ខេត្តបន្ទាយមានជ័យ ៖សេចក្តីរាយការណ៍បានឲ្យដឹងថា នៅល្ងាចថ្ងៃទី២១ ខែមករា ឆ្នាំ២០២៤ស្ថិតភូមិសាស្គ្រព្រំប្រទល់ឃុំសឿ ស្រុកមង្គលបូរី និងឃុំល្វាស្រុកបវេល មានករណីរថយន្តដឹកទឹកកកយីហោមង្គលបូរី បានបើកក្នុងល្បឿនលឿនបុកគោងាប់១ក្បាលបន្តបុករះធ្វើឲ្យខូចខាតតូបរួចបន្តរហូតបុករថយន្ត១គ្រឿងនិងមនុស្សម្នាក់ទៀតរងរបួសធ្ងន់។
សមត្ថកិច្ចប្រាប់ថា មុនកើតហេតុគ្រោះថ្នាក់ចរាចរណ៍កើតឡើងដោយរថយន្តទឹកកកនិងទឹកបរិសុទ្ធយីហោមង្គលបូរី ទំនងមានជាតិអាល់កុលក្នុងខ្លួន បានបើកបរតាមផ្លូវជាតិ១៦០ទិសដៅពីលិចមកកើតក្នុងល្បឿនលឿនទៅដល់ចំណុចកើតហេតុបានរេចង្កូតទៅបុកគោ១ក្បាលនៅចិញ្ចើមផ្លូវងាប់ហើយបន្តទៅបុករះតូបអ្នកលក់អីវ៉ាន់ចាប់ហួយបណ្តាលដាច់១កំណាត់មុខនៅខាងស្តាំដៃពីស្រុកបវេលមកស្រុកមង្គលបូរី ក៏បន្តទៅបុកសំយ៉ាបផ្ទះលក់អីវ៉ាន់ចាប់ហួយនិងលក់សាំងរួចបានកិនទៅលើរថយន្តឡិចស៊ីស RX.300 ចតចោលក្នុងផ្ទះ១គ្រឿងទៀតបណ្តាលឱ្យរបួសយុវតីម្នាក់អាយុ១៥ឆ្នាំកំពុងអង្គុយលក់អីវ៉ាន់រងរបួសធ្ងន់ផងដែរ។
សមត្ថកិច្ចបញ្ជាក់ថា មូលហេតុគ្រោះថ្នាក់កើតឡើងបង្កដោយរថយន្តដឹកទឹកកក(យីហោ)មង្គលបូរី។ ក្រោយពិនិត្យរួចរាល់បានបញ្ជូនទៅអធិការដ្ឋាននគរបាលស្រុកបវេល ដើម្បីធ្វើការដោះស្រាយគ្នាតាមច្បាប់៕ដោយ៖សុខជា
