ភ្នំពេញ៖ យ៉ាងហោចមនុស្សចំនួន៤នាក់ បានស្លាប់ និងមនុស្សម្នាក់ទៀតបានរងរបួសស្រាល នៅក្នុងហេតុការណ៍អគ្គិភ័យមួយដែលបានកើតឡើងនៅវេលាម៉ោង៤នឹង៣០នាទីទៀបភ្លឺ កាលពីថ្ងៃទី២៩ ខែមិថុនា ឆ្នាំ២០២១ ស្ថិតនៅចំណុចផ្ទះលេខ៤៤ និង៤៦ លើផ្លូវលេខ២០០ ក្រុម២ ភូមិ១ សង្កាត់បឹងរាំង ខណ្ឌដូនពេញ រាជធានីភ្នំពេញ។
ប្រភពពីសមត្ថកិច្ចបានឲ្យដឹងថា ក្នុងហេតុការណ៍នោះបណ្តាលឲ្យឆេះអស់ទាំងស្រុងផ្ទះជាន់ផ្ទាល់ដីខាងក្រោម ដែលមានទំហំ ៩ម៉ែត្រx ៣០ម៉ែត្រ និងខូចខាតសម្ភារៈផ្សេងៗ ១ចំនួនធំទៀតដូចជា៖ ឆេះរថយន្ត Ford Willdrak ពណ៌ខ្មៅ ពាក់ស្លាកលេខ ភ្នំពេញ 2BB-8233 ចំនួន១គ្រឿង, ឆេះរថយន្ត Luxus 330 ពណ៌ស ពាក់ស្លាក់លេខ ភ្នំពេញ2AL-1158 ចំនួន១គ្រឿង, ឆេះម៉ូតូសរុបចំនួន ៧គ្រឿង នឹងពុំបានឆេះរាលដាលដល់ផ្ទះអ្នកជិតខាងឡើយ។ សពជនរងគ្រោះដោយសារអគ្គីភ័យខាងលើ គឺជាមនុស្សប្រុសទាំង៤នាក់ (មិនទាន់ស្គាល់អត្តសញ្ញាណជនរងគ្រោះ)។ ចំណែក បុរស១នាក់ដែលរងរបួស្រាលមានឈ្មោះ ម៉ូច សីហា ភេទប្រុស អាយុ២៤ឆ្នាំ មុខរបរមន្រ្តីកិច្ចសន្យាអគ្គិភ័យ ។
សមត្ថកិច្ចបញ្ជាក់ថា ម្ចាស់ផ្ទះឈ្មោះ ហុង ពេជ្រហោះ ភេទប្រុស អាយុ៧១ឆាំ្ន ហើយមូលហេតុនៃអគ្គីភ័យខាងលើ សមត្ថកិច្ចកំពុងតែស្រាវជ្រាវ ៕ដោយ៖ ធានី
