ខេត្តព្រះវិហារ៖នៅព្រឹក ថ្ងៃទី០៣ខែ មិថុនា ឆ្នាំ២០២៤នេះ ស្នងការដ្ឋាននគរបាលខេត្តព្រះវិហារ បានរៀបចំ “ពិធីបេីកវគ្គបណ្ដុះបណ្ដាលស្ដីពីលំហាត់របៀប ការស្លៀកពាក់ឯកសណ្ឋាន ក្រមសីលធម៌វិជ្ជាជីវនគរបាល និងកិច្ចប្រជុំបូកសរុបលទ្ធផលកិច្ចប្រតិបត្តិការប្រចាំឆមាសទី១ និងលេីកទិសដៅការងារបន្ត” ក្រោមអធិបតីភាព លោកឧត្ដមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ។ ក្នុងនោះដែរក៏មានការអញ្ជេីញចូលរួមពី លោក-លោកស្រី ឧត្តមសេនីយ៍ វរសេនីយ៍ស្នងការរង លោកអនុផែន លោក-លោកស្រី នាយ-នាយរងការិយាល័យ លោកអធិការ លោក-លោកស្រីអធិការរងនគរបាល ក្រុង/ស្រុកទាំង០៨ និងនាយប៉ុស្តិ៍នគរបាលរដ្ឋបាល ទាំង៥១ឃុំ/សង្កាត់ ផងដែរ។
ឆ្លៀតក្នុងឱកាសនោះផងដែរ លោកឧត្តមសេនីយ៍ទោស្នងការ បានធ្វើការបូកសរុបកិច្ចប្រជុំ ផ្តលអនុសាសន៍ដឹកនាំ និងដាក់ចេញនូវវិធានការយ៉ាងម៉ឺងម៉ាត់ ដល់កម្លាំងនគរបាលទូទាំងខេត្តព្រះវិហារ ធ្វើយ៉ាងណាត្រូវបង្ក្រាបល្បែងស៊ីសងខុសច្បាប់ បញ្ហាគ្រឿងញៀន បទល្មើសផ្សេងៗ ជាពិសេសបោសសម្អាតក្រុមក្មេងទំនើង និងសិស្សគេចសាលា ឱ្យអស់ពីក្នុងមូលដ្ឋាន ព្រមទាំងខិតខំប្រឹងប្រែងបម្រើសេវាសាធារណ: ជូនប្រជាពលរដ្ឋប្រកបដោយ វិជ្ជាជីវៈ ក្រមសីលធម៌ និងឆ្លើយតបរាល់សំណូមពរ តម្រូវការដែលពួកគាត់ចង់បាន៕
ដោយ៖AFN (ប្រភព ស្នងការនគរបាលខេត្តព្រះវិហារ)
