សៀមរាប៖យោងតាមលិខិតរបស់ អាជ្ញាធរខេត្តសៀមរាប បានឲ្យដឹងថា សហគមន៍ទេសចរណ៍ វប្បធម៌ធម្មជាតិ បឹងពារាំង នឹងត្រូវជីកស្តារផ្នែកខ្លះ ដើម្បីរក្សាទឹក ក្នុងការផ្តល់ជម្រក ដល់ត្រីមេពូជ និងសត្វសត្វស្លាបជាច្រើនប្រភេទបានរស់នៅស្រួល តកូនតចៅ។ យោងតាមសេចក្តីជូនដំណឹងរបស់ សាលាខេត្តសៀមរាប លេខ ៤២៣.សជណ/២១ ចុះថ្ងៃទី៣១ ខែមីនា ឆ្នាំ២០២១ បានបញ្ជាក់ថា៖បឹងពារាំង ដែលជាកន្លែង អភិរក្សពូជត្រី និងទីជម្រក សត្វស្លាបកម្រ ជាច្រើនប្រភេទ មានការគោករាក់ ជារៀងរាល់ឆ្នាំ។ ចុងក្រោយនេះ ដោយ មានទឹកតិច តួចក្នុងបឹង ដែលជាបញ្ហាប្រឈមនឹង ការបាត់បងត្រីពូជ និងទីជម្រកសត្វស្លាប ទៅអនាគត រដ្ឋបាលខេត្តសៀមរាប បានរៀបចំជីក បូម ស្តារ បឹងពារាំង ដើម្បីរក្សាទឹកទុក សម្រាប់អភិរក្សត្រីពូជ និងទីជម្រកសត្វស្លាប កម្រជាច្រើន ដែលរស់នៅក្នុងទីតាំង បឹងពារាំង។សេចក្តីជូនដំណឹងនេះ បានបញ្ជាក់ថា បន្ទាប់ពីមានការអនុញ្ញាត ពីក្រសួងកសិកម្ម រុក្ខាប្រមាញ់ និងនេសាទ រដ្ឋបាលខេត្តសៀមរាប នឹងចាប់ផ្តើមអនុវត្តគម្រោង ជីក បូម ស្តារ តាមផែនការ ចាប់ពីថ្ងៃជូនដំណឹង រហូតដល់បញ្ចប់គម្រោង។ លោក គង់ មង្គល ប្រធានសហគមន៍ បឹងពារាំង បានប្រាប់អ្នកកាសែតថា ការពិតណាស់ សហគមន៍ទាំងពីរ នឹងធ្វើការជីក បូម ស្តារ បឹងពារាំង ចាប់ពីថ្ងៃទី១ ខែមេសា នេះតទៅ តាមរយៈសាលាខេត្តសៀមរាប។ ដ្បិតបឹងពារាំង ស្ថិតក្នុងសង្កាត់ ចុងឃ្នៀស និងសង្កាត់ជ្រាវ។ អីចឹង ផ្នែកសង្កាត់ចុង ឃ្នៀស អាចបូមយកល្បាប់ភក់ចេញ។ ឯផ្នែកសង្កាត់ជ្រាវ អាចជីកស្តារទាំងស្រុង ព្រោះមួយផ្នែកធំ ទឹកបានរីងហួតអស់ហើយ។ ក្នុងការជីកស្តារនោះ បើជីកហើយ ទឹកចេញមកវិញ យើងរក្សាទឹកជាធម្មតា តែបើមិនមាន ទឹកចេញទេ គឺយើងត្រូវបូមទឹក ពីទន្លេសាប បញ្ចូលក្នុងបឹង។ ធ្វើបែបនេះ ទើបអាចរក្សាត្រី មេពូជ និងសត្វស្លាប គ្រប់ប្រភេទបាន។លោក គង់ មង្គល បានបន្ថែមថា បឹងពារាំង គឺជាតំបន់ទេសចរណ៍ ដ៍ទាក់ទាញបំផុត តាមរយៈទេសភាពព្រៃលិចទឹក ហ្វូងត្រីចម្រុះ ពិសេសទៅទៀត គឺសត្វស្លាបទឹក គ្រប់ប្រភេទ។ បឹងនេះ មានចម្ងាយពីទីប្រជុំជន នៃសង្កាត់ជ្រាវ ប្រមាណជាង ៦ គីឡូម៉ែត្រ និងមានទំហំសរុប ២.៦០៧,៧១ ហិកតា។ ប៉ុន្តែនៅរដូវប្រាំង ផ្ទៃទឹកបង្រួមសល់ត្រឹមតែ ជាង ២២៣ ហិកតាប៉ុណ្ណោះ។ តែក្នុងទំហំខាងលើនេះ ទឹកក៍ផ្តើមស្រក យ៉ាងឆាប់រហ័សផងដែរ ហើយបើមិនមានវិធានការសង្គ្រោះ ទាន់ពេល ទាំងត្រី និងសត្វ អាចនឹងបាត់បង់ ក្នុងរដូវប្រាំងនេះតែម្តង។លោកប្រធានសហគមន៍ បានបន្ថែមទៀតថាៈ បន្ទាប់ពីបូម ជីក ស្តារ រក្សាទឹកបាន ហើយ ប្រមូលពូជត្រី ដែលបាត់បង់ មកបង្កាត់ពូជឡើងវិញ រួមទាំងសត្វ ស្លាបគ្រប់ប្រភេទមាន កំណើនដូចដើមវិញ បឹងពារាំង និងក្លាយជាវង់ទស្សនា របស់ភ្ញៀវទេសចរបន្ទាប់ពីប្រាង្គ ប្រាសាទ និងតំបន់ទេសភាព ផ្សេងទៀត នៅក្នុងខេត្តមួយនេះ។ លោកប្រធានសហគមន៍ ក៏បានបង្ហាញនូវភាពដឹងគុណ ដល់រដ្ឋមន្ត្រី ក្រសួងកសិកម្ម រុក្ខាប្រម៉ាញ់និងនេសាទ ជាពិសេសលោកអភិបាលខេត្តសៀមរាប តែម្តង ដោយលោកបញ្ជាក់ថា នេះជាការគិតគូរ អំពីធនធាន របស់ថ្នាក់ដឹកនាំ ដែលគួរយកតម្រាប់តាមផងដែរ៕ដោយ៖ភក្តី
អំពីយើង
ផ្តល់ព័ត៌មានទាន់ហេតុការណ៏
CONTACT US
Mobile Phone: +85517 889 682
Whatsapp: +855 17 889 682
Email: kosaljournalist@gmail.com
FOLLOW US
© AngkorFlash 2024