សៀមរាប៖សមត្ថកិច្ចបានឲ្យដឹងថា ខណៈមេឃកំពុងភ្លៀងធ្លាក់ខ្លាំងបុរសម្នាក់ទៅមើលគោនៅក្រោយផ្ទះ ក៏ត្រូវរន្ទះបាញ់ស្លាប់និងងាប់គោមួយក្បាល នៅនឹងកន្លែងយ៉ាងអណោចអធ័ម។
ហេតុការណ៍នេះកើតឡើងនៅវេលាម៉ោង១៤ និង ៣០នាទីរសៀលថ្ងៃទី១០ ខែកញ្ញា ឆ្នាំ២០២០ ស្ថិតនៅក្នុងភូមិសួង ឃុំត្រពាំងធំ ស្រុកប្រាសាទបាគង ខេត្តសៀមរាប។
លោកវរសេនីយ៍ឯក លឹម សម្បត្តិ អធិការនគរបាលស្រុក បានឲ្យដឹងថាមានករណីភ្លៀងធ្លាក់យ៉ាងខ្លាំងហើយក៏មានបាតុភូតរន្ទះបាញ់បណ្តាលឲ្យបុរសម្នាក់ឈ្មោះ សូ សែម ភេទប្រុសអាយុ៤៤ឆ្នាំ មុខរបរកសិករ រស់នៅភូមិសួង ឃុំត្រពាំងធំ ស្រុកប្រាសាទបាគង ខេត្ត សៀមរាប( ស្លាប់ ) និង ងាប់ គោមួយក្បាលផងដែរ។លោកបញ្ជាក់ថា ក្រោយពេលកើតហេតុ លោក បានឲ្យកម្លាំងនគរបាលផ្នែកព្រហ្មទណ្ឌស្រុក សហការជាមួយ មន្ត្រីប៉ុស្តិ៍ ចុះទៅកន្លែងកើតហេតុ រួចធ្វើកោសល្យវិច័យ ទៅលើដងខ្លួនសាកសព និង នៅមុខ ក្រុមគ្រួសារ ហើយសន្និដ្ឋានថា ជនរងគ្រោះពិតជាស្លាប់ ដោយសាររន្ទះបាញ់ស្លាប់ពិតប្រាកដមែន ពុំមែនជាបទល្មើសឃាតកម្មឡើយ។បច្ចុប្បន្ន សាកសព ជនរងគ្រោះត្រូវបានកម្លាំងជំនាញប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី៕
