ខេត្តសៀមរាប៖ ពិធីប្រកាសចូលកាន់តំណែងក្រុមប្រឹក្សា ខេត្តសៀមរាប អាណត្តិទី៤ នៅសាលសន្និសីទសណ្ឋាគារសុខា សៀមរាប បានធ្វើឡើងនៅរសៀលថ្ងៃទី១៣ ខែមិថុនា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប និងមានការអញ្ជើញចូលរួមពីប្រតិភូក្រសួងមហាផ្ទៃ ក្រសួងការពារជាតិ ឯកឧត្តម លោកជំទាវ សមាជិក សមាជិកាក្រុមការងាររាជរដ្ឋាភិបាលចុះមូលដ្ឋានខេត្តសៀមរាប អភិបាលខេត្ត អភិបាលរងខេត្ត ព្រមទាំងអភិបាលក្រុង ស្រុក មន្ទីរ អង្គភាពជុំវិញខេត្ត និងមន្ត្រីរដ្ឋបាលខេត្ត។
ឯកឧត្តម ឧបនាយករដ្ឋមន្ត្រី ទៀ សីហា បានចូលរួមអបអរសាទរ កោតសរសើរ និងវាយតម្លៃខ្ពស់ ចំពោះ លោក លោកស្រី សមាជិក សមាជិការក្រុមប្រឹក្សាខេត្តសៀមរាប ដែលត្រូវជាតំណាងប្រជាពលរដ្ឋ គឺសមាជិកក្រុមប្រឹក្សាឃុំ សង្កាត់ ផ្ដល់សេចក្ដីទុកចិត្តបោះឆ្នោតជ្រើសរើសជាសមាជិកក្រុមប្រឹក្សាខេត្តសៀមរាប អាណត្តិទី៤ ដើម្បីបន្តដឹកនាំខេត្តសៀមរាប សំដៅចូលរួមថែរក្សាសុខសន្តិភាព ស្ថេរភាព និងបន្តអភិវឌ្ឍឱ្យមានការរីកចម្រើនលើគ្រប់វិស័យបន្ថែមទៀត។
ឯកឧត្តម ស្នើដល់ក្រុមប្រឹក្សាខេត្ត អនុវត្តការងារ ត្រូវខិតខំបម្រើផលប្រយោជន៍ និងសេចក្ដីត្រូវការរបស់ប្រជាពលរដ្ឋទាំងអស់ ដោយស្មើភាព តម្លាភាព គណនេយ្យភាព សមធម៌ និងបរិយាបន្ន ជាពិសេសមិនត្រូវប្រកាន់និន្នាការនយោបាយណាមួយនោះឡើយ។
ក្រុមប្រឹក្សាខេត្ត ត្រូវធ្វើការជាមួយអភិបាលខេត្ត ឱ្យបានជិតស្និទ្ធទាន់ពេលវេលា ត្រូវមានរបបប្រជុំតាមការកំណត់ និងត្រូវបំពេញកាតព្វកិច្ច ស្របតាមនីតិវិធីច្បាប់ជាធរមាន និងចុះមូលដ្ឋានផ្ទាល់ ដើម្បីដឹងពីសុខទុក្ខ ដោះស្រាយបញ្ហាជូនពលរដ្ឋ ឱ្យបានទាន់ពេលវេលា និងមានប្រសិទ្ធភាពខ្ពស់។
ឯកឧត្តម បានបន្តថា កិច្ចការជាអាទិភាពបន្តសម្រាប់ក្រុមប្រឹក្សាអាណត្តិទី៤ គឺ ១. ការរៀបចំផែនការអភិវឌ្ឍរយៈពេល៥ឆ្នាំ និងកម្មវិធីវិនីយោគ៣ឆ្នាំរំកិល ២. ការចូលរួមអនុវត្តកម្មវិធីកំណែទម្រង់នានារបស់រាជរដ្ឋាភិបាលកម្ពុជា ៣. ការផ្ដល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន ៤. ទទួលខុសត្រូវលើការដឹកនាំ គ្រប់គ្រង ចាត់ចែងការងារសន្តិសុខ និងសណ្ដាប់ធ្នាប់សាធារណៈ ព្រមទាំងសុវត្ថិភាពសង្គម នៅក្នុងដែនសមត្ថកិច្ចរបស់ខ្លួន និងការលើកកម្ពស់ជីវភាពប្រជាពលរដ្ឋ កាត់បន្ថយភាពក្រីក្រ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ក៏បានផ្ដល់អនុសាសន៍ ដល់ក្រុមប្រឹក្សាខេត្ត ត្រូវធ្វើការជាមួយអភិបាលខេត្ត ឱ្យបានជិតស្និទ្ធទាន់ពេលវេលា ត្រូវមានរបបប្រជុំតាមការកំណត់ និងត្រូវបំពេញកាតព្វកិច្ច ស្របតាមនីតិវិធីច្បាប់ជាធរមាន ។ ដូចជាការប្រជុំរៀបចំផែនការអភិវឌ្ឍខេត្ត ដាក់ចេញកម្មវិធីកំណែទម្រង់នានា ស្របតាមគោលនយោបាយ របស់រាជរដ្ឋាភិបាល ពិនិត្យលើការផ្តល់សេវាសាធារណៈ ជូនដល់ប្រជាពលរដ្ឋ ឱ្យកាន់តែខិតជិត និងកាន់តែល្អប្រសើរ ព្រមទាំងធានាគ្រប់គ្រងសន្តិសុខ សុវត្ថិភាពមូលដ្ឋាន និងចុះមូលដ្ឋានផ្ទាល់ ដើម្បីដឹងពីសុខទុក្ខ និងដោះស្រាយបញ្ហាជូនពលរដ្ឋ ឱ្យបានទាន់ពេលវេលា និងមានប្រសិទ្ធភាពខ្ពស់៕ដោយ៖AFN
