ខេត្តកណ្តាល÷ នៅល្ងាចថ្ងៃទី២ ខែមករា ឆ្នាំ២០២២ តុលាការសម្រចឃុំខ្លួននគរបាលម្នាក់ និងបក្ខពួកម្នាក់ទៀត ដាក់ពន្ធនាគារ ករណីយកកាំភ្លើងបាញ់មេឃ ចំនួន០២ គ្រាប់ក្រោយពីផឹកស៊ីស្រវឹងចំថ្ងៃឆ្លងឆ្នាំសកល ដែលបានកើតឡើងកាលពីយប់ ថ្ងៃទី៣១ ខែធ្នូ ឆ្នាំ២០២១ នៅត្រង់ចំណុចមុខ ស្ថានីយប្រេងមួយកន្លែង ស្ថិតនៅភូមិផ្លូវត្រី ឃុំថ្មគរ ស្រុកល្វាឯម ខេត្តកណ្តាល ។
សមត្ថកិច្ច បានឲ្យដឹងថា ជនសង្ស័យទាំង០២នាក់ខាងលើ ទី១. ឈ្មោះ ផាន់ ហ៊ុយហាក់ អាយុ២៦ ឆ្នាំ មុខរបរ ជានគរបាល មានទីលំនៅផ្ទះលេខ៨២ ភូមិដំណាក់ សង្កាត់ភ្នំពេញថ្មី ខណ្ឌសែនសុខ រាជធានី ភ្នំពេញ និងទី២. ឈ្មោះ ម៉ៅ ជីវិន អាយុ៣២ឆ្នាំ មុខរបរ អាជីវករ មានទីលំនៅផ្ទះលេខ ២៩ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
ក្រោយទទួលបានព័ត៌មានពីប្រជាពលរដ្ឋភ្លាម សមត្ថកិច្ចនៃអធិការដ្ឋាន នគរបាលស្រុកល្វាឯម បានដេញតាមឃាត់រថយន្តរបស់ជនសង្ស័យរហូតដល់ចំណុច ផ្លូវបេតុង ជាដល់ផ្លូវទាល់ ក្នុងភូមិពាមតាឯក និងបានធ្វើការត្រួតពិនិត្យក្នុងរថយន្ត តែរកពុំឃើញអាវុធឡើយ ហើយក៏បាននាំជនសង្ស័យមកដើម្បីសាកសួរ ។ជនសង្ស័យឈ្មោះ ម៉ៅ ជីវិន បានសារភាពថា គេពិតជាបានបាញ់ចំនួន០២គ្រាប់ ឡើងទៅលើ ចេញពីក្នុងឡាន នៅចំណុចកើតហេតុខាងលើមែន ។តាមរបាយការណ៍ ជនសង្ស័យទាំង០២នាក់ បានធ្វើដំណើរ តាមរថយន្តមួយគ្រឿង ម៉ាក Lexus RX400h ពាក់ផ្លាកលេខ ភ្នំពេញ 2AB-5368 មានក្មេងរួមដំណើរ ចំនួន ០២នាក់ មកពីកម្មវិធីឆ្លងឆ្នាំ នៅចំណុចដីឡូតិ៍ភូមិព្រែករៃ ឃុំព្រែករៃ ស្រុកល្វាឯម ខេត្តកណ្ដាល ដោយឈ្មោះ ផាន់ ហ៊ុយហាក់ ជាអ្នកបើកបរ ។
អ្នកស្រី ពេជ ម៉ារ៉ែនចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួន ជនសង្ស័យទាំង០២នាក់ ដាក់ពន្ធនាគាររួចហើយ កាលពីល្ងាចថ្ងៃទី២ ខែមករា ឆ្នាំ២០២២ ពីបទ កាន់កាប់អាវុធ ដោយគ្មានការអនុញ្ញាត និង ប្រើប្រាស់អាវុធ ដោយគ្មានការអនុញ្ញាត តាមមាត្រា ៤៩០ នៃក្រមព្រហ្មទណ្ឌ និង មាត្រា ២០ នៃច្បាប់ស្តីពី ការគ្រប់គ្រងអាវុធគ្រឿងផ្ទុះ និង គ្រាប់រំសេវ ៕ដោយ រ៉ាវុធ
