ខេត្តសៀមរាប៖ពលរដ្ឋក្នុងក្រុងសៀមរាប កាលពីយប់ថ្ងៃទី២៩ ខែមេសា ឆ្នាំ២០២៣ ប្រហែល ២ពាន់នាក់ បានមកចូលរួមទស្សនាការផ្សាយបន្តផ្ទាល់ការប្រកួតបាល់ទាត់ ក្នុងព្រឹត្តិការណ៍ស៊ីហ្គេមលើកទី៣២ នៅសួនហាត់ប្រាណ មុខព្រះរាជដំណាក់ ដែលរៀបចំដោយរដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជា ខេត្តសៀមរាប។
សម្រាប់គូប្រកួតកីឡាបាល់ទាត់នេះ គឺរវាងក្រុមបាល់ទាត់ជម្រើសជាតិកម្ពុជា និង ក្រុមបាល់ទាត់ជម្រើសជាតិទីម័រលេស ផ្នែកបុរស អាយុក្រោម២២ឆ្នាំ ។ ក្នុងការប្រកួតនេះ ក្រុមជម្រើសជាតិទាំង២ បានខិតខំលេងយ៉ាងស្វិតស្វាញ និងប្រកបដោយបច្ចេកទេសរហូតដល់បញ្ចប់ការប្រកួត ជាមួយនោះ ក្រុមជម្រើសជាតិកម្ពុជា បានរកគ្រាប់បាល់បានរហូតដល់៤គ្រាប់ពីក្រុមទីម័រលេស និងការពារមិនឲ្យរបូតគ្រាប់បាល់ទៅវិញឡើយ។
ជាមួយនឹងជ័យជម្នះនេះ អ្នកចូលរួមទស្សនាផ្ទាល់នៅក្នុងក្រុងសៀមរាបបានបង្ហាញនូវការរំភើប និងមោទកភាព ចំពោះជ័យជម្នះ ស្របពេល ដែលប្រទេសកម្ពុជា មានលទ្ធភាពគ្រប់គ្រាន់ ក្នុងការធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមលើកទី៣២។នៅយប់ថ្ងៃដដែលនោះ សម្ដេចតេជោ ហ៊ុន សែន ក៏បានថ្លែងអបអរសាទរដល់ក្រុមបាល់ទាត់ជម្រើសជាតិកម្ពុជា និងជូនពរដល់ក្រុមកីឡាករកម្ពុជា ទទួលបានជោគជ័យក្នុងការប្រកួតជាបន្តទៀត។សូមជម្រាបថា ចាប់ពីថ្ងៃទី២៩ ខែមេសា ដល់ថ្ងៃទី១៦ ខែឧសភា ឆ្នាំ២០២៣ រដ្ឋបាលខេត្តសៀមរាប បានរៀបចំការផ្សាយបន្តផ្ទាល់នូវព្រឹត្តិការណ៍កីឡាស៊ីហ្គេមលើកទី៣២ ដែលប្រទេសកម្ពុជា ធ្វើជាម្ចាស់ផ្ទះ នៅសួនច្បារព្រះរាជដំណាក់ក្នុងក្រុងសៀមរាប និងបណ្ដាស្រុកទាំង១១ផ្សេងទៀត ដើម្បីផ្ដល់ឱកាសដល់ប្រជាពលរដ្ឋនៅទូទាំងខេត្តចូលរួមទស្សនា និងគាំទ្រដល់ក្រុមកីឡាករជម្រើសជាតិកម្ពុជា។ បន្ថែមពីនេះ រដ្ឋបាលខេត្ត ក៏បានអំពាវនាវម្ចាស់អាជីវកម្មក្នុងតំបន់ Pub Street និងទីតាំងសំខាន់ៗដទៃទៀត ចូលរួមដាក់បញ្ចាំងការផ្សាយបន្តផ្ទាល់នេះ ដើម្បីអបអរ និងគាំទ្រក្នុងព្រឹត្តិការណ៍ជាប្រវត្តិសាស្ត្រ៕
