ភ្នំពេញ៖សេចក្តីរាយការណ៍បានឲ្យដឹងថា កម្លាំងសមត្ថកិច្ចខណ្ឌទួលគោក នៅយប់ថ្ងៃទី ៥ ខែសីហា នេះបានចុះបង្ក្រាបភោជនីយដ្ឋាន «ផ្ទះផាតធី KTV» លួចបើកទទួលភ្ញៀវល្មើសបម្រាមរដ្ឋបាលរាជធានីភ្នំពេញ ស្ថិតនៅផ្លូវ ២៦១ ភូមិ៦ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។ការចុះបង្ក្រាបនេះ ឃាត់ខ្លួនមនុស្សប្រុស ស្រីចំនួន ១៣ នាក់ មានទាំងថៅកែហាងម្នាក់ យកសំណាក។
សមត្ថកិច្ចបានដឹងថា ក្រោយពីទទួលបានព័ត៌មានថា ទីតាំងខាងលើបានផ្គើនទៅនឹងបម្រាមរបស់រដ្ឋបាលរាជធានីភ្នំពេញ និងដោយមានការណែនាំពីលោក ឃួង ស្រេង អភិបាលរាជធានីភ្នំពេញនិងជាប្រធានគណៈបញ្ជាការឯកភាពរាជធានីភ្នំពេញ គណ:បញ្ជាការឯកភាពខណ្ឌទួលគោក បានចុះដល់ទីតាំងជាក់ស្តែងឃើញថា បានលួចបើកទទួលភ្ញៀវ ចូលហូប ដោយរៀបចំតុ កៅអី លក់ស្រាបៀរ មានបុគ្គលិកទទួលភ្ញៀវចំនួន ៨នាក់ស្រី៤នាក់ និងមានភ្ញៀវម្នាក់ប្រុស ចូលច្រៀង ខារ៉ាអូខេ មួយបន្ទប់ ដែលមានអ្នកបំរេី៣នាក់ ក្នុងនោះមេការស្រីម្នាក់ អ្នកកំដរស្រី ២នាក់។សមត្ថកិច្ចបន្តថា ក្នុងប្រតិបត្តការណ៍កម្លាំងមានសមត្ថកិច្ចឃាត់ខ្លួនមនុស្ស១៣នាក់ ស្រី ៧នាក់ ក្នុងនោះមាន អ្នកបំរើ៨នាក់ ស្រី៤នាក់ ភ្ញៀវ១ម្នាក់ប្រុស អ្នកកំដរ និងអ្នកបំរើក្នុងបន្ទប់ចំនួន៣នាក់រួមទាំងថៅកែ១ នាក់។អ្នកទាំង១៣នាក់ ត្រូវបញ្ជូនទៅអធិការនគរបាលខណ្ឌ ដើម្បីចាត់ចែងតាមច្បាប់។យ៉ាងនេះក្តី មុនពេលប្រមូលយកអ្នកទាំងអស់ទៅអធិការខណ្ឌ ក៏បានយកសំណាកជាមុន ជាលទ្ធផលអវិជ្ជមានទាំង១៣តែម្តង៕ដោយ៖ភក្តី
