ខេត្តព្រះវិហារ៖សោកស្តាយណាស់ និងចូលរួមរំលែកទុក្ខដល់គ្រួសារសព បុរសម្នាក់ស៊ីឈ្នួលបើកត្រាក់ទ័រភ្ជួរដីចំការស្វាយចន្ទី ជាន់ចំមីនតោន ផ្ទុះក្រឡាប់ត្រាក់ទ័រ បណ្តាលឱ្យរងរបួសធ្ងន់ទៀតហើយ ត្រូវបានសមត្ថកិច្ចបញ្ជូនទៅមន្ទីរពេទ្យបង្អែក១៦មករា និងបានស្លាប់តាមផ្លូវខណៈបញ្ជូនទៅមន្ទីរពេទ្យភ្នំពេញ។សូមជម្រាបថា ហេតុការណ៍នេះកើតឡើងនៅវេលាម៉ោង១៥និង៣០នាទីថ្ងៃទី២៩ខែមីនាឆ្នាំ២០២៥ស្ថិតនៅភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។
សមត្ថកិច្ចស្រុកជាំក្សាន្ត បានឲ្យដឹងថា មានករណីគ្រោះថ្នាក់ដោយសាគ្រាប់យុទ្ធភ័ណ្ឌមិនទាន់ផ្ទុះមួយលើកនៅចំណុចដីចម្ការចន្ទី ចាន់ ផល្លី ហើយជនរងគ្រោះមានឈ្មោះ វន វុន ភេទប្រុស អាយុ៣២ឆ្នាំ មុខរបរកសិករ រស់នៅភូមិចារ្យ ឃុំកន្ទួត ស្រុកជាំក្សាន្ត ខេត្តព្រះវិហារ បើកត្រាក់ទ័រម៉ាកគូបូតាពណ៌ក្រហមស៊ីឈ្នួលជួលដីក្នុងចំការចន្ទី បានផ្ទុះមីនតោនបណ្ដាលឱ្យរងរបួសធ្ងន់ ត្រូវបានបញ្ជូនទៅពេទ្យខេត្ត១៦មករា ហើយបានស្លាប់តាមផ្លូវខណៈបញ្ជូនទៅព្យាបាលនៅទីក្រុងភ្នំពេញ ។
អាជ្ញាធរជំនាញ បានបន្តអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់ លាស់ និងត្រូវសាកសួរអាជ្ញាធរមូលដ្ឋាននិងសមត្ថកិច្ចជំនាញ មុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល៕ដោយ៖ព្រះវិហារ
