បន្ទាយមានជ័យ៖ កម្លាំងនគរបាលឃាត់ខ្លួនជនសង្ស័យ៣នាក់ មានម្នាក់ជាជនដៃដល់កាប់ជនរងគ្រោះម្នាក់ស្លាប់ និងម្នាក់របួសធ្ងន់ព្រោះរឿងទំនាស់រឿងស្រី។ ប្រតិបត្តិការឃាត់ខ្លួក្រុមជនសង្ស័យបានធ្វើឡើង កាលពីវេលាម៉ោង០៩និង៣០នាទី យប់ថ្ងៃទី២១ ខែមីនា ឆ្នាំ២០២១ ស្ថិតភូមិ.សង្កាត់អូរអំបិល ក្រុងសិរីសោភ័ណ។
លោកឧត្តមសេនីយ៍ត្រី នូ ជីវ័ន្ត ស្នងការរងទទួលការងារព្រហ្មទណ្ឌ នៃស្នងការដ្ឋាននគរបាលខេត្តបន្ទាយមានជ័យ បានឱ្យដឹងថា ជនសង្ស័យ៣នាក់ មានម្នាក់ជាជនដៃដល់ឈ្មោះ ចាន់ សំណាង ហៅអាវ៉ច ភេទប្រុស អាយុ២០ឆ្នាំ រស់នៅភូមិបាណយ សង្កាត់ទឹកថ្លា ក្រុងសិរីសោភ័ណ និងជនសង្ស័យ២នាក់ទៀត មិនទាន់ស្គាល់ឈ្មោះជាបក្ខពួក។ លោកបានបញ្ជាក់ថា កាលពីយប់វេលាម៉ោង៣ទាបភ្លឺចូលថ្ងៃទី២១ ខែមីនា ឆ្នាំ២០២១ នៅចំណុចផ្ទះជួលស្ថិតភូមិខ្លាកូនចាស់ សង្កាត់កំពុងស្វាយ ក្រុងសិរីសោភ័ណ មានជនរងគ្រោះម្នាក់ឈ្មោះ ឈីវ ហាក់ ភេទប្រុស អាយុ៣៨ឆ្នាំ មុខរបរជាងដែក ស្នាក់នៅធ្វើការងារស្រុកស្វាយចេក ដែលមានស្រុកកំណើតភូមិ.ឃុំអូរតាគី ស្រុកថ្មគោល ខេត្តបាត់ដំបង ត្រូវបានជនសង្ស័យកាប់បណ្តាលឱ្យស្លាប់ នៅហ្នឹងកន្លែងកើតហេតុ និងម្នាក់ទៀតរបួសធ្ងន់កំពុងសម្រាកព្យាបាលនៅមន្ទីរពេទ្យមិត្តភាពកម្ពុជា.ជប៉ុនមង្គលបូរី។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបានបញ្ជាក់ថា មន្ត្រីនគរបាលការិយាល័ព្រហ្មទណ្ឌខេត្តសហការមន្ត្រីនគរបាលក្រុងសិរីសោភ័ណ បានចុះស្រាវជ្រាវកំណត់មុខសញ្ញាឃាត់ជនសង្ស័យ៣នាក់ ម្នាក់ជាជនដៃដល់ឈ្មោះ ចាន់ សំណាង ហៅអាវ៉ច ត្រូវបានបញ្ជូនស្នងការនគរបាលខេត្តបន្ទាយមានជ័យ ដើម្បីសាកសួរចម្លើយ។ លោកបានបញ្ជាក់ថា តាមចម្លើយជនសង្ស័យឈ្មោះ ចាន់ សំណាង ហៅ (អាវ៉ច) បានសារភាពថា ខ្លួនពិតជាបានធ្វើសកម្មភាពទៅលើជនរងគ្រោះពិតប្រាកដមែន ព្រោះតែគំនុំកាលពីថ្ងៃមុន នៅពេលគេឌុបសង្សាររបស់ខ្លួនចេញពីធ្វើការពេលយប់ស្រាប់តែជនរងគ្រោះឈ្មោះ ឈីវ ហាក់ និងបក្ខពួករបស់គេស្ទាក់វ៉ៃទៅលើខ្លួនហើយនៅយប់កើតហេតុជនរងគ្រោះបានទូរស័ទ្ទមកលេខសង្សាររបស់គេនៅពេលកំពុងនៅជាមួយគ្នាហើយទទួលប្រាប់ថា ពេលនេះកំពុងនៅបន្ទប់ជាមួយសង្សារ។ ហើយប្រាប់អោយចាំមួយភ្លេតទៅដល់ហើយពេលនោះបក្ខពួកជនរងគ្រោះបានចូលទៅគោះទ្វារហើយយកកាំបិតផ្គាក់កាប់បណ្តាលឱ្យរបួសធ្ងន់ហើយជនរងគ្រោះអង្គុយលើម៉ូតូខាងក្រៅបន្ទប់បានកាប់ចំកញ្ចឹងករបណ្តាលឱ្យដួលទាំងម៉ូតូបណ្តាលស្លាប់និងហើយគេចខ្លួនយកកាំបិតផ្គាក់ដែលកាប់ទៅចោលក្នុងស្ទឹងស្ពានទឹកថ្លា ហើយជិៈម៉ូតូគេចខ្លួនទៅដេកនៅវាលទំនប់កណ្តុល ដល់ម៉ោង៧យប់ថ្ងៃទី២១ ខែមីនា ឆ្នាំ២០២១ចូលមកដល់ភូមិ.សង្កាត់អូរអំបិល ក្រុងសិរីសោភ័ណ ត្រូវកម្លាំងចាប់ខ្លួនទាំងមិត្តភ័ក្តិ២នាក់ទៀត។
គួរបញ្ជាក់ថា ក្រោយពេលឃាត់ខ្លួនជនសង្ស័យឈ្មោះ ចាន់ សំណាង ហៅអាវ៉ច និងបក្ខ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តនិងកម្លាំងជំនាញបានយកជនសង្ស័យទៅរកវត្ថុតាងនៅក្នុងស្ទឹងស្ពានទឹកថ្លារកមិនទាន់ឃើញយប់ហើយទឹកជ្រៅ៕ដោយ៖ទីសុខ
