Thursday, April 3, 2025
Header Banner

ភ្លើងគំនុំក្នុងវង់ផឹកស៊ី បុរសម្នាក់បានទាញកាំភ្លើងឆ្នុក លបបាញ់ជនរងគ្រោះបណ្តាលឲ្យស្លាប់នៅលើភ្នំគូលែន,ត្រូវអាវុធហត្ថខេត្តសៀមរាប ឃាត់ខ្លួនបានហើយ

ខេត្តសៀមរាប៖ផ្តើមចេញពីទំនាស់ក្នុងវង់ផឹកស៊ី បុរសម្នាក់បានទាញកាំភ្លើងឆ្នុក លបបាញ់ជនរងគ្រោះចំក្រោមស្លាបប្រចៀវខាងឆ្វេង ធ្លុះទៅដើមដោះខាងឆ្វេង បណ្តាលឲ្យរបួសធ្ងន់ ហើយបានស្លាប់ខណៈបញ្ជូនដល់មន្ទីរពេទ្យ។ហើយជនដៃដល់បានព្យាយាមរត់គេចខ្លួនក៏ត្រូវកម្លាំងអាវុធហត្ថខេត្តសៀមរាប ដេញតាមឃាត់ខ្លួនបាននៅស្រុកសូទ្រនិគម។

   សមត្ថកិច្ចបានឲ្យដឹងថា នៅវេលាម៉ោង២០ និង៣០នាទី ថ្ងៃទី០៤ ខែមីនា ឆ្នាំ២០២៥ ឈ្មោះ លឹម វ៉ាន់ បានផឹកស្រារាំលេងជាមួយឈ្មោះ ភឿន ផិត ភេទប្រុស អាយុ ៥២ឆ្នាំ ដោយឈ្មោះ លឹម វ៉ាន់ បានយកដៃវាយត្រូវចំពងស្វាស(ពងក្ត) របស់ឈ្មោះ ភឿន ផិត មួយទំហឹង ធ្វើឱ្យឈ្មោះ ភឿន ផិត ឈឺ ហើយមានកំហឹងក៏បានយកកៅអីជ័រដែលនៅក្បែរដៃ វាយទៅលើឈ្មោះ លឹម វ៉ាន់ វិញ បណ្តាលឱ្យបែកក្បាល។ បន្ទាប់មកឈ្មោះ លឹម វ៉ាន់ បានដើរចេញទៅបាត់ លុះដល់វេលាម៉ោង២១ និង០៥នាទីថ្ងៃដដែលឈ្មោះឌុក ឌឿម (ជនរងគ្រោះ) បាននាំគ្នាផឹកនៅផ្ទះរបស់ឈ្មោះសួន ចន្ទ ក្នុងភូមិថ្មជ្រួញ ឃុំខ្នងភ្នំ ស្រុកស្វាយលើ ខេត្តសៀមរាប ស្រាប់តែឈ្មោះ លឹម វ៉ាន់ មិនដឹងថាដើមកពីណាហើយបានធ្វើសកម្មភាពប្រើកាំភ្លើងឆ្នុក លបបាញ់ឈ្មោះ ឌុក ឌឿម ចំនួន ០១គ្រាប់ ត្រូវចំក្រោមស្លាបប្រចៀវខាងឆ្វេង ធ្លុះទៅដើមដោះខាងឆ្វេង ហើយឈ្មោះ លឹម វ៉ាន់ បានកាន់អាវុធខាងលើ រត់គេចខ្លួនទៅទិសខាងជើងឈៀងខាងលិចបាត់ទៅ។

     ចំណែកឈ្មោះ ឌុក ឌឿម ត្រូវបានបញ្ជូនទៅសង្គ្រោះភ្លាមៗនៅមណ្ឌលសុខភាពអន្លង់ធំ ប៉ុន្តែឈ្មោះ ឌុក ឌឿម បានស្លាប់បាត់បង់ជីវិតទៅហើយ។ក្រោយពីទទួលបានព័ត៌មានភ្លាម សមត្ថកិច្ចមូលដ្ឋានបានចុះដល់កន្លែងកើតហេតុ និងបានស្រាវជ្រាវស្វែងរកជនបង្កខាងលើ។

    ជនសង្ស័យខាងលើ ត្រូវបានកម្លាំងអាវុធហត្ថស្រុកស្វាយលើ និងកម្លាំងអាវុធហត្ថខេត្តសៀមរាប ឃាត់ខ្លួននៅថ្ងៃដដែល ខណៈពេលជនសង្ស័យព្យាយាមចុះពីលើភ្នំ បម្រុងរត់គេចខ្លួន នៅចំណុចដូនអិន ភូមិគោលថ្មី ឃុំពពេល ស្រុកសូទ្រនិគម ខេត្តសៀមរាប។

    បច្ចុប្បន្នជនសង្ស័យខាងលើ ត្រូវបានកម្លាំងអាវុធហត្ថខេត្តសៀមរាប រៀបចំសំណុំរឿងបញ្ជូនទៅតុលាការ ដើម្បីចាត់ការបន្តតាមច្បាប់៕AFN

ផ្សាយពាណិជ្ជកម្ម
Header Banner
ផ្សាយពាណិជ្ជកម្ម
Header Banner

ព័ត៌មានពេញនិយម