ខេត្តសៀមរាប៖អាជ្ញាធរខេត្តសៀមរាប បានឲ្យដឹងនៅរសៀលថ្ងៃទី១៤ខែកុម្ភៈឆ្នាំ២០២៥នេះថា ករណីស្មៅងាប់ នៅតាមទ្រូវផ្លូវនិងតាមសួនច្បារមួយចំនួនក្នុងក្រុងសៀមរាប ក្រុមការងារជំនាញកំពុងរៀបចំតប្រព័ន្ធទឹកយកមកស្រោចស្រពសួនច្បារនៅក្នុងក្រុងសៀមរាប ឲ្យមានភាពស្រស់បំព្រងឡើងវិញ ព្រោះរដូវប្រាំងស្មៅមួយចំនួនមិនអាចធន់នឹងកំដៅថ្ងៃបានទេ។
សូមជ្រាបផងដែរថា នៅព្រឹកថ្ងៃទី១៤ខែកុម្ភៈឆ្នាំ២០២៥ ព្រះតេជគុណ គូ សុភាព ព្រះអង្គបានលើកឡើងតាមបណ្តាញសង្គមហ្វេសបុកថា «ថ្ងៃមុន អាត្មាទៅសៀមរាប ឃើញភ្ញៀវទេសចរច្រើន តែផ្កានិងស្មៅខ្លះក្នុងក្រុង ក្រៀមឬងាប់។ ស្នើញោមអាជ្ញាធរ និងញោមអ្នកខេត្តសៀមរាបជួយស្រោចស្មៅផង ដើម្បីសោភណភាព សមជាទីក្រុងទេសចរដ៏ពិសិដ្ឋរបស់កម្ពុជា»។ ក្រោយការបង្ហោះនេះ សាធារណជនដែលនិយមលេងបណ្តាញសង្គមហ្វេសប៊ុក បានដាក់បន្ទុក និងរិះគន់អាជ្ញាធរខេត្តសៀមរាប ថាខ្វះការយកចិត្តទុកដាក់ ទើបបណ្តាលឱ្យស្មៅ និងកូនឈើជាច្រើនងាប់ជាបន្តបន្ទាប់។
ពាក់ព័ន្ធនិងករណីនេះដែរ លោក ហាយ យ៉ង់ អភិបាលរងក្រុងសៀមរាប បានឲ្យដឹងតាមទូរស័ព្ទថា លោកបានឃើញការបង្ហោះហ្វេសបុករបស់ព្រះអង្គគូ សុភាព ហើយ លោកថា អាជ្ញាធរសូមថ្លែងអំណរគុណចំពោះការរិះគន់ដើម្បីស្ថាបនា។លោកបន្តថា ចំពោះរឿងស្មៅងាប់តាមផ្លូវនេះមន្ត្រីជំនាញនៃខេត្តសៀមរាប បានធ្វើការងារនេះតាំងពីយូរមកម្លេះ ហើយបច្ចុប្បន្នក៏កំពុងរៀបចំតប្រព័ន្ធទឹក ដើម្បីយកមកស្រោចស្រពស្មៅ ក៏ដូចជាសួនច្បារនានាក្នុងក្រុងសៀមរាប អោយមានសោភណ្ឌភាពល្អ ទាក់ទាញភ្ញៀវទេសចរ។លោកបន្ថែមថា នៅតាមសួនច្បារខ្លះអ្នកជំនាញកំពុងកាយយកស្មៅដែលងាប់នោះចេញដើម្បីដាក់ជីរួចដាំថ្មីឡើងវិញ។
ជុំវិញករណីនេះដែរ លោកលី វណ្ណៈ នាយករដ្ឋបាលខេត្តសៀមរាប ក៏បានលើកឡើងថា ក្រុមការងារកំពុងរៀបចំបណ្តាញបាញ់ទឹកឡើងវិញសួនទ្រូងផ្លូវ នៅតាមផ្លូវជាតិលេខ៦ ស្ថិតក្នុងក្រុងសៀមរាប ដោយសារបណ្តាញចាស់ខូច។ ក្រុមការងាររៀបចំឱ្យរួចរាល់មុនអង្គរសង្គ្រាន្ត។លោកបន្ថែមថា មិនបានតាមការសារស្នើរបស់ភាគីខាងណានោះទេបង កិច្ចការងារយើងធ្វើរាល់ថ្ងៃ ដោយរដូវជារដូវប្រាំង ស្មៅមួយចំនួនមិនអាចធន់កំដៅខ្លាំងបាន។
ចំណែក លោក គី វីរិន្ទ ប្រធានមន្ទីរសាធារណការនិងដឹកជញ្ជូនខេត្តសៀមរាប អ្នកយកព័ត៌មាន មិនអាចសុំការពន្យល់បានទេនៅរសៀលថ្ងៃទី១៤ខែកុម្ភៈឆ្នាំ២០២៥នេះដោយខលទៅទូរស័ព្ទ លោកជាប់រវល់៕ដោយ៖ស្រីម៉ៅ
