ខេត្តសៀមរាប៖ពិធីបិទវគ្គបណ្តុះបណ្តាល និងចែកវិញ្ញាបនបត្រសម្រាប់គម្រោងវគ្គបណ្តុះបណ្តាល រយៈពេលខ្លី ពង្រឹងជំនាញដែលមានស្រាប់នូវជំនាញទេសចរណ៍ និងបដិសណ្ឋារកិច្ច សម្រាប់បុគ្គលិក កំពុងបំពេញការងារនៅខេត្តសៀមរាប ចំនួន១២០០នាក់ ដែលបានបញ្ចប់ដោយជោគជ័យ លើជំនាញ ទីភ្នាក់ងារទេសចរណ៍ ជំនាញមគ្គុទ្ទេសក៏ទេសចរណ៍ និងជំនាញសណ្ឋាគារ។
ពិធីនេះធ្វើឡើងនៅរសៀលថ្ងៃទី២៨ខែតុលាឆ្នាំ២០២២ក្រោមអធិបតីភាពឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍,លោក យុន លីណេ អភិបាលរងខេត្តសៀមរាប,លោកជំទាវ ឆាយស៊ីវលីន ប្រធានសមាគមន៏ទេសចរណ៍កម្ពុជា និងអស់លោក-លោកស្រី ភ្ញៀវកិត្តិយសមកពីស្ថាប័នជាច្រើនចូលរួមផងដែរ។
បន្ទាប់ពីលោកជំទាវ ឆាយស៊ីវលីន ប្រធានសមាគមន៏ទេសចរណ៍កម្ពុជាបានឡើងមានប្រសាសន៍ស្វាគមន៍និងថ្លែងអំណរគុណដល់ថ្នាក់នាំនឹងអស់លោក លោកស្រីដែលបានចូលរួមក្នុងតពិធីនេះរួចមក។
លោក យុន លីណេ អភិបាលរងខេត្តសៀមរាប តំណាងឯកឧត្តមទៀ សីហា អភិបាលខេត្តសៀមរាប បានមានប្រសាសន៍ថា ក្នុងនាមអាជ្ញាធរខេត្តសៀមរាប លោកសំដែងនូវសេចក្តីរីករាយយ៉ាងខ្លាំងដែលសមាគមទេសចរណ៍កម្ពុជាបានរៀបចំវគ្គបណ្ដុះបណ្ដាលវិជ្ជាជីវៈនេះឡើងដល់អ្នកជំនាញសេវាកម្មទេសចរណ៍ក្នុងរយៈពេល២ខែដើម្បីពង្រឹងសមត្ថភាពបន្ថែមក្នុងការបម្រើនៅក្នុងវិស័យទេសចរណ៍នៅខេត្តសៀមរាបដោយជោគជ័យ។លោកបន្ថែមថា អាជ្ញាធរខេត្តសង្ឃឹមថា បងប្អូនសិក្ខាការដែលបានបញ្ចប់វគ្គសិក្សានេះនឹងយកចំណេះដឹងដែលទទួលបានទៅបម្រើការងារសេវាកម្មទេសចររបស់យើងឲ្យបានកាន់តែមានប្រសិទ្ធភាពដើម្បីចូលរួមអភិវឌ្ឍន៍វិស័យទេសចរណ៍និងបដិសណ្ឋារកិច្ចខេត្តសៀមរាបឲ្យកាន់តែមាននិរន្តរភាពនិងបង្កើនចំណូលដល់សេដ្ឋកិច្ចគ្រួសារក៏ដូចជាសេដ្ឋកិច្ចជាតិផងដែរ។
ឯកឧត្តមប៉ាក់ សុខុម រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា សូមកោតសរសើរយ៉ាងស្មោះអស់ពីដួងចិត្ត និងសំដែង អំណរគុណយ៉ាងជ្រាលជ្រៅចំពោះ រដ្ឋបាលខេត្តសៀមរាប មន្ទីរទេសចរណ៍ខេត្តសៀមរាប សមាគមទេសចរណ៍កម្ពុជា ដែលមាន លោកជំទាវ ឆាយ ស៊ីវលីន ជាប្រធាន និងភាគីពាក់ព័ន្ធទាំងអស់ ដែលបាន សហការ សម្របសម្រួល គាំទ្រ និងជំរុញឲ្យមានសកម្មភាពទេសចរណ៍នៅក្នុងគោលដៅទេសចរណ៍ បេតិកភណ្ឌ វប្បធម៌ និងធម្មជាតិ សៀមរាប-អង្គរ ជាពិសេសបានសហការរៀបចំឲ្យមានវគ្គបណ្តុះបណ្តាល ពង្រឹងសមត្ថភាពអ្នកបម្រើការក្នុងវិស័យទេសចរណ៍ដ៏មានសារៈសំខាន់នេះឡើង ក្រោមការគាំទ្រថវិកា របស់មូលនិធិអភិវឌ្ឍជំនាញរបស់ក្រសួងសេដ្ឋកិច្ច និងហិរញ្ញវត្ថុ ដែលជាវគ្គបណ្តុះបណ្តាលមួយត្រូវបាន រៀបចំឡើងចំពេលវេលា និងស្របតាមសកម្មភាពមួយ ក្នុងចំណោមសកម្មភាពយុទ្ធសាស្រ្តនៃផែនការ ស្តារ និងលើកកម្ពស់ការអភិវឌ្ឍជំនាញទេសចរណ៍ ដំណាក់កាលក្រោយវិបត្តិជំងឺឆ្លងកូវីដ-១៩ ឆ្នាំ២០២២-២០២៣។
