ខេត្តរតនគិរី÷ ជនសង្ស័យចំនួន១០នាក់ ក្នុងនោះសមត្ថកិច្ចឃាត់ខ្លួនបាន៤នាក់ហើយ ពាក់ព័ន្ធករណីប្រើអំពើហិង្សាដោយចេតនា(កាប់និងកាំបិតផ្គាក់)បណ្តាលឲ្យជនរងគ្រោះពីរនាក់របួសធ្ងន់។ប្រតិបត្តិការនេះបានធ្វើឡើង នៅថ្ងៃទី២៧ ខែមេសា ឆ្នាំ២០២៣ វេលាម៉ោង១២និង ០០នាទីថ្ងៃត្រង់ បន្ទាប់ពីកម្លាំងជំនាញព្រហ្មទណ្ឌក្រុងបានលុង សហការជាមួយកម្លាំងការិយាល័យព្រហ្មទណ្ឌកម្រិតស្រាល និងកម្លាំងជំនាញព្រហ្មទណ្ឌស្រុកលំផាត់ បានធ្វើការចុះស្រាវជ្រាវបង្ក្រាប ឃាត់ខ្លួនជនសង្ស័យចំនួន៣នាក់ នៅក្នុងភូមិសាស្ត្រក្រុងបានលុង ពាក់ព័ន្ធករណីប្រើអំពើហិង្សាដោយចេតនា(កាប់ដោយកាំបិតផ្គាក់)។សមត្ថកិច្ចនគរបាលបានឲ្យដឹងថា កាលពីថ្ងៃទី៦ ខែមេសា ឆ្នាំ២០២៣ វេលាម៉ោង២២ និង០០នាទី នៅត្រង់ចំណុចតាមបណ្ដោយផ្លូវជាតិលេខ៧៦ ស្ថិតក្នុងភូមិលំផាត់ ឃុំជ័យឧត្តម ស្រុកលំផាត់ រហូតដល់ម៉ោង១៦និង៣០នាទី សមត្ថកិច្ចបានសហការជាមួយកម្លាំងជំនាញ នៃអធិការនគរបាលស្រុកតាវែង បន្តនីតិវិធីធ្វេីការឃាត់ខ្លួនជនសង្ស័យបានចំនួន ១នាក់បន្ថែមទៀត(ភេទប្រុស) ដោយមានការសម្របសម្រួលនីតិវិធី ពីលោក លាង អ៊ូ ព្រះរាជអាជ្ញារងអមសាលាដំបូងខេត្តរនគិរី។សមត្ថកិច្ចបានបញ្ជាក់ថា ជនរងគ្រោះចំនួន ២នាក់ ១-ឈ្មោះ ធ្វើន ខេន ភេទប្រុស អាយុ២២ឆ្នាំ ជនជាតិទំពួន មុខរបរកសិករ រស់នៅភូមិអុល ឃុំបាតាង ស្រុកលំផាត់ ខេត្តរតនគិរី រងរបួសធ្ងន់។២-ឈ្មោះ នៀន ញេម ភេទប្រុស អាយុ១៩ឆ្នាំ ជនជាតិទំពួន មុខរបរកសិករ រស់នៅភូមិអុល ឃុំបាតាង ស្រុកលំផាត់ ខេត្តរតនគិរី រងរបួសធ្ងន់។ឃាត់ខ្លួនបានចំនួន៤នាក់ ១-ឈ្មោះ វុទ្ធី ម៉េងលី {ហៅ ឡុង} ភេទប្រុស អាយុ១៧ឆ្នាំ ជនជាតិខ្មែរ មុខរបរជាងជួសម៉ូតូ។២-ឈ្មោះ វណ្ណី បញ្ញា ភេទប្រុស អាយុ១៩ឆ្នាំ ជនជាតិខ្មែរ មុខរបរជាងជួសជុលម៉ូតូ។៣-ឈ្មោះ វិត ឌឿន ភេទប្រុស អាយុ១៩ឆ្នាំ ជនជាតិខ្មែរ មុខរបរកម្មករជៀរជ័រ។និង៤-ឈ្មោះ យិន