សៀមរាប៖កម្លាំងនគរបាលជំនាញនៃក្រុងសៀមរាប បានសហការគ្នាស្រាវជ្រាវអស់រយះពេល៣ថ្ងៃទើបឃាត់ខ្លួនជនសង្ស័យចំនួន២នាក់ដែលបានបំផ្ទុះគ្រប់សេវនៅជិតស្នាក់ការគណបក្សប្រជាជនកម្ពុជា សង្កាត់ស្វាយដង្គំ។ ហេតុការណ៍ឃាត់ខ្លួនធ្វើឡើងនៅវេលាម៉ោង២២និង០០នាទីថ្ងៃទី០៧ខែមិថុនាឆ្នាំ២០២២ ក្នុងភូមិតាភុល សង្កាត់ស្វាយដង្គំ ក្រុងសៀមរាប។
គួររម្លឹកថា ពាក់ព័ន្ធនិងករណីបទល្មើសក្នុងវិស័យអាវុធគ្រឿងផ្ទុះនិងគ្រាប់រំសេវនៅថ្ងៃទី ០៣ ខែមិថុនាឆ្នាំ ២០២២ វេលាម៉ោង ១៩និង ៣០ នាទី សមត្ថកិច្ចបានទទួលសេចក្តីរាយការណ៍ថា មានករណីបំផ្ទុះគ្រាប់រំសេវនៅលើផ្លូវបេតុងខាងកើតស្នាក់ការគណបក្សប្រជាជនកម្ពុជា ចម្ងាយប្រហែល ១៥ ម៉ែត្រក្នុងភូមិស្វាយដង្គំ សង្កាត់ស្វាយដង្គំ ក្រុងសៀមរាប បង្កឡើងដោយជនសង្ស័យមិនស្គាល់អត្តសញ្ញាណជិះម៉ូតូមួយគ្រឿង។
អធិការនគរបាលក្រុងសៀមរាប លោកវរសេនីយ៍ទោ ដា ចំរើន បានឲ្យដឹងថា ដោយមានការចង្អុលបង្ហាញពីលោកឧត្តមសេនីយ៍តេង ច័ន្ទណាត ស្នងការនគរបាលខេត្តសៀមរាប និងលោកភឹង ចិន្តារ៉េត ស្នងការរងតទួលផែនព្រហ្មទណ្ឌ ដោយមានការសម្របសម្រួលនីតិវិធីដោយតំណាងអយ្យការអមសាលាដំបូងខេត្តសៀមរាប ទើបកម្លាំងនគរបាលក្រុងសៀមរាប ចុះស្រាវជ្រាវឃាត់ខ្លួនជនសង្ស័យ២នាក់៖ ទី០១/ឈ្មោះសេង សុកន ភេទប្រុស អាយុ ១៨ ឆ្នាំមុខរបរសិស្សរៀនជួសជុលម៉ូតូ មានស្រុកកំណើតនៅប្រទេសថៃ ទីលំនៅបច្ចុប្បន្នស្នាក់នៅបន្ទប់ជួលក្នុងភូមិតាភុល សង្កាត់ស្វាយដង្គំ ក្រុងសៀមរាប។០២/ឈ្មោះរ៉ន ដារ៉ុងហៅហ៊ីង ភេទប្រុស អាយុ ២០ ឆ្នាំមុខរបរសិស្សរៀនជួសជុលម៉ូតូ មានស្រុកកំណើតនៅភូមិព្រៃស្រមោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប បច្ចុប្បន្នស្នាក់នៅបន្ទប់ជួលក្នុងភូមិសាលាកំរើក សង្កាត់សាលាកំរើក ក្រុងសៀមរាប។
ក្រោយពីទទួលសេចក្តីរាយការណ៍យើងបានចុះទៅកន្លែងកើតហេតុនិងបានស្រាវជ្រាវយ៉ាងយកចិត្តទុកដាក់អស់រយៈពេល ០៣ ថ្ងៃ ទើបកំណត់បានមុខសញ្ញាជនសង្ស័យ ដោយនៅថ្ងៃទី០៧ ខែមិថុនា ឆ្នាំ២០២២បាននាំខ្លួនជនសង្ស័យឈ្មោះសេង សុកន យកមកសួរនាំ។បន្ទាប់ពីសួរនាំជនសង្ស័យរូបនេះបានឆ្លើយសារភាពថា ខ្លួនត្រូវបានឈ្មោះរ៉ន ដារ៉ុង ហៅហ៊ីង ប្រាប់ខ្លួនថាមានគេវាយនៅសួនបឹងកាឡូ ហើយជនសង្ស័យឈ្មោះ សេង សុកន ប្រាប់ទៅឈ្មោះរ៉ន ដារ៉ុងហៅហ៊ីង ថាខ្លួនចេះផលិតរំសេវផ្ទុះពេលដែលខ្លួននៅប្រទេសថៃ។