ឯកឧត្តមរដ្ឋលេខាធិការបន្តថា ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាបច្ចុប្បន្នមានសុខសន្តិភាព ស្ថិរភាពនយោបាយ និងសន្តិសុខសណ្តាប់ធ្នាប់ពេញលេញ ដែលជាស្នូលសម្រាប់ការអភិវឌ្ឍវិស័យទេសចរណ៍។ វិស័យទេសចរណ៍កម្ពុជា ត្រូវបានចាត់ទុកជាវិស័យអាទិភាពមួយដើរតួជា “មាសបៃតង” រួមចំណែកដល់ការអភិវឌ្ឍសេដ្ឋកិច្ច-សង្គម និងការការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកមួយគាំទ្រដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN)។
ឯកឧត្តមបន្ថែមថា ប្រទេសកម្ពុជា ក៏ដូចជាបណ្តាប្រទេសផ្សេងៗនៅក្នុងពិភពលោក បានកំពុងប្រឈមនឹងវិបត្តិនៃ ការរីករាលដាលជំងឺឆ្លងកូវីដ-១៩ ដែលបានធ្វើឱ្យប៉ះពាល់យ៉ាងខ្លាំងដល់សកម្មភាពកំសាន្តទេសចរណ៍ និង ការប្រកបអាជីវកម្មទេសចរណ៍របស់ប្រតិបត្តិករទេសចរណ៍ ក៏ដូចជាធ្វើឱ្យប៉ះពាល់ដល់ការងាររបស់ អ្នកបម្រើការក្នុងវិស័យទេសចរណ៍ ដែលជាកត្តាបង្កឱ្យមានការបង្អាក់ខ្សែចង្វាក់សេដ្ឋកិច្ចទេសចរណ៍ និយាយដោយឡែក និងដល់ការអភិវឌ្ឍទេសចរណ៍និយាយជារួម។ តែជាភ័ព្វសំណាងរបស់កម្ពុជា ដែលមាន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រមុខ ដឹកនាំដ៏ឆ្នើមរបស់កម្ពុជា បានគិតគូរស្វែងរកវ៉ាក់សាំងជាបន្តបន្ទាប់ដើម្បីចាក់ជូនប្រជាពលរដ្ឋកម្ពុជា ដែល ធ្វើឱ្យកម្ពុជាឈានដល់ការបង្កើតភាពស៊ាំនៅក្នុងសហគមន៍ និងឈានដល់ការបើកសកម្មភាពសេដ្ឋកិច្ច សង្គម និងទេសចរណ៍នៅក្នុងគន្លងប្រក្រតីភាពថ្មីឡើងវិញ រហូតឈានដល់ការទទួលចំណាត់ថ្នាក់ជាប្រទេស ដែលអាចបើកសកម្មភាពសេដ្ឋកិច្ចសង្គមលឿនជាងគេ និងជាប្រទេសដែលមានសុវត្ថិភាពសម្រាប់ការ ទស្សនាទេសចរណ៍ផងដែរ។ការបើកដំណើរការសេដ្ឋកិច្ច សង្គមឡើងវិញនេះ បានជំរុញឱ្យមានការកម្សាន្តទេសចរណ៍នៅតាមគោលដៅទេសចរណ៍សំខាន់ៗ ដូចជា ខេត្តសៀមរាប រាជធានីភ្នំពេញ ក៏ដូចជាខេត្តព្រះសីហនុ និងគោល ដៅទេសចរណ៍មួយចំនួនទៀត មានសកម្មភាពទេសចរណ៍ជាច្រើនឡើងវិញ។ ជាក់ស្តែង រយៈពេល ០៩ ខែ ដើមឆ្នាំ២០២២ កម្ពុជាទទួលបានភ្ញៀវទេសចរអន្តរជាតិប្រមាណជាង ១.២ លាននាក់ កើនឡើង ៨៦១% បើប្រៀបធៀបនឹងរយៈពេលដូចគ្នាក្នុងឆ្នាំ២០២១ និងទេសចរផ្ទៃក្នុងកម្ពុជាមានរហូតដល់ ៩.៦ លាននាក់ ក្នុងនោះទេសចរជាតិមាន ៨.៤ លាននាក់ កើនឡើង ២៤៧% និងទេសចរបរទេសចំនួន ១.២ លាននាក់ កើនឡើង ៦០៥% បើប្រៀបធៀបនឹងរយៈពេលដូចគ្នាក្នុងឆ្នាំ២០២១។
ជាទីបញ្ចប់ឯកឧត្តម បានថ្លែងអំណរគុណចំពោះ សមាគមទេសចរណ៍កម្ពុជា ដែលមាន លោកជំទាវ ឆាយ ស៊ីវលីន ជាប្រធាន ដែលបានបើកវគ្គបណ្តុះបណ្តាលរយៈពេលខ្លី ពង្រឹងជំនាញដែលមានស្រាប់នូវ ជំនាញទេសចរណ៍ និងបដិសណ្ឋារកិច្ច សម្រាប់បុគ្គលិកកំពុងបំពេញការងារនៅខេត្តសៀមរាប លើ ជំនាញទីភ្នាក់ងារទេសចរណ៍ ជំនាញមគ្គុទ្ទេសក៏ទេសចរណ៍ និងជំនាញសណ្ឋាគារ ក្នុងដំណាក់កាលស្តារ ឡើងវិញនៃវិស័យទេសចរណ៍កម្ពុជាដ៏មានសារៈសំខាន់នេះ៕ដោយ៖សេរី