Friday, April 4, 2025
Header Banner

អធិការនគរបាលស្រុកសូទ្រនិគម៖ជនមិនស្គាល់អត្តសញ្ញាណ បានបើករថយន្ដម៉ាកHi Lander ទៅបុកដើមឈើបណ្តាលឲ្យឆេះអស់ទាំងស្រុងនោះ មិនមានការស្លាប់រឺរបួសក្នុងករណីនោះទេ

ខេត្តសៀមរាប៖សមត្ថកិច្ចបានឲ្យដឹងថា នៅវេលាម៉ោង១៩និង០០នាទី ថ្ងៃទី១៧ ខែកុម្ភៈ ឆ្នាំ២០២៥ ស្ថិតក្នុងភូមិត្រពាំងប្រិយ៍ ឃុំពពេល ស្រុកសូទ្រនិគម ខេត្តសៀមរាប មានករណីជនមិនស្គាល់អត្តសញ្ញាណ បានបើករថយន្ដម៉ាកHi Lander ទៅបុកដើមឈើបណ្តាលឲ្យឆាបឆេះរថយន្តអស់ទាំងស្រុង រួចបើកទ្វារឡានគេចខ្លួនបាត់​ ហើយពេលនេះសមត្ថកិច្ចកំពុងស្រាវជ្រាវរកម្ចាស់រថយន្តផងដែរ។

  លោកវរសេនីយ៍ឯក ឃឹម ផល្លា អធិការនគរបាលស្រុកសូទ្រនិគម បានឲ្យដឹងនៅព្រឹកថ្ងៃទី១៨ខែកុម្ភៈ ឆ្នាំ២០២៥នេះថា បន្ទាប់ពីបានទទួលសេចក្ដីរាយការណ៍ពីប្រជាពលរដ្ឋថាមានករណីគ្រោះថ្នាក់ចរាចរណ៍ ឡានបុកដើមឈើបង្កអោយភ្លើងឆេះរថយន្ដម៉ាកHi Lander ០១គ្រឿង នៅចំណុចនៅភូមិឃុំខាងលើ។ ភ្លាមៗនោះលោកបានដឹកនាំក្រុមការងារនគរបាលសង្រោះ ចេញរថយន្តអគ្គិភ័យទៅជួយអន្តរាគមន៍ពន្លត់ ដោយប្រើប្រាស់រថយន្តពន្លត់អគ្គិភ័យចំនួន០១គ្រឿង។លោកបន្តថា ករណីខាងលើនេះត្រូវបានពន្លត់ជោគជ័យជាស្ថាពរ នៅវេលាម៉ោង១៩និង៥៧នាទីថ្ងៃដដែល។

  លោកបញ្ជាក់ថា តាមរយៈកិច្ចសហការក្រុមការងារជំនាញពិនិត្យវិភាគកន្លែងកើតហេតុ សន្និដ្ឋានថាជាករណីគ្រោះថ្នាក់ចរាចរណ៍បុកដើមឈើបណ្ដាលអោយឆាបឆេះ ហើយករណីខាងលើនេះមិនមានមនុស្សនៅក្នុងឡានពេលឆាបឆេះ រឺបណ្តាលឲ្យប៉ះពាល់ដល់អាយុជីវិតប្រជាពលរដ្ឋក្បែរកន្លែងកើតហេតុនោះទេ។ ដោយឡែក ក្រុមការងារក៏កំពុងបន្តស្រាវជ្រាវស្វែករកម្ចាស់កម្មសិទ្ធិរថយន្តផងដែរ។

 លោកបញ្ជាក់ទៀតថា ករណីគ្រោះថ្នាក់នេះត្រូវបានអ្នកលេងហ្វេសបុកមួយចំនួនបង្ហោះថា មានមនុស្សស្លាប់ក្នុងហេតុការណ៍នេះ។លោកថា សមត្ថកិច្ចបានធ្វើកោសល្យវិច័យយ៉ាងច្បាប់លាស់ ថាមិនមានមនុស្សស្លាប់រឺក៏របួសក្នុងហេតុការណ៍នោះទេ សូមកុំយល់ច្រលំ និងចែកចាយបន្តតទៅទៀត៕ដោយ៖រាជសី

ផ្សាយពាណិជ្ជកម្ម
Header Banner
ផ្សាយពាណិជ្ជកម្ម
Header Banner

ព័ត៌មានពេញនិយម