ភ្នំពេញ ៖សេចក្តីរាយការណ៍បានឲ្យដឹងថា នៅទីបំផុតសមត្ថកិច្ចបានធ្វើការឃាត់ខ្លួនជនសង្ស័យចំនួន៣នាក់ជាបន្តបន្ទាប់ ករណីបាញ់សម្លាប់ជនជាតិចិននៅខេត្តព្រះសីហនុបង្កឲ្យមានការភ្ញាក់ផ្អើលកាលពីព្រឹកថ្ងៃទី២១កន្លងទៅថ្មីៗនេះ។
កាលពីថ្ងៃទី២១ ខែមករា ឆ្នាំ២០២១កន្លងទៅ សមត្ថកិច្ចបានធ្វើការស្រាវជ្រាវរហូតឈានដល់ចាប់ខ្លួនជនសង្ស័យ៣នាក់ ជាបន្តបន្ទាប់ និងកំពុងវែកមុខបក្ខពួកមួយចំនួនទៀតដើម្បីចាត់វិធានការតាមនីតិវិធីច្បាប់។ ក្រៅពីការឃាត់ខ្លួនមនុស្សបីនាក់ សមត្ថកិច្ចបានរកឃើញរថយន្តដែលជិះធ្វើសកម្មភាពចំនួនពីរគ្រឿង និងថ្នាំញៀនមួយចំនួនថែមទៀតផង។
បើតាមមន្ត្រីនគរបាលជាន់ខ្ពស់បានឲ្យដឹងនៅរសៀលថ្ងៃទី២២ ខែមករា នេះថា សមត្ថកិច្ចបានចាប់ខ្លួនជនសង្ស័យបានចំនួនបីនាក់ និងបន្តតាមចាប់ខ្លួនបក្ខពួកមួយចំនួនដែលពាក់ព័ន្ធក្នុងអំពើបាញ់សម្លាប់ជនជាតិចិននៅក្នុងរថយន្តកាលពីព្រឹកថ្ងៃទី២១ ខែមករា ឆ្នាំ២០២១។ ក្រៅពីនេះសមត្ថកិច្ចបានរកឃើញរថយន្តចំនួនពីរដែលធ្វើសកម្មភាពជិះដេញបាញ់ជនរងគ្រោះ និងជិះបិទគូថពីក្រោយ រួមទាំងគ្រឿងញៀនមួយចំនួនផងដែរ។
សមត្ថកិច្ចបានឲ្យដឹងថា ជនរងគ្រោះឈ្មោះ ផេង ស៊ូ ភេទប្រុស ជនជាតិចិន អាយុ ២៨ឆ្នាំ ត្រូវបានខ្មាន់កាំភ្លើងបាញ់ត្រូវមួយគ្រាប់ចំលើដោះខាងឆ្វេងបណ្តាលឲ្យស្លាប់ភ្លាមៗនៅក្នុងរថយន្តតែម្តង៕ដោយ៖រាសី
