ខេត្តសៀមរាប៖យោងតាមរបាយការណ៍របស់គ្រឹះស្ថានអង្គរ បានឲ្យដឹងថា ក្នុងរយៈពេល៦ខែដើមឆ្នាំ២០២៣នេះ មានភ្ញៀវទេសចរសរុបចំនួន ៣៨៥ ៧៦៩នាក់ បានទិញសំបុត្រចូលទស្សនារមណីយដ្ឋានអង្គរ ដែលចំណូលបានពីការលក់សំបុត្រនេះ មានប្រមាណជាង១៧លាន៨សែនដុល្លារអាមេរិក កើនជាង ៦ពាន់ភាគរយ បើធៀបនឹងរយៈពេលដូចគ្នាក្នុងឆ្នាំ២០២២ ហើយដោយឡែក ក្នុងខែមិថុនា កន្លងទៅនេះ មានអ្នកទេសចរចំនួន ៤១ ០១២នាក់ បានទិញបណ្ណចូលទស្សនារមណីយដ្ឋានអង្គរ ដែលចំណូលលក់សំបុត្រនោះមានចំនួន ១ ៨១១ ៥៨៩ដុល្លារអាមេរិក ។
គ្រឹះស្ថានអង្គរបានឲ្យដឹងទៀតថា ក្រៅពីនេះ គ្រឹះស្ថានអង្គរ ក៏បានលក់សំបុត្រចូលទស្សនាតំបន់កោះកែរ បានចំនួន ៩៥ ៥៣៥ដុល្លារ ដល់អ្នកទេសចរអន្តរជាតិចំនួន ៦ ៣៦៩នាក់ និងរកចំណូលពីការលក់សំបុត្រទូក នៅកំពង់ផែចុងឃ្នៀស បានចំនួន ២៩២ ៩៤០ ដុល្លារ ក្នុងរយៈពេល៦ខែនេះ។
គ្រឹះស្ថានអង្គរក៏បានប្រកាសឲ្យដឹងដែរតថា ចំណូលពីការលក់សំបុត្រនេះ គ្រឹះស្ថានអង្គរ បានឧបត្ថម្ភទៅមូលនិធិគន្ធបុប្ផា មានចំនួន ៧៧១ ៥៣៨ដុល្លារ៕AFN
