ខេត្តសៀមរាប៖នៅថ្ងៃទី២១ ខែសីហា ឆ្នាំ២០២១នេះ មន្ត្រីជំនាញនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាបបានឲ្យដឹងថា ជំងឺដុំពកលើស្បែកសត្វគោក្របី គឺបង្កឡើងដោយវីរុស ប៉ុន្តែ វាងាយស្រួលក្នុងការព្យាបាលឱ្យជាសះស្បើយបាន ខណ:បើសិនម្ចាស់វាឧស្សាហ៍ងូតទឹក ដាក់ចំណី និងបាញ់ថ្នាំសម្លាប់មេរោគនៅជុំវិញក្រោល។
ពាក់ព័ន្ធនឹងករណីនេះដែរ លោក ព្រំ វិច ប្រធានការិយាល័យផលិតកម្ម និងបសុព្យាបាលការិយាល័យផលិតកម្ម និងបសុព្យាបាលការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក៏បានប្រាប់ផងដែរថា ជំងឺដុំពកស្បែកគោក្របីនៅខេត្តសៀមរាប បានព្យាបាលជាសះស្បើយស្ទើរតែ ១០០% បើគិតមកដល់ថ្ងៃទី២១ ខែសីហា ឆ្នាំ២០២១នេះ។ លោកបន្តថា ជំងឺនេះបង្កឡើងដោយវីរុសម្យ៉ាងឈ្មោះ (Poxviridae) ប៉ុន្តែ, ងាយស្រួលក្នុងការព្យាបាលទេ បើម្ចាស់ ធ្វើការងូតទឹកឱ្យសត្វគោក្របីទាំងនោះញឹកញាប់ និងដាក់ចំណីឱ្យពួកវាគ្រប់គ្រាន់ យ៉ាងយូរ ២ទៅ៣ថ្ងៃប៉ុណ្ណោះ នឹងជាសះស្បើយមិនខាន «ការព្យាបាល នៅពេលសត្វក្តៅខ្លួន គឺយើងត្រូវឧស្សហ៍ងូតទឹកឱ្យវា ដាក់ទឹក ដាក់ចំណីឱ្យបានគ្រប់គ្រាន់ ហើយកុំលែងវាអោយសោះ ននិងត្រូវដាក់ក្នុងក្រោលឱ្យបានត្រឹមត្រូវ ថែទាំ សម្អាតក្រោល ដោយបាញ់ថ្នាំសម្លាប់មេរោគនៅជុំវិញផង»។ ហើយលោក ព្រំ វិច ក៏បញ្ជាក់ទៀតថា គេអាចធ្វើការព្យាបាលជំងឺដុំពកស្បែកគោក្របីនេះដោយការពារទប់ស្កាត់ជំងឺឱកាសនិយមមួយចំនួន និងដំបៅរលួយផ្សេងៗ និងមានប្រភេទថ្នាំមួយចំនួនអាចប្រើសម្រាប់ព្យាបាលដូចជាថ្នាំ÷ Pracetamole, Dexametasone, Amoxiciline, Chlorazone, Bactrim និង Methylen blu ផងដែរ។ ពោលគឺថា៖ «បើសត្វវាក្តៅខ្លួន យើងប្រើថ្នាំប្រភេទ Pracetamole បើវាឡើងស្បែកអាឡែកស៊ី យើងអាចប្រើពពួកថ្នាំ Dexametasone ហើយបើសិនជាវាមានដំបៅ យើងអាចប្រើពពួកថ្នាំ Methylen blu ដែលយើងហៅថា “ថ្នាំខៀវ” សម្រាប់លាប ដែលអាចរកបាននៅកន្លែងពេទ្យសត្វ ចែកជូនដោយមិនគិតថ្លៃ»។ បើតាមការបញ្ជាក់របស់លោក ព្រំ វិច គិតចាប់ពីខែឧសភា ដល់ថ្ងៃទី២១ ខែសីហានេះ សភាពជំងឺដុំពកស្បែកគោក្របីដែលកើតឡើងរប៉េះរប៉ោះ នៅតាមតំបន់មួយចំនួនក្នុងខេត្តសៀមរាប មានសត្វគោក្របីឈឺសរុប ៦៨៣ក្បាល ព្យាបាលជាចំនួន ៦៦៧ក្បាល កំពុងព្យាបាលចំនួន ៤៧ក្បាល និងងាប់ចំនួន ៦ក្បាល។ បើតាមការអោយដឹងពីលោកប្រធានការិយាល័យផលិតកម្ម និងបសុព្យាបាលខេត្តសៀមរាប ជំងឺដុំពកនេះ មានសភាពស្រដៀងទៅនឹងជំងឺអុដស្វាយ ដែលកើតលើមនុស្សដែលនាំឱ្យមានកន្ទួល ឡើងដំបៅពេញខ្លួន ទាមទារអោយមានការថែទាំអនាម័យ ងូតទឹកញឹកញាប់ ហើយសត្វល្អិតបឺតជញ្ជក់ឈាម មូស របោម រុយ ស្រួយ ដង្កែ ទាំងនេះជាភ្នាក់ងារចម្លងជំងឺ ចំណែកការចល័តសត្វឈឺ ពីតំបន់មួយទៅតំបន់មួយ និងការស៊ីចំណីជុំគ្នា ក៏ជាមូលហេតុធ្វើឱ្យមានការឆ្លងរាលដាលផងដែរ។ យ៉ាងណាក៏ដោយ ជំងឺនេះមិនឆ្លងពីសត្វគោក្របីមកមនុស្ស ឬ សត្វប្រភេទផ្សេងទៀតនោះទេ។ មន្ត្រីបសុពេទ្យ អគ្គនាយកដ្ឋាន ខេត្ត/ស្រុក និងភ្នាក់ងារសុខភាពសត្វភូមិ សហការជាមួយអាជ្ញាធរមូលដ្ឋានបានចុះធ្វើការផ្សព្វផ្សាយពីវិធានការការពារ អនាម័យទប់ស្កាត់ការឆ្លងរាលដាលជំងឺដល់កសិករម្ចាស់សត្វចំនួន ១២០០គ្រួសារ និងបានចុះបាញ់ថ្នាំសម្លាប់មេរោគតាមក្រោលចិញ្ចឹមសត្វបានជាច្រើនកន្លែង និងផ្តល់បសុឱសថ សម្ភារ បរិក្ខារ បសុពេទ្យដល់ភ្នាក់ងារសុខភាពសត្វភូមិតាមបណ្តាស្រុកសម្រាប់ជួយដល់ប្រជាពលរដ្ឋផងដែរ៕ ដោយ÷វាយោ
