ខេត្តកំពង់ធំ៖សកម្មភាពកាប់ព្រៃឈើ និងដឹកជញ្ជូនឈើ នៅតំបន់ព្រៃឡង់ ក្នុងស្រុកសណ្តាន់ ខេត្តកំពង់ធំ កើតមានគួរឲ្យព្រួយបារម្ភ។ជាក់ស្តែងឈើប្រភេទលេខ១ជាង១០០កំណាត់ និងឈើក្តាររាប់រយបន្ទះត្រូវបានរកឃើញ និង រឹបអូសនៅទីតាំង ៤ផ្សេងគ្នាក្នុងស្រុកបារាយណ៍ ដោយកម្លាំងចម្រុះថ្នាក់ជាតិ និងខេត្តកំពង់ធំ កុំអីត្រូវបានក្រុមឈ្មួញដឹករកទីផ្សារងងឹតបាត់ស្រមោលទៀតហើយ។
លោក តាន់ គឹមសួរ សមាគមយុវជនស្រឡាញ់ធម្មជាតិ បានប្រាប់អ្នកសារព័ត៌មានថា ក្រោយពីទទួលបានតម្រុយពីបទល្មើសព្រៃឈើនៅតំបន់ព្រៃឡង់ រួចមក លោកនិងក្រុមការងារបានចំណាយពេលអស់ជិត ១ខែដើម្បីធ្វើការស៊ើបអង្កេតលើករណីនេះ។
បន្ទាប់ពីរកឃើញវត្ថុតាងច្បាស់លាស់អស់ហើយ ពួកលោកបានសុំកិច្ចអន្តរាគមន៍ពីអាជ្ញាធរថ្នាក់ជាតិនៃក្រសួងកសិកម្ម រុក្ខាប្រមាញ់ និងនេសាទ។ កម្លាំងចម្រុះដែលរួមមានលោក អ៊ិត ភូម្រា អនុប្រធាននាយកដ្ឋានរដ្ឋបាលព្រៃឈើថ្នាក់ជាតិ និងកម្លាំងពីគណៈបញ្ជាការឯកភាពរដ្ឋបាលខេត្តកំពង់ធំ បានចុះបង្រ្កាបបទល្មើសនេះកាលពីថ្ងៃទី១៥ និង១៦ ខែកញ្ញានេះ នៅទីតាំង ៤កន្លែងផ្សេងគ្នានៅក្នុងឃុំចុងដូង និង ឃុំបល្ល័ង្គ ក្នុងស្រុកបារាយណ៍។
ជនសង្ស័យមួយចំនួនត្រូវបានឃាត់ខ្លួនយកទៅធ្វើការសួរនាំ ហើយរថយន្តដឹកឈើភេទកង់ ១០យ៉ាងហោចណាស់ ២គ្រឿងត្រូវបានរកឃើញផងដែរ។
លោកបញ្ជាក់ថា៖ «នៅពេលដែលយើងក្តោបបានទីតាំងទម្លាក់ឈើ និងកន្លែងទុកឡានដឹកឈើហើយ ទើបយើងស្នើសុំកម្លាំងថ្នាក់ជាតិចុះទៅបង្រ្កាបដោយសម្ងាត់ ព្រោះយើងខ្លាចបែកការណ៍។ យើងរកឃើញថា ឈើទាំងអស់ហ្នឹង គឺសុទ្ធតែឈើខុសច្បាប់ទាំងអស់ ដែលកាប់ចេញពីតំបន់ព្រៃឡង់ ក្នុងស្រុកសណ្តាន់ ហើយដឹកទៅទុកនៅស្រុកបារាយណ៍ ខ្លះ និងឈើឃ្លុំខ្លះទៀតដឹកចេញទៅក្រៅប្រទេស»។
កម្លាំងចម្រុះថ្នាក់ជាតិ និងខេត្តកំពង់ធំ ចុះបង្រ្កាបបទល្មើសនេះកាលពីថ្ងៃទី១៥ និង១៦ ខែកញ្ញានេះ នៅទីតាំង ៤កន្លែងផ្សេងគ្នានៅក្នុងឃុំចុងដូង និង ឃុំបល្ល័ង្គ ក្នុងស្រុកបារាយណ៍។
លោកបន្ថែមថា ឈ្មួញធ្វើយ៉ាងណាដឹកជញ្ជូនឈើទាំងឡានធំៗ មានទាំងឡានកង់ ១០ បែបនេះបានបីបួនគ្រឿង មានទាំងឡានវេអងផង។ ប្រសិនបើមន្រ្តីថ្នាក់មូលដ្ឋានមានឆន្ទៈក្នុងការបង្រ្កាប ប្រហែលជាមិនមានបទល្មើសធនធានធម្មជាតិទ្រង់ទ្រាយធំបែបនេះកើតឡើងទេ។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ បានអះអាងថា លោកជាប់រវល់មិនអាចធ្វើអត្ថាធិប្បាយបានទេ។ រីឯលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ដែលគ្រប់គ្រងខណ្ឌរដ្ឋបាលព្រៃឈើ បានបញ្ជាក់ដោយខ្លីថា មន្រ្តីជំនាញកំពុងតែបន្តចំណាត់ការផ្លូវច្បាប់លើករណីនេះ៕ដោយ៖AFN
