ខេត្តព្រះវិហារ៖នាព្រឹកថ្ងៃទី២១ ខែមករា ឆ្នាំ២០២៥ អគារសិក្សា១ខ្នង មាន ៥បន្ទប់ និងអគារអន្តេវាសិកដ្ឋានសិស្សប្រុស១ខ្នង មាន៤បន្ទប់ ព្រមទាំងសមិទ្ធផលនានា ស្ថិតក្នុងបរិវេណសាលាវិទ្យាល័យសង្គមថ្មី ក្នុងឃុំចំរើន ស្រុកសង្គមថ្មី ដែលឧបត្ថម្ភ ដោយអង្គការ សម្រេចសុបិន្តកុមារកម្ពុជា ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមវត្តមានលោក គឹម ចាន់បញ្ញា អភិបាលរងខេត្តព្រះវិហារ ដោយមានការចូលរួមពីលោក ចេង លឹមហ៊ាន់ ប្រធានមន្ទីរអប់រំខេត្ត អង្គការដៃគូរអភិវឌ្ឍន៍ សប្បុរសជន អាជ្ញាធរមូលស្រុក ឃុំ លោកគ្រូអ្នកគ្រូ សិស្សានុសិស្ស និងប្រជាពលរដ្ឋជាច្រើនរូប។
លោក គឹម ចាន់បញ្ញា អភិបាលរងខេត្តព្រះវិហារ បានថ្លែងនូវការកោតសរសើរ និងវាយតម្លៃខ្ពស់ចំពោះអាជ្ញាធរស្រុកសង្គមថ្មី ដែលបានខិតខំប្រឹងប្រែងក្នុងការកៀរគររកប្រភពធនធានថវិកានានា ដើម្បីអភិវឌ្ឍន៍មូលដ្ឋាន ជាពិសេសគឺវិស័យអប់រំក្នុងការបណ្តុះកសាង និងអភិវឌ្ឍ ធនធានមនុស្ស ស្របតាមចក្ខុយវិស័យយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។
លោក គឹមម ចាន់បញ្ញា ក៏បានថ្លែងនូវការអរគុណដល់ស្ថាបនិកគម្រោងអង្គការសម្រេចសុបិនកុមារកម្ពុជា ដែលបានបរិច្ចាគថវិកា និងខិតខំកៀរគររកប្រភពថវិកា ពីសប្បុរសជននានា ជួយសាងសង់អគារសិក្សា បង្គន់អនាម័យ ភ្ជាប់ប្រព័ន្ធភ្លើងអគ្គីសនី និងសមិទ្ធផលមួយចំនួនទៀត សម្រាប់សាលាវិទ្យាល័យ នៅក្នុងស្រុកសង្គមថ្មី ខេត្តព្រះវិហារ។
លោក គឹម ចាន់បញ្ញា បានថ្លែងផ្ដាំផ្ញើរដល់អាជ្ញាធរស្រុក ឃុំ កងកម្លាំងប្រដាប់អាវុធ និងអង្គការដៃគូរអភិវឌ្ឍន៍ទាំងអស់ សូមបន្តកិច្ចសហការឱ្យបានជិតស្និទ្ធក្នុងការជួយដោះស្រាយនូវបញ្ហាប្រឈមនានា និងឆ្លើយតបទៅនឹងតម្រូវការរបស់ប្រជាពលរដ្ឋនៅក្នុងមូលដ្ឋាន បន្តពង្រឹងកិច្ចសហប្រតិបត្តិការជាមួយគ្នា និងខិតខំស្វែងរក ការគាំទ្រ និងកៀរគរធនធានបន្ថែមពីប្រភពស្របច្បាប់នានា ក្នុងការចូលរួមលើកស្ទួយវិស័យអប់រំ ជាពិសេសគឺ ការអប់រំនៅកម្រិតមូលដ្ឋាន។
លោកបញ្ចាក់ទៀតថា អាជ្ញាធរត្រូវបន្តសហការជាមួយមន្ទីរអប់រំ យុវជន និងកីឡា និងអាជ្ញាធរឃុំ ក្នុងការត្រួតពិនិត្យនៅតាមសាលារៀន ដើម្បីស្វែងរកចំណុចខ្វះខាត បញ្ហាប្រឈមនានា និងរកដំណោះស្រាយឱ្យបានទាន់ពេលវេលា ជាពិសេសគឺរាយការណ៍មករដ្ឋបាលខេត្ត នៅពេលមានបញ្ហា ឬតម្រូវការណាដែលមិនអាចដោះស្រាយបាន៕ដោយ៖ភ្នំដែក
