ខេត្តសៀមរាប៖ដោយមានការចង្អុលបង្ហាញរបស់លោកឧត្តមសេនីយ៍ តេង ច័ន្ទណាត ស្នងការនគរបាលខេត្តសៀមរាប លោកឧត្តមសេនីយ៍ អ៊ុំ អមរា រៀបចំការដាក់តាំងសារប្រឆាំងគ្រឿងញៀននៅតាមទីតាំងសំខាន់ៗនានា ជាការចូលរួមលេីកកម្ពស់ការងារផ្សព្វផ្សាយអប់រំសាធារណ:ពីគ្រោះថ្នាក់នៃគ្រឿងញៀនជូនប្រជាពលរដ្ឋ ផែនប្រឆាំងគ្រឿងញៀន បានរៀបចំចងបដាពាក្យស្លោក ដើម្បីផ្សព្វផ្សាយជូនដល់ប្រជាពលរដ្ឋដែលមកទស្សនាខេត្តសៀមរាបក្នុងឱកាសពិធីបុណ្យចូលឆ្នាំប្រពៃណីជនជាតិចិន វៀតណាម នាពេលខាងមុខនេះ។
ឧត្ដមសេនីយ៍ អ៊ុំ អមរា ស្នងការរងទទួលបន្ទុកផែនប្រឆាំងគ្រឿងញៀននៃស្នងការនគរបាលខេត្តសៀមរាប បានជម្រាបបន្តថា ដោយសារប្រទេសជាតិមានសុខសន្តិភាព និងស្ថានភាពជំងឺកូវីដ-១៩ បានធូរស្រាលតាមរយះយុទ្ធសាស្រ្តប្រកបដោយការទទួលខុសត្រូវរបស់សម្តេចតេជោនាយករដ្ឋមន្រ្តីពិសេសការចាក់ស្រោចវ៉ាក់សាំងជូនប្រជាពលរដ្ឋទូទាំងប្រទេសនោះ ក្នុងឱកាសបុណ្យចូលឆ្នាំប្រពៃណីជនជាតិចិនខាងមុខ ខេត្តសៀមរាបរំពឹងថាមានប្រជាពលរដ្ឋមកទស្សនាខេត្តសៀមរាបច្រេីន ហេីយនឹងបានឃេីញសារពញ្ញាក់ស្មារតីដាស់តឿននិងចូលរួមផ្សព្វផ្សាយបន្តពីគ្រោះថ្នាក់នៃគ្រឿងញៀនដល់សមាជិកក្រុមគ្រួសារ និងមនុស្សជាទីស្រឡាញ់របស់ពួកគាត់។
ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានប្រាប់ឱ្យដឹងដែលថា សារប្រឆាំងគ្រឿងញៀននឹងដាក់តាំងគ្រប់រាជធានី-ខេត្តទូទាំងប្រទេស ដេីម្បីប្រជាពលរដ្ឋបានឃេីញ និងចូលរួមក្នុងសកម្មភាពប្រយុទ្ធប្រឆាំងគ្រឿងញៀន៕ ដោយ ភារះ