ចិត្រា ភេទប្រុស អាយុ២១ឆ្នាំ ជនជាតិខ្មែរ មុខរបរកម្មករ។ចំណែកបក្ខពួកចំនួន៦នាក់ទៀត កំពុងរត់គេចខ្លួន។ជនសង្ស័យទាំង១០នាក់នេះ មានទីលំនៅសព្វថ្ងៃរស់នៅក្នុងភូមិមួយ សង្កាត់កាចាញ ក្រុងបានលុង ខេត្តរតនគិរី។ ប្រភពបានឲ្យដឹងថា នៅថ្ងៃទី៦ ខែមេសាឆ្នាំ២០២៣ ជនរងគ្រោះបាននាំគ្នាទៅមើលខនស៊ឺតនៅស្រុកលំផាត់ លុះដល់វេលាម៉ោងប្រហែល២២និង០០នាទី ជនរងគ្រោះបានបបួលគ្នាត្រឡប់មកផ្ទះវិញ។ពេលកំពុងអង្គុយលើម៉ូតូចាំគ្នីគ្នាលើផ្លូវជាតិលេខ៧៦ ក៏ស្រាប់តែមានជនសង្ស័យមិនស្គាល់អត្តសញ្ញាណ បានយកកាំបិតផ្គាក់មកកាប់លើជនរងគ្រោះបណ្ដាលឲ្យរងរបួសធ្ងន់ចំនួន២នាក់ ត្រូវស្មាទាំងពីរនាក់ ក្រោយមកក៏ត្រូវបានសាច់ញាតិដឹកបញ្ជូនមកព្យាបាលនៅមន្ទីរពេទ្យបង្អែកខេត្តរតនគិរី។ លុះដល់ថ្ងៃទី២៧ ខែមេសា ឆ្នាំ២០២៣ជនសង្ស័យឈ្មោះ បញ្ញា និងឈ្មោះ ម៉េង លី{ហៅ ឡុង} បាននាំគ្នាមកថតអត្តសញ្ញាណប័ណ្ណនៅអធិការដ្ឋាននគរបាលក្រុងបានលុង ក្រោយមកកម្លាំងជំនាញព្រហ្មទណ្ឌ នៃអធិការដ្ឋាននគរបាលក្រុងបានលុងឃើញម៉ូតូដែលជនសង្ស័យជិះ មានការសង្ស័យក៏បានឃាត់សួរនាំ ក្រោយពេលកម្លាំងជំនាញសួរនាំជនសង្ស័យទាំង២នាក់ បានសារភាពថាខ្លួននិងបក្ខពួកពិតជាបានធ្វើសកម្មភាពប្រើហិង្សាដោយចេតនា កាប់នឹងកាំបិតផ្គាក់ ទៅលើជនរងគ្រោះនៅស្រុកលំផាត់ ពិតប្រាកដមែន។ ទើបកម្លាំងជំនាញស្នើសុំសហការដើម្បីបន្តនីតិវិធីទៀតតែម្ដង។សមត្ថកិច្ចបានដកហូតសម្ភារៈនិងវត្ថុតាងរួមមាន៖១-ម៉ូតូចំនួន ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២២ ពាក់ស្លាកលេខ រតនគិរី 1F-2202 ២-ទូរសព្ទដៃចំនួន ៤គ្រឿង ម៉ាកiphone ៣គ្រឿង និងoppo ១គ្រឿង។ បច្ចុប្បន្នជនសង្ស័យ និងវត្ថុតាងខាងលេីត្រូវបានឃាត់ និងរក្សាទុកបណ្ដោះអាសន្ននៅអធិការដ្ឋាននគរបាលស្រុកលំផាត់ ដដេីម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការបន្តតាមនីតិវិធីច្បាប់៕ ដោយ÷ សាវ័ន្ត
