ខេត្តសៀមរាប៖ នៅវេលាម៉ោង៥និង០០នាទីព្រឹក ថ្ងៃទី៣០ ខែមករា ឆ្នាំ២០២២ នេះមានហេតុការណ៍ផ្អើលឆោឡោមួយកើតឡើងដោយសារមានករណីចោរគាស់តូបលក់ខោអាវមួយកន្លែងយកទ្រព្យសម្បត្តិប្រមាណជាជាង១ម៉ឺនដុល្លាររួចគេចខ្លួនបាត់ដោយសុវត្ថិភាព នៅផ្សារសសរស្ដម្ភ ស្ថិតនៅភូមិឃុំសសរស្ដម្ភ ស្រុកពួក ខេត្តសៀមរាប។
សមត្ថកិច្ចបានអោយដឹងថា ជនរងគ្រោះជាម្ចាស់តូបមានឈ្មោះ ត្រិច សុថាច ភេទស្រី អាយុ៥១ឆ្នាំ រស់នៅ ភូមិឃុំកើតហេតុខាងលើ មុខរបរអាជីវករលក់ខោអាវ បានប្ដឹងរាយការណ៍ថានៅថ្ងៃទី២៩ ខែមករា ឆ្នាំ២០២២ ពេលព្រឹកគាត់បានបើកតូបលក់នៅក្នុងផ្សារសសរស្ដម្ភ ដូចសព្វដង ហើយម៉ោង២និង០០នាទីល្ងាច កូនឈ្នួលគាត់ឈ្មោះ ឈន់ ស្រីហាច ភេទស្រី អាយុ២៣ឆ្នាំ ផ្ទះនៅភូមិស្វាយ ឃុំសសរស្តម្ភ ស្រុកពួក ខេត្តសៀមរាប បានបិទតូបរៀបទុកដាក់ខោអាវ និងចាក់សោទ្វារតូបត្រឹមត្រូវ ហើយត្រឡប់ទៅដេកផ្ទះរៀងៗខ្លួន លុះរំលង១យប់នៅម៉ោង៥និង០០នាទីព្រឹក ថ្ងៃទី៣០ ខែមករា ឆ្នាំ២០២២ ឈ្មោះឈន់ ស្រីហាច បានមកបើកតូបលក់ដោយចាក់សោទ្វារមុខបានឃើញខោអាវក្នុងតូបរាយប៉ាយនិងបាត់ខោអាវ រ៉ូប សារ៉ុងអស់មួយចំនួន នៅសល់ខោអាវតម្លៃថោកមួយចំនួន និងពិនិត្យឃើញទ្វារតូបផ្នែកចំហៀងបិទធម្មតាតែបាត់មេសោ ពេលនោះដឹងថាតូបត្រូវបានចោរ(ជនមិនស្គាល់មុខ)ធ្វើសកម្មភាពលួច ហើយបានតេទូរស័ព្ទប្រាប់ថៅកែ និងប្ដឹងសមត្ថកិច្ចឲ្យជួយស្រាវជ្រាវ។
សមត្ថកិច្ចបន្ថែមថា ក្រោយទទួលសេចក្ដីរាយការណ៍ កម្លាំងសមត្ថកិច្ចបានចុះធ្វើការស្រាវជ្រាវដល់ទីកន្លែងកើតហេតុ ឃើញថា ចំណុចទ្វារ(បាត់មេសោ)គ្មានស្លាកស្នាមគាស់ឬកាត់នោះទេ គ្មានស្លាកស្នាមវត្ថុតាងបន្សល់ទុក ហើយគ្មានសាក្សីដឹងព័ត៌មានតម្រុយ នូវសកម្មភាពជនសង្ស័យប្រព្រឹត្តិ ដោយឡែកតូបកើតហេតុមានកាមេរ៉ាសុវត្ថិភាព ប៉ុន្តែកាមេរ៉ាខូចឈប់ប្រើ។
តាមការបញ្ជាក់ពីម្ចាស់តូបគាត់បាត់បង់អស់ដូចជា ប្រភេទខោខៅបោយតម្លៃពី ៣៥០០០៛ , ៤៥០០០៛, ប្រភេទខោសាច់ក្រណាត់តម្លៃពី ២៥០០០៛ ទៅ ៤៥០០០៛, ប្រភេទអាវរាង អាវប្រអប់តម្លៃពី ១៥០០០៛ ទៅ ៣៥០០០៛ , រ៉ូបតម្លៃពី ១៥ដុល្លារ , ២០ដុល្លារ , ២៥ដុល្លារ , ឈុតសម្លៀកបំពាក់ប្រពៃណីខ្មែរតម្លៃពី ៣០ដុល្លារ, ៤០ដុល្លារ , សារ៉ុង តម្លៃពី ១០០០០៛ ទៅ ៤០០០០៛ ។ប្រភេទខោអាវក្មេង មនុស្សធំ បុរស-ស្រ្តី ផលិតផល ថៃ ហុងកុង ភ្នំពេញ។សរុបជាទឹកប្រាក់ប្រហែល ១០០០០ដុល្លារ(មួយម៉ឺន)ដុល្លារអាមេរិក។
បច្ចុប្បន្នកម្លាំងសមត្ថកិច្ចកំពុងបើកការស្រាវជ្រាវករណីនេះយ៉ាងល្អិតល្អន់ផងដែរ៕ ដោយ ដារ៉ាវុធ
