ខេត្តព្រះវិហារ៖ក្រុមក្មេងទំនើង១ក្រុមមានគ្នា៥នាក់ ប្រដាប់ដោយដាវ,កាំបិត,ពូថៅនិងចំពាមកៅស៊ូគ្រប់ដៃ បានធ្វើសកម្មភាពជិះម៉ូតូស្វែងរកភាគីម្ខាងដែលមានទំនាស់និងគ្នាកាលពីមុនដើម្បីជំរះបញ្ជីចាស់ តែត្រូវបាន កម្លាំងនគរបាលស្រុករវៀង ធ្វើការល្បាតហើយបានប្រទះឃើញក៏ឃាត់ខ្លួនយកមកសួរនាំ។
លោកវរសេនីយ៍ឯក គង់ គា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋានៃខេត្តព្រះវិហារ បានឲ្យដឹងថា ការចុះបង្ក្រាបក្រុមក្មេងទំនើងទាំងនេះធ្វើឡើងនៅវេលាម៉ោង២១និង៣០នាទីថ្ងៃទី២១ខែមីនាឆ្នាំ២០២៥ នៅឃុំរហ័ស ស្រុករវៀង ខេត្តព្រះវិហារ ក្រោមការបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត ស្តីពីការរក្សាសន្តិសុខសណ្តាប់ធ្នាប់ជូនប្រជាពលរដ្ឋ ពិសេត្រូវចាត់វិធានការដ៏តឹងរឹងបំផុតចំពោះក្រុមក្មេងទំនើង ត្រូវមានវិធានការបង្កានិងបង្ក្រាបអោយបានជាដាច់ខាត គឺមិនអោយមានលើទឹកដីខេត្តព្រះវិហារឡើយ។ លោកបន្តថា តាមចម្លើយសារភាពរបស់ជនសង្ស័យទាំង៥នាក់ខាងលើ គឺពួកគេបាននាំគ្នាកាន់ កាំបិត,ពូថៅ,គ្រប់ដៃគឺដើម្បីទៅសងសឹកគូរទំនាស់ដែលបានប៉ះពាល់គ្នាកាលពីពេលកន្លងទៅភូមិសាស្ត្រខាងលើ។ប៉ុន្តែមិនទាន់បានសងសឹកផងក៏ត្រូវកម្លាំងនគរបាលមូលដ្ឋាននៃស្រុករវៀង ឃាត់ខ្លួនបានតែម្ដង។ចំពោះវត្ថុតាងដកហូតបានរួមមាន ម៉ូតូចំនួន២គ្រឿង.ដាវចំនួន៣ដើម.ពូថៅចំនួន១.កាំបិតផ្គាក់ចំនួន១និងចំពាមកៅស៊ូចំនួន៣។
ក្នុងករណីនេះដែរលោកវរសេនីយ៍ឯក គង់ គា នាយការិយាល័យព្រហ្មទណ្ឌិតស្រាលនៃស្នងការដ្ឋាននគរបាលខេត្តព្រះវិហារបានធ្វើការសំណូមពរដល់ក្រុមយុវជនដែលជាទំពាំងស្នងឬស្សីទាំងអស់ត្រូវប្រឹងប្រែងរៀនសូត្រ និងធ្វើកិច្ចការងារណាល្អៗដែលស្របច្បាប់ ហើយសូមកុំធ្វើអំពើដែលខុសច្បាប់នាំឲ្យសង្គមស្អប់ខ្ពើម និងធ្វើឱ្យឪពុកម្ដាយពិបាកចិត្ត។ បច្ចុប្បន្នជនសង្ស័យទាំង៥នាក់ ត្រូវបានឃាត់ខ្លួននៅស្នងការដ្ឋាននគរបាលខេត្តព្រះវិហារ ហើយការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿងតាមនិតិវិធីដើម្បីបញ្ជូនទៅតុលាការ ចាត់ការតាមផ្លូវច្បាប់៕ដោយ៖នី រីថា
