កណ្ដាល៖សេចក្តីរាយការណ៍បានឲ្យដឹងថា ភ្ញៀវកូនកំលោះ និងកូនក្រមុំ ឈ្លោះវាយតប់គ្នាបណ្តាលឲ្យរងរបួសរៀងៗខ្លួន ត្រូវបានកម្លាំងនគរបាលប៉ុស្តិ៍កំពង់សំណាញ់ ឃាត់ខ្លួនដើម្បីបន្តនីតិវិធី។
សមត្ថកិច្ចបានឲ្យដឹងថា កាលពីថ្ងៃទី១៧ ខែមករា ឆ្នាំ២០២១ វេលាម៉ោង២២នឹង០០នាទី នៅចំណុចក្នុងរោងការភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល មានកម្មវិធីរៀបមង្គលការមួយ ដោយមានភ្ញៀវទាំងសងខាង បានចូលរួមផឹកស៊ីរាំរែក សប្បាយគ្រប់គ្នា។ លុះផឹកស្រវឹងរៀងៗខ្លួន ក្រុមទាំង២បានឌឺដងដាក់គ្នា រហូតឈ្លោះប្រកែកគ្នា បានយកកៅអី ចាន កែវ ថូផ្កា គប់គ្នាទៅវិញទៅមក បណ្តាលឲ្យមានរបួសស្នាមរៀងៗខ្លួនតែម្តង។សមត្ថកិច្ចបន្ថែមថា ជនសង្ស័យ២ក្រុម៖ក្រុមទី១ មានគ្នា៤នាក់ ខាងកូនកំលោះ ទី១-ឈ្មោះ ម៉េត សុភីន ភេទប្រុស ជនជាតិខ្មែរ អាយុ២២ឆ្នាំ ទីលំនៅភូមិព្រែកក់ ឃុំព្រៃបាក់ ស្រុកស្ទឹងត្រង់ ខេត្តកំពង់ចាម មុខរបរកម្មករសំណង់ត្រូវជាកូនកំលោះ មានរបួសស្នាមបែកក្បាល (ឃាត់ខ្លួន)។ ទី២-ឈ្មោះ ម៉េត លាភ ភេទប្រុស ជនជាតិខ្មែរ អាយុ៣០ឆ្នាំ ទីលំនៅភូមិព្រែកក់ ឃុំព្រៃបាក់ ស្រុកស្ទឹងត្រង់ ខេត្តកំពង់ចាម មុខរបរកម្មករសំណង់ត្រូវជាពូរបស់កូនកំលោះ មានរបួសស្នាមបែកសៀតថ្កា (ឃាត់ខ្លួន)។ ទី៣-ឈ្មោះ ងួន សុភា ភេទប្រុស ជនជាតិខ្មែរ អាយុ២០ឆ្នាំ ទីលំនៅភូមិព្រែកក់ ឃុំព្រៃបាក់ ស្រុកស្ទឹងត្រង់ ខេត្តកំពង់ចាម មុខរបរកម្មករសំណង់ត្រូវជាភ្ញៀវខាងកូនកំលោះមានរបួសស្នាមបែកចិញ្ចើម (ឃាត់ខ្លួន)។ និងទី៤-ឈ្មោះ អេង រដ្ឋា ភេទប្រុស អាយុ២៩ឆ្នាំ ជនជាតិខ្មែរ ទីលំនៅភូមិខ្លាក្រហ៊ឹម ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង មុខរបរកម្មករសំណង់ត្រូវ ជាភ្ញៀវខាងកូនកំលោះមានរបួសស្នាមបែកក្បាល (ឃាត់ខ្លួន)។ក្រុមទី២មានគ្នា២នាក់ ខាងកូនក្រមុំ៖ ទី១-ឈ្មោះអេង មិនា ភេទប្រុស អាយុ២២ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរកម្មករសំណង់ត្រូវជាបងជីដូនមួយខាងកូនក្រមុំ មានរបួសស្នាមរយះត្រង់កខាងឆ្វេង (ឃាត់ខ្លួន)។ ទី២-ឈ្មោះ ផន តុលា ភេទប្រុស អាយុ២៤ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរកម្មករសំណង់ ត្រូវជាបងជីដូនមួយខាងកូនក្រមុំ មានរបួសស្នាមហើមត្រង់ភ្នែកខាងស្តាំ (ឃាត់ខ្លួន)។សម្ភារខូចខាតៈ បែកបាក់សម្ភារ កៅអី តុ ចាន កែវ ថូផ្កា៕ដោយ៖វត្តី
