ភ្នំពេញ៖សេចក្តីរាយការណ៍បានឲ្យដឹងថា ឧកញ៉ា អ៊ាន សៀវម៉ី ត្រូវបានតុលាការអនុញ្ញាតឲ្យវិលទៅផ្ទះវិញក្រោយចូលខ្លួនឆ្លើយបំភ្លឺទាក់ទងនឹងបទបរិហាកេរ្តិ៍ នៅតុលាការនៅរសៀលថ្ងៃទី២៩ ខែមករា ឆ្នាំ២០២១។
លោកស្រី ចៅក្រម ស៊ លីណា បានធ្វើការសាកសួរលោកស្រីឧកញ៉ា អ៊ាន សៀវម៉ី តាមដីកាសន្និដ្ឋានចោទប្រកាន់របស់តំណាងអយ្យការ។
សូមរម្លឹកថា កាលពីរសៀលថ្ងៃទី២៦ ខែមករា ឆ្នាំ២០២១ សមត្ថកិច្ចបានចុះទៅចាប់ខ្លួនឧកញ៉ា អ៊ាន សៀវម៉ី នៅផ្ទះវីឡាមួយកន្លែង ក្នុងបូរីមូនថោន នៅភូមិគោកចំបក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ជាប់ពាក់ព័ន្ធបណ្ដឹងបរិហាកេរ្ដិ៍។ ការចុះទៅឡោមព័ទ្ធផ្ទះ ដើម្បីអនុវត្តតាមដីកាបង្គាប់ឲ្យនាំខ្លួនរបស់ចៅក្រមស៊ើបសួរ។
ប៉ុន្ដែការចាប់ខ្លួនមិនបានសម្រេចឡើយ ដោយឧកញ៉ា អ៊ាន សៀវម៉ី បានគេចចេញពីផ្ទះរបស់ខ្លួន ដូច្នេះបន្ទាប់ពីឡោមព័ទ្ធផ្ទះអស់ជាច្រើនម៉ោង និងរកមិនឃើញឧកញ៉ា អ៊ាន សៀវម៉ី កម្លាំងរបស់នាយកដ្ឋាននគរបាលព្រហ្មទណ្ឌ បានសម្រេចដកចេញមកវិញ៕ដោយ៖ពិទូ
