ខេត្តរតនគិរី៖ស្លាកប៉ាណូផ្សាយពាណិជ្ជកម្មនៅទទឹងផ្លូវមួយកន្លែងបានរងការខូចខាត ដាច់មុខដំណរហើយវៀចស្លាកប៉ាណូ បន្ទាប់ពីរថយន្តវេអងដឹកដំឡូងមីបើកប៉ះរួចគេចខ្លួនបាត់។តែករណីនេះអាចបង្កគ្រោះថ្នាក់ដល់អ្នកដំណើរផ្សេងទៀត សូមមេត្តាប្រុងប្រយ័ត្ន។
ករណីរថយន្តបើកប៉ះនេះនៅវេលាម៉ោង៨ និង៣០នាទីយប់ ថ្ងៃទី២៨ ខែមករា ឆ្នាំ២០២៤ តាមបណ្ដោយផ្លូវជាតិលេខ៧៨ ទល់មុខក្រាស់ឡាន ត្រង់ចំណុចជើងវត្តភ្នំស្វាយ ស្ថិតក្នុងភូមិភ្នំស្វាយ សង្កាត់បឹងកន្សែងក្រុងបានលុង។
តាមប្រភពពីកន្លែងកើតហេតុបានឲ្យដឹងថា គេបានឃើញរថយន្ត១គ្រឿងម៉ាកវេអងដឹកដំឡូងមី បើកបរក្នុងទិសដៅពីកើតទៅលិចក្នុងល្បឿនយ៉ាងលឿន មកដល់ត្រង់ចំណុចកើតហេតុខាងលើ បានប៉ះនិងស្លាកប៉ាណូនៅទទឹងផ្លូវ បណ្ដាលឲ្យជ្រុះដំឡូងមីរាយប៉ាយពេញផ្លូវ ហើយស្លាកប៉ាណូនោះបានដាច់ទឹកអន្សា និងកោងស្លាកប៉ាណូទៀតផង។
បន្ទាប់ពីបើកប៉ះហើយរថយន្ត១គ្រឿងនេះមិនបានឈប់នោះទេ បន្ថែមល្បឿនគេចខ្លួនបាត់ស្រមោល។
ទាក់ទិនករណីខាងលើនេះ លោក កៃសាវិន អភិបាលរងក្រុងបានលុងទទួលបន្ទុកសណ្តាប់ធ្នាប់បានឲ្យដឹងថា លោកទើបនិងដឹងព័ត៌មាននេះ ហើយលោកក៏បានរាយការណ៍ទៅមេរួចហើយដែរ ហើយស្លាកដែលដាច់នេះលោកនឹងឲ្យខាងក្រុមហ៊ុនដោះស្លាកនេះចេញ ដើម្បីរៀបចំសារជាថ្មីកុំឲ្យមានហានិភ័យដល់អ្នកធ្វើដំណើរតាមដងផ្លូវ។ប៉ុន្តែការដឹកច្រើននិងសំពីងសំពោងសួរទៅខាងមន្ទីរសាធារណការនិងដឹកជញ្ជូនទៅលោកអត់ដឹងទេ៕ សាវ័ន្ត
