ខេត្តសៀមរាប៖រូបតុក្កតាយក្សចំនួន ៨ប្រភេទផ្សេងគ្នា នឹងត្រូវបានចេញរូបរាងជាថ្មី នាថ្ងៃទី២១ ខែកុម្ភៈ ឆ្នាំ២០២៦ខាងមុខនេះ ក្នុងព្រឹត្តិការណ៍ដង្ហែតុក្កតាយក្ស ក្រោមប្រធានបទ “សត្វព្រៃកម្ពុជា” ដែលមានកុមារជាង ៦០០នាក់ មកចូលរួមដំឡើង តុបតែង ក្នុងគោលបំណងទាក់ទាញទេសចរ ចូលរួមលើកស្ទួយនូវវិស័យសិល្បៈសូន្យរូប វប្បធម៌ បរិស្ថាន និងធម្មជាតិ ជាពិសេសជួយដល់កុមារ ឱ្យចេះធ្វើការជាក្រុម ឱ្យពួកគេយល់កាន់តែច្បាស់ពីតម្លៃសិល្បៈវប្បធម៌ និងបរិស្ថានទូទៅជុំវិញខ្លួនជាដើម។
លោក អ៊ុន សាវ៉ាន់ អ្នកចាត់ការទូទៅ ក្នុងគម្រោងព្រឹត្តិការណ៍យក្ស បានឲ្យដឹងថា ព្រឹត្តិការណ៍ដង្ហែតុក្កតាយក្សនេះ ត្រូវបានចាត់ទុកជាព្រឹត្តិការណ៍សិល្បៈកុមារធំជាងគេនៅអាស៊ីអាគ្នេយ៍ ដែលត្រូវបានបង្កដំឡើងដោយក្មេងៗរាប់រយនាក់ ដែលទទួលបានការសាទរយ៉ាងខ្លាំងពីភ្ញៀវទេសចរជាតិ និងអន្តរជាតិ ខណៈវត្ថុធាតុដើមចំបងមួយចំនួន ដូចជាវល្លិរពាក់ ត្រូវបានបញ្ជាទិញពីអ្នកស្រុកភូមិ ដែលបានជួយបង្កើនប្រាក់ចំណូលជូនពួកគាត់បានមួយផ្នែកផងដែរ។
លោក អ៊ុន សាវ៉ាន់ បានបន្តថា គម្រោងតុក្កតាយក្សពិតជាមានសារៈសំខាន់ ដើម្បីលើកស្ទួយវិស័យទេសចរណ៍ សិល្បៈវប្បធម៌ខ្មែរ អនាម័យ បរិស្ថាន និងធម្មជាតិ ជាពិសេសជួយឱ្យកុមារបានយល់ដឹង និងបង្ហាញពីសាមគ្គីភាពរបស់កុមារក្នុងការប្ដេជ្ញាចិត្តធ្វើកិច្ចអ្វីមួយឱ្យសម្រេចជោគជ័យ ដោយហេតុថា គម្រោងតុក្កតាយក្ស ក្រៅពីការដំឡើងដោយក្រុមសិល្បករស្ម័គ្រចិត្ត ជារៀងរាល់ឆ្នាំក៏មានកុមាររាប់រយនាក់មកពីសាលារៀនរដ្ឋ ឯកជន និងអង្គការក្រៅរដ្ឋាភិបាលបានច្រើនដំឡើងយ៉ាងច្រើនកុះករ។
គួររម្លឹកផងដែរថា នៅឆ្នាំ២០២៦នេះ គឺជាលើកទី១៦ ដែលព្រឹត្តិការណ៍ក្បួនដង្ហែតុក្កតាយក្ស ត្រូវបានរៀបចំឡើងក្នុងក្រុងសៀមរាប ហើយឆ្នាំនេះរៀបចំឡើង ដើម្បីអបអរសាទរសត្វព្រៃដ៏អស្ចារ្យ របស់កម្ពុជា ចាប់ពីប្រភេទសត្វល្បីៗ រហូតដល់សត្វកម្រ និងជិតផុតពូជ ខណៈរូបតុក្កតាយក្សនៅឆ្នាំនេះ ហាក់មានលក្ខណៈប្លែក និងធំជាងឆ្នាំមុនៗ ដោយក្រុមអ្នកសិល្បករ កំពុងមមាញឹកដំឡើងរូបតុក្កតាយក្ស តំណាងឱ្យសត្វចំនួន៨ សុទ្ធសឹងជាប្រភេទសត្វកម្រៗ ជិតផុតពូជ និងទើបរកឃើញថ្មីៗ ជាពិសេស សត្វព្រាបស តំណាងឱ្យសន្តិភាព ដែលសត្វព្រាបស នឹងជាក្បួនដង្ហែនាំមុខក្នុងព្រឹត្តិការណ៍ដង្ហែតុក្កតាយក្សនាពេលខាងមុខ៕ដោយ៖អង្គរផ្លាសញ៉ូ
