ្ឍន៍ទៅតាមរដូវកាល ក្នុងន័យជាគោលដៅទេសចរណ៍ ដូចជា ពេលរដូវវស្សាយើងដាំស្រូវ និងរដូវរំហើយ យើងដាំផ្កា ដែលអាចឱ្យភ្ញៀវទេសចរមកលំហែកាយ និងថតរូបលេងកម្សាន្តសប្បាយផងដែរ៕ ដោយ៖ វាយោ
