ខេត្តបាត់ដំបង៖នាប៉ុន្មានខែចុងក្រោយនេះ កិច្ចប្រតិបត្តិការល្បាតតាមព្រំដែន របស់កម្លាំងវីរៈសេនាតូចនគរបាលការពារព្រំដែនគោកលេខ ៨២៣ ដែលឈរជើងទិសសំឡូត បានបន្តធ្វើការពង្រឹងតាមខ្សែបន្ទាត់ព្រំដែនកម្ពុជា-ថៃ យ៉ាងសកម្មដើម្បីការពារបទល្មើសឆ្លងដែនខុសច្បាប់គ្រប់ប្រភេទ ពិសេសការពារបូរណភាពទឹកដីមិនឲ្យប្រទេសណាមួយឈ្លានពានមួយមីលី្លម៉ែត្រឡើយ។
ដោយគោរពតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង ដែលបានបញ្ជាឲ្យកម្លាំងក្រោមឱវាទទាំងអស់បង្កើននូវការប្រុងប្រយ័ត្ន ពិសេសគឺនៅតាមខ្សែក្រវ៉ាត់បន្ទាត់ព្រំដែន កម្ពុជា-ថៃ ដើម្បីទប់ស្កាត់ឲ្យបានរាល់បទល្មើសឆ្លងដែនគ្រប់ប្រភេទ នឹងគ្នាឲ្យបាននូវសុខសន្តិភាព ជូនប្រជាពលរដ្ឋ ទើបលោក វរសេនីយ៍ឯក សូត្រ សំអុល មេបញ្ជាការវរសេនាតូច នគរបាលការពារព្រំដែនគោកលេខ ៨២៣ ប្រចាំទិសសំឡូត បានបញ្ជាទៅកម្លាំងក្រោមឱវាទ និងបែងចែកកម្លាំងធ្វើការយាមកាមនិងល្បាត ទាំងយប់ទាំងថ្ងៃតាមបណ្ដោយខ្សែបន្ទាត់ដែលខ្លួនគ្រប់គ្រង។
លោកមេបញ្ជាការបានលើកឡើងថា ភូមិសាស្ត្ររបស់ស្រុកសំឡូតគឺមានភាពទូលំទូលាយ ដោយលោកត្រូវបានបែងចែកកម្លាំងយ៉ាងច្បាស់លាស់ក្នុងការការពារបូរណភាពទឹកដី បើទោះបីជាថ្មីៗនេះមានការរង្គោះរង្គើនៅតំបន់ប្រាសាទតាមាន់ធំ បន្តិចបន្តួច និងស្ថិតក្នុងកាលៈទេសៈណាក៏ដោយក៏លោកនិងកងកម្លាំងក្រោមឱវាទទាំងអស់មិនអនុញ្ញាតឱ្យប្រទេសណាមួយឃ្លានពានទឹកដីកម្ពុជាមួយមីលី្លម៉ែត្រឡើយ។
លោកវរសេនីយ៍ឯក សូត្រ សំអុល បានសង្កត់ធ្ងន់ថា ភូមិសាស្ត្រដែលកម្លាំងរបស់លោកគ្រប់គ្រងគឺចាប់តាំងពីខ្សែបន្ទាត់ព្រំដែនជាប់និងខេត្តពោធិ៍សាត់ ជាប់នឹងខេត្តប៉ៃលិន និង ជាប់នឹងប្រទេសថៃ ដោយភូមិសាស្រ្តខ្លះមានសភាពស្មុគស្មាញ ប៉ុន្តែទោះបីជាយ៉ាងណាក៏ដោយក៏ការពង្រឹងកម្លាំង ដើម្បីការពារសុខសុវត្ថិភាពជូនប្រជាពលរដ្ឋនៅតែមានក្នុងអារម្មណ៍របស់លោកជានិច្ច ដោយធ្វើយ៉ាងណាឲ្យប្រទេសមានសុខសន្តិភាព តាមនយោបាយឈ្នះឈ្នះ របស់សម្ដេច ហ៊ុន សែន ប្រធានព្រឹទ្ធសភា ដែលសម្ដេចបានត្រួសត្រាយផ្លូវតាំងពីសម័យសង្គ្រាម រហូតដល់បច្ចុប្បន្នដែលធ្វើឲ្យប្រជាពលរដ្ឋមានសុខសន្តិភាពដូចសព្វថ្ងៃនេះ ៕ ដោយ៖សហការី