បន្ទាប់មកឈ្មោះ រ៉ន ដារ៉ុង ហៅហ៊ីង បានឲ្យលុយខ្លួនចំនួន ២៥០០០រៀល ទៅទិញផាវគ្រាប់បាល់យកមកផលិតជាគ្រឿងផ្ទុះ។ ពេលបានប្រាក់ហើយជនសង្ស័យក៏បានទៅទិញផាវគ្រាប់បាល់ចំនួន៥០គ្រាប់ហើយយកមកផលិតជាមួយនឹងឈ្មោះរ៉ន ដារ៉ុង ហៅហ៊ីង ដោយយករំសេវផាវគ្រាប់បាល់មកលាយជាមួយនឹងថ្មខ្មៅម៉ិច រួចដាក់ចូលក្នុងថង់ហើយរុំស្គុតឲ្យណែន ហើយផលិតបានចំនួន ០៥ គ្រាប់ បន្ទាប់មកឈ្មោះរ៉ន ដារ៉ុងហៅហ៊ីង បានដឹកខ្លួនទៅកន្លែងកើតហេតុខាងលើដើម្បីប្រាប់ពីទីតាំងបោករំសេវកែច្នៃ ដែលអ្នកវាយគេនោះអង្គុយលេង លុះដល់ថ្ងៃកើតហេតុជនសង្ស័យឈ្មោះសេង សុកន ក៏បានជិះម៉ូតូរបស់ខ្លួនទៅកន្លែងកើតហេតុហើយធ្វើសកម្មភាពបោកគ្រាប់រំសេវកែច្នៃ បណ្តាលអោយផ្ទុះ រួចបើកម៉ូតូរត់គេចខ្លួន ដោយសកម្មភាពនេះខ្លួនធ្វើតែម្នាក់ឯង។រីឯជនសង្ស័យឈ្មោះរាន់ដារ៉ុងបានឆ្លើយសារភាពថានៅថ្ងៃទី២៩ ខែឧសភាឆ្នាំ ២០២២ វេលាម៉ោងប្រហែល ២០.០០នាទី រូបខ្លួននិងមិត្តភក្កិបានជិះម៉ូតូទៅលេងសួនបឹងគីឡូក៏មានអ្នកជិះម៉ូតូមកជិតខ្លួនហើយវាយខ្លួនមួយខ្សែក្រវ៉ាត់ចំខ្នង ហើយខ្លួនបានប្រាប់រឿងហេតុនេះទៅឈ្មោះសេង សុកន ថាខ្លួនត្រូវបានគេវាយហើយឈ្មោះសេង សុកន ក៏បានប្រាប់ខ្លួនថាចេះធ្វើគ្រាប់រំសេវបំផ្ទុះ រួចខ្លួនក៏បានហុចលុយចំនួន ២៥០០០៛ទៅឈ្មោះសេង សុកន ដើម្បីទិញផាវគ្រាប់បាល់យកមកផលិតជាគ្រឿងផ្ទុះក្រោយពីបានផលិតចំនួន០៥ គ្រាប់ហើយនោះ នៅថ្ងៃទី ០២ ខែមិថុនាឆ្នាំ ២០២២ ខ្លួនបានជិះកាត់កន្លែងកើតហេតុក៏ឃើញមនុស្សប្រុសដែលវាយខ្លួននៅសួនបឹងគីឡូហើយខ្លួនក៏បានទៅប្រាប់ឈ្មោះសេង សុកន ហើយដឹកគ្នាមកមើលទីតាំងដែលត្រូវបោកគ្រាប់រំសេវ លុះដល់ថ្ងៃទី០៣ ខែមិថុនា ឆ្នាំ២០២២ វេលាម៉ោងប្រហែល២០.០០នាទី ជនសង្ស័យឈ្មោះសេង សុកន ប្រាប់ខ្លួនថា រូបគេបានបោកគ្រាប់បែកនៅទីតាំងដែលខ្លួនបានប្រាប់រួចហើយ បន្ទាប់មកខ្លួនក៏បានយកគ្រាប់រំសេវកែច្នៃចំនួន ០៤ គ្រាប់ដែលនៅសល់យកមកហែកបោះចោលតាមផ្លូវ។វត្ថុតាងដកហូតបានម៉ូតូជនសង្ស័យជិះធ្វើសកម្មភាពចំនួន០១គ្រឿង។
ពាក់ព័ន្ធនឹងករណីនេះដែរ លោកឧត្តមសេនីយ៍ត្រី តេង ច័ន្ទណាត ស្នងការនគរបាលខេត្តសៀមរាប ក៏បានជូនថវិកាចំនួន១លានរៀលដល់កម្លាំងនគរបាលក្រុងសៀមរាប ក្នុងការលើកទឹកចិត្ត ដែលប្រឹងប្រែងបំបែកសំណុំរឿងនេះបានដោយជោគជ័យ។ បច្ចុប្បន្នកម្លាំងនគរបាលក្រុងសៀមរាប កំពុងរៀបចំសំណុំរឿងបញ្ជូនជនសង្ស័យទាំង២នាក់ទៅតុលាការដើម្បីចាត់ការតាមផ្លូវច្បាប់៕ ដោយភក្តី
