សៀមរាប៖អ្នកនាំពាក្យកងរាជអាវុធហត្ថលើផ្ទៃប្រទេស លើឡើងថា ករណីជម្លោះរវាងអ្នកកាសែតនិងអាវុធហត្ថខេត្តសៀមរាប ឈានដល់ប្រើអំពើហិង្សា កាលពីថ្ងៃ០៤ខែកម្ភៈឆ្នាំ២០២១នោះ កងរាជអាវុធហត្ថខេត្តសៀមរាប បាននាំបុគ្គលិករបស់ខ្លួនរួមនិងអាវុធយកមករក្សាទុកដើម្បីស៊ើបអង្កេត ។ចំណែកអុ្នកពាក់ព័ន្ធក្នុងករណីអំពើហិង្សានេះនឹងចាត់វិធានការតាមច្បាប់។
អ្នកសារព័ត៌មាន សូមដកស្រង់របាយការណ៍របស់អ្នកនាំពាក្យកងរាជអាវុធហត្ថលើផ្ទៃប្រទេសដែលបង្ហោះក្នុងផេកផ្លូវការដូចតទៅ៖ខ្ញុំឧត្តមសេនីយ៍ត្រី អេង ហ៊ី ស្នងការ ស្នងការដ្ឋានទំនាក់ទំនងកិច្ចការសាធារណៈ និងជាអ្នកនាំពាក្យកងរាជអាវុធហត្ថ មានកិត្តិយសសូមជម្រាបជូនសាធារណជន និងអ្នកសារព័ត៌មានអោយបានជ្រាបថា កាលពីយប់ថ្ងៃទី០៤ ខែកុម្ភៈ ឆ្នាំ ២០២១ វេលាម៉ោង៩និង១០នាទី នៅភោជយនីដ្ឋានមហាលាភ៩៩៩៩ ស្ថិតនៅ ក្រុងសៀមរាប ។ មានករណីបង្ករបួសស្នាម និងផ្ទុះអាវុធ ដែលបង្កឡើងរវាងអ្នកផឹកស៊ី ក្នុងនោះមានបុគ្គលិកកងរាជអាវុធហត្ថម្នាក់ ដែលជាជនរងគ្រោះរបួសក្បាល និងជាអ្នកប្រើអាវុធបង្កការភ្ញាក់ផ្អើលប៉ុន្តែមិនបង្កអោយមានការរងរបួសឬបះពាល់ដល់ជីវិតមនុស្ស សត្វ ខូចខាតសម្ភារៈនោះទេ ។
ក្រោយកើតហេតុកងរាជអាវុធហត្ថខេត្តសៀមរាប បានចាត់វិធានការឃាត់ខ្លួននាំនាយអាវុធហត្ថបង្កសម្លេងផ្ទុះ នៅក្នុងបន្ទាយ និងដកហូតអាវុធមករក្សាទុក ព្រមទាំងបើកធ្វើការស៊ើបអង្កេត ចំពោះករណីហិង្សាដោយចេតនា ក្នុងរឿងហេតុខាងលើទៅតាមនីតិវិធី និងអនុវត្តវិន័យកងទ័ពចំពោះបុគ្គលិកកងរាជអាវុធហត្ថ។ ព្រមទាំងចាត់វិធានការតាមច្បាប់ចំពោះអ្នកដែលពាក់ព័ន្ធនឹងអំពើហិង្សា ការបង្កការភ័យខ្លាចទាំងអស់។ន័យដូចបានជម្រាបជូនខាងលើសូមសាធារណជន និងអ្នកសារព័ត៌មានមេត្តាជ្រាប។
ទោះជាយ៉ាងនេះក្តី អ្នកសារព័ត៌មានម្នាក់គឺលោកខេង ខេមរា បានលើកឡើងនៅថ្ងៃទី០៦នេះថា ករណីជម្លោះបង្កហិង្សាខាងលើ រវាងអ្នកកាសែតនិងមន្ត្រីកងរាជអាវុធហត្ថនៅក្នុងហាង មហាលាភ ៩៩៩៩ នោះ គឺជារឿងយល់ច្រលំនឹងគ្នា ហើយខាងអ្នកសារព័ត៌មាន ក៏បានសុំទោសមន្ត្រីកងរាជអាវុធហត្ថ ព្រមទាំងថ្នាក់ដឹកនាំនៃកងរាជអាវុធហត្ថទាងអស់ថា នឹងឈប់ធ្វើទង្វើបែបនេះតទៅទៀតហើយ និងសុំការយោគយល់ជាលើកទី១ផងចុះ៕ដោយ៖នាគរាជ
