ភ្នំពេញ៖នៅព្រឹកថ្ងៃទី ២៤ ខែមករា ឆ្នាំ២០២៤នេះ កម្លាំងនគរបាលជំនាញមន្ទីរប្រឆាំងគ្រឿងញៀន ក្រសួងមហាផ្ទៃ បានបើកបង្ហាញមុខជនបរទេសចំនួន៥នាក់ និងគ្រឿងញៀនជាងមួយតោន ដែលត្រូវបានបង្ក្រាបកាលពីពេលថ្មីៗនេះ នៅលើដែនសមុទ្រ នៃខេត្តព្រះសីហនុ។
នគរបាលជំនាញផ្នែកគ្រឿងញៀនបានបញ្ជាក់ថា សារធាតុញៀនដែលបង្ក្រាបបាននេះ ជាប្រភេទ កេតតាមីន និងមេតំហ្វេតាមីន។ សមត្ថកិច្ចបញ្ជាក់ថា គ្រឿងញៀនដែលត្រូវបានគេរកឃើញនេះមានចំនួន២៥ធុង ស្មើនឹង១,០៨២.៥គីឡូក្រាម (គ្រឿងញៀនសុទ្ធចំនួន១,០២១.២គីឡូក្រាម) និងសម្ភារៈមួយចំនួនទៀតផងដែរ។ សូមរំលឹកថា ករណីគ្រឿងញៀនដូចគ្នា កាលពីថ្ងៃទី២០ ខែមករា ឆ្នាំ២០២៤ អាវុធហត្ថខេត្តព្រះវិហារ ក៏បានបង្ក្រាបគ្រឿងញៀនប្រមាណជាង ១ តោន ផងដែរ នៅស្រុកជ័យសែន ខេត្តព្រះវិហារ។ មហាជនមានសង្ឃឹមយ៉ាងមុតមាំថា សមត្ថកិច្ចកម្ពុជា នឹងមានវិធានការបង្ក្រាប និងទប់ស្កាត់ករណីជំនួញជួញដូរគ្រឿងញៀនឲ្យបានតឹងរឹងបំផុត ដើម្បីសុខសុវត្ថិភាពរបស់សង្គមជាតិ៕AFN
