ព្រះសីហនុ ៖សមត្ថកិច្ចបានឲ្យដឹងថា នៅម៉ោង៨យប់ថ្ងៃនេះ សមត្ថកិច្ចបានបញ្ជូនក្រុមជនជាតិចិនទៅកាន់ស្នងការដ្ឋាននគរបាលខេត្តព្រះសីហនុ បានចំនួន២៩៧នាក់ហើយ ក្នុងចំណោមជនជាតិចិនប្រមាណ៤០០នាក់ ដែលគណៈបញ្ជាការឯកភាពខេត្តដឹកនាំកម្លាំងសមត្ថកិច្ចចម្រុះជិត១០០នាក់ឆ្មក់ចូលឆែកឆេរ ក្នុងភោជនីយដ្ឋានចិនស៊ីខាយសៀនមិន។
ប្រភពបានឲ្យដឹងថា ក្នុងចំណោមជនជាតិចិនទាំង២៩៧នាក់(មានស្រីខ្មែរម្នាក់) សមត្ថកិច្ចបានបែងចែក ឬក៏ញែកចេញជា២ក្រុម ដោយក្នុងនោះ ក្រុមទី១ បញ្ជូនទៅការិយាល័យប្រឆាំងការជួញដូរមនុស្សនិងការពារអនីតិជន មានចំនួន១២៥នាក់ ស្រី៤៤នាក់(មានស្រីជនជាតិខ្មែរម្នាក់) និងក្រុមទី២ បញ្ជូនទៅកាន់ការិយាល័យប្រឆាំងការជួញដូរគ្រឿងញៀន មានចំនួន១៧២នាក់ ក្នុងនោះមានស្រី៧០នាក់។ សរុបស្រីទាំង២ក្រុមមានចំនួន១១៤នាក់។ប្រភពបន្តថា ពេលនេះជនសង្ស័យដែលនៅសេសសល់ក្រុមសមត្ថកិច្ចជំនាញកំពុងតែធ្វើការសាកសួរ និងបន្តនីតិវិធី។ ហើយមកដល់ពេលនេះសមត្ថកិច្ចមិនទាន់អាចបញ្ជាក់អំពីចំនួនមនុស្សដែលឃាត់ខ្លួនកាលពីយប់មិញនៅឡើយទេ។ សូមបញ្ជាក់ផងដែរថា ជនជាតិចិនប្រុសស្រីចំនួន៣៨១នាក់ ត្រូវសមត្ថកិច្ចចម្រុះចាប់ឃាត់ខ្លួន ក្នុងប្រតិបត្តិការឆ្មក់ចុះឆែកឆេរនៅក្នុងភោជនីយដ្ឋានស៊ីនខាយមែន មួយកន្លែងជាកម្មសិទ្ធិជនជាតិចិន។ សកម្មភាពឆ្មក់ចុះត្រួតពិនិត្យភោជនីយដ្ឋាននេះដែរ បានធ្វើឡើងនៅម៉ោង ០០និង៤៥ នាទីយប់រំលងអធ្រាត្រ ថ្ងៃទី៣០ ខែកញ្ញា ឆ្នាំ ២០២០ ស្ថិតនៅក្រុម១៧ភូមិ៤សង្កាត់លេខ៤ ក្រុង/ខេត្តព្រះសីហនុ ដឹកនាំដោយគណៈបញ្ជាការឯកភាពខេត្ត មាន លោក ជាវ វិជ្ជៈ អភិបាលរងខេត្តព្រះសីហនុ លោក ឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុនិង លោកឧត្តមសេនីយ៍ត្រី កែវ សុផល មេបញ្ជាការរងកងរាជអាវុធហត្ថខេត្តព្រះសីហនុ ក្នុងនោះក៏មានការសម្របសម្រួលផ្នែកផ្លូវច្បាប់ពីលោក ពេញ ពិសិទ្ធ ព្រះរាជអាជ្ញាររងអមសាលាដំបូងខេត្តព្រះសីហនុ។ យោងតាមប្រភពនិយាយថា ភោនីយដ្ឋានស៊ីនខាយម៉ែន ជាកម្មសិទ្ធិរបស់ឈ្មោះBAO FANGZEជនជាតិចិន។ ក្នុងនោះ ក្រុមសមត្ថកិច្ចបានឆែកឆេរនិងចាប់ឃាត់ខ្លួនមនុស្សជាដំណាក់ៗ ដោយនៅបន្ទប់ជាន់ទី១និងទី២ មានបន្ទប់ចំនួន២២បន្ទប់ សមត្ថកិច្ចឃាត់ខ្លួនមនុស្ស២៤៥នាក់(ប្រុស១៥៧នាក់ និងស្រី៨៨នាក់)ខ្មែរ២នាក់(ប្រុស១ស្រី១)។ រកឃើញអាវុធខ្លីចំនួន២ដើម 1/ម៉ាក(សាសតាវ៉ា)គ្រាប់ចំនួន៨គ្រាប់,2/ម៉ាក(សូរ៉ាគី)មានគ្រាប់ចំនួន៦គ្រាប់។ ដោយឡែកក្លឹបកំសាន្តបន្ទប់ជាន់ទី៣ឃាត់ខ្លួនមនុស្សចំនួន១២១នាក់ប្រុសចំនួន៨២នាក់ ស្រីចំនួន៣៩នាក់។ ចំណែកបន្ទប់ស្នាក់នៅជាន់ទី៤ ឃាត់ខ្លួនមនុស្សចំនួន១៥នាក់ ប្រុស១០នាក់ ស្រី៥នាក់។ សរុបឃាត់ខ្លួនមនុស្សចំនួន៣៨១នាក់ និងដកហូតគ្រឿងញៀនមួយចំនួនធំនៅមិនទាន់ថ្លឹង។ បច្ចុប្បន្នជនជាតិចិនទាំងនេះត្រូវបានបញ្ជូនយកទៅកានស្នងការដ្ឋាននគរបាលខេត្តព្រះសីហនុ ដើម្បីសាកសួរបន្តតាមនីតិវិធីច្បាប់៕ដោយ៖សៀមរាបថែស៍
