ភ្នំ​ពេ​ញ ៖សមត្ថកិច្ចបានឲ្យដងថា មន្ត្រី​នគរបាល​ម្នាក់បាញ់សម្លាប់​ប្រពន្ធ​បណ្តាល​ឲ្យ​ស្លាប់​រួច​ក៏បាញ់សម្លាប់​ខ្លួនឯង​តាម​ក្រោយ​ សង្ស័យផ្តើមចេញពីភ្លើងប្រច័ណ្ឌ។ ហេតុការណ៍​នេះ​កើតឡើង​នៅវេលា​ម៉ោង​៨​យប់​ថ្ងៃទី​៣​ ខែតុលា​ ស្ថិត​ក្នុង​ផ្ទះល្វែង​ជាន់​លើ​តាម​បណ្តោយ​ផ្លូវ​៥៣​បេ​តេ ​ភូមិ​ក្បាល​ទំនប់​ សង្កាត់​បឹងទំពន់​២ ​ខណ្ឌមានជ័យ ​រាជធានី​ភ្នំពេញ​ ក្បែរ​វត្ត​ដំបូក​ខ្ពស់​។ សមត្ថកិច្ចបន្តថា ជនរងគ្រោះ​ជា​ប្រពន្ធ​ដែល​ស្លាប់​នោះ​មានឈ្មោះ​កែវ ស្រី​ដា អាយុ​៥២​ឆ្នាំមាន​ស្រុកកំណើត​ខេត្ត​ក្រចេះ​។​ដោយ​ប្តី​ដែល​បាញ់សម្លាប់​ខ្លួន​តាម​ក្រោយ​នោះ​មានឈ្មោះ​អ៊ុក ម៉ា​រ៉ា​ឌី​ មុខរបរ​ជា​នគរបាល​និង​មាន​ស្រុកកំណើត​ ភូមិ​ភ្នៅ​ ឃុំ​ជ្រៃ​ ស្រុក​កំពង់ត្របែក ខេត្តព្រៃវែង​។ សមត្ថកិច្ចបាន​បញ្ជាក់ថា ​យោង​តាម​សាក្សី​បំភ្លឺថា ​មុន​ពេល​កើតហេតុ​មាន​ឮស្នូរ​ផ្ទុះអាវុធ​ខ្លី​ចំនួន​៣​គ្រាប់​ផ្ទួនៗ​គ្នា​នៅ​លើផ្ទះ​ជាន់​លើ​ដែល​ជនរងគ្រោះ​ទាំងពីរ​ស្នាក់នៅ​ហើយ​ការបាញ់សម្លាប់​នេះ​គឺ​ដោយសារតែ​ប្តី​ប្រចណ្ឌ​ប្រពន្ធ​។ ទាក់ទិន​ទៅ​និង​ជីវប្រវត្តិ​ពួកគាត់​ទាំងពីរ​គឺ​ប្តី​ជា​បុរស​ពោះម៉ាយ​មានកូន​១​។​ចំណែក​ប្រពន្ធ​ក៏​ជា​ស្ត្រី​មេម៉ាយ​កូន​៤​នាក់​ដែល​ក្នុងនោះ​មាន​២​នាក់​រស់​នៅឯ​ប្រទេស​អូស្ត្រាលី​នឹង​២​នាក់​ទៀត​រស់នៅ​ស្រុក​ខ្មែរ​។ ករណីនេះគេសង្ស័យថា អាចផ្តើមចេញពីភ្លើងប្រច័ណ្ឌ៕នាយតុញ