ខេត្តសៀមរាប ៖របាយការណ៍របស់ស្នងការដ្ឋាននគរបាលខេត្តសៀមរាបបានឲ្យដឹងថា ដោយបានការយកចិត្តទុកដាក់ក៏ដូចជាផ្តល់ភាពកក់ក្តៅដល់មន្រ្តីក្រោមឱវាទ នៅព្រឹកថ្ងៃទី២៨ ខែកុម្ភៈ ឆ្នាំ២០២៥ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានអញ្ជើញដឹកនាំមន្រ្តីក្រោមឱវាទ ចុះសួរសុខទុក្ខ លោកវរសេនីយ៍ត្រី តាន់ ប៊ុនធន់ នាយប៉ុស្តិ៍នគរបាលរដ្ឋបាលល្វា នៃអធិការដ្ឋាននគរបាលស្រុកពួក ចំពោះការបាត់បង់នូវគេហដ្ឋាន ដោយសារអគ្គិភ័យឆាបឆេះ។
ក្នុងឱកាសនោះដែល លោកឧត្តមសេនីយ៍ទោ ស្នងការ ក៏បាននាំយកនូវប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និង ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងបាននាំយកថវិកា របស់ថ្នាក់ដឹកនាំ និងថរិកា របស់ស្នងការដ្ឋាននគរបាលខេត្តសៀមរាប សរុបចំនួន ៨,៤៨០,០០០៛ (ប្រាំបីលានសែសិបប្រាំបីមុឺនរៀល) និងថវិកាដែលបានមកពីការចូលរួមរបស់មន្រ្តី នៃអធិការដ្ឋាននគរបាលស្រុកពួក សរុបចំនួន ៣,៥០០,០០០៛ (បីលានប្រាំសែនរៀល) រួមទាំងគ្រឿងឧបភោគបរិភោគមួយចំនួន ប្រគល់ជូនជាអំណោយក្នុងការចែករំលែកសម្រាលបន្ទុកគ្រួសារ លោកវរសេនីយ៍ត្រី តាន់ ប៊ុនធន់ ផងដែរ។
សូមបញ្ជាក់ផងដែលថានៅយប់ថ្ងៃទី២៦ ខែកុម្ភៈ ឆ្នាំ២០២៥ វេលាម៉ោង២៣និង៣០នាទី មានករណីអគ្គិភ័យមួយកើតឡើង បណ្តាលឲ្យឆេះផ្ទះមួយខ្នង ដែលស្ថិតនៅភូមិតាទក ឃុំពួក ស្រុកពួក ខេត្តសៀមរាប ករណីអគ្គិភ័យនេះបានបណ្តាលឲ្យខូចខាតផ្ទះដែលសាងសង់ពីឈើលើបន្ទប់ថ្មក្រោម ដំបូលប្រក់ក្បឿង និងសំយាបសង្ក័សី ដែលមានទំហំ ៩ម៉ែត្រx១២ម៉ែត្រ ត្រូវបានអគិ្គភ័យឆាបឆេះខូចខាតទាំងស្រុង៕ដោយ៖ Angkor flash (ប្រភពពី៖ ស្នងការដ្ឋាននគរបាលខេត្តសៀមរាប)
