***រថយន្តដឹកកកម្មករក្រឡាប់ញឹកញាប់នៅខេត្តស្វាយរៀង
ស្វាយរៀង៖សេចក្តីរាយការណ៍បានឲ្យដឹងថា កម្មករកម្មារិនី ចំនួន៤៤នាក់ បានរងរបួសធ្ងន់ស្រាលក្នុងករណីរថយន្តដឹកកម្មករមួយគ្រឿងក្រឡាប់។ហេតុការណ៍នេះកើតឡើងនៅថ្ងៃទី១២ ខែមីនា ឆ្នាំ២០២១ វេលាម៉ោង០៦នឹង៣៥នាទី ស្ថិតតាមបណ្ដោយផ្លូវជាតិលេខ១ ចន្លោះគីឡូម៉ែត្រលេខ ១៥៧-១៥៨ នៅភូមិព្រៃផ្តៅ សង្កាត់ច្រកម្ទេស ក្រុងបាវិត ខេត្តស្វាយរៀង។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះបានកើតឡើងដោយសារ រថយន្តដឹកកម្មករនិយោជិតគេចរថយន្តមួយផ្សេងទៀតពីខាងមុខក៏បានរេចង្កូតក្រឡាប់ទៅខាងឆ្វេងផ្លូវ និងបានបោកជាមួយនឹងដើមឈើ។ កម្មករជិះលើរថយន្ដសរុប ៥៥នាក់ ដែលបណ្តាលឲ្យកម្មកររងរបួសចំនួន ៤៤នាក់ ស្រី ៤០នាក់ ប្រុស០៤នាក់ (របួសធ្ងន់ ០៤នាក់ ស្រី ០៣នាក់) កំពុងសម្រាកនៅមន្ទីរពេទ្យបង្អែកជីភូ ចំនួន៣៣នាក់ មន្ទីរព្យាបាលពន្លឺបូព៌ា ចំនួន១១នាក់ និងបានបញ្ជូនទៅមន្ទីរពេទ្យបង្អែកខេត្តស្វាយរៀង ចំនួន ០៤នាក់ (របួសធ្ងន់)។ភ្នាក់ងារនៅមន្ទីរពេទ្យបង្អែក មន្រ្តី និងបុគ្គលិក ប.ស.ស. សាខាខេត្តកំពុងសម្របសម្រួលបន្ត ៕ដោយ៖វាយោ
