ភ្នំពេញ ៖ យោងតាមការឲ្យពីក្រសួងសុខាភិបាល ថា កម្ពុជា មិនមានអ្នកឆ្លងជំងឺកូវីដ-១៩ថ្មីរយៈពេល១០ថ្ងៃជាប់គ្នាៗ ខណៈនៅសល់អ្នកជំងឺកំពុងព្យាបាលនៅមន្ទីរពេទ្យចំនួន១០នាក់ប៉ុណ្ណោះ។
បើតាមរបាយការណ៍របស់ក្រសួងសុខាភិបាលបានឲ្យដឹងថា ចាប់ពីថ្ងៃទី១៥ រហូតដល់ថ្ងៃទី២៤ខែសីហា ឆ្នាំ២០២០នេះ ក្រសួង មិនបានរកឃើញករណីឆ្លងជំងឺកូវីដ-១៩ថ្មីណាមួយទេ ពិសេសក្នុងពេលថ្ងៃឈប់សម្រាករបស់រាជរដ្ឋាភិបាលដែលមានភ្ញៀវទេសចរជាតិ និងអន្តរជាតិរាប់លាននាក់ ធ្វើដំណើរកម្សាន្តតាមរមណីយដ្ឋាននានាទូទាំងប្រទេស។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន បានមានប្រសាសន៍ថា នៅក្នុងថ្ងៃឈប់សម្រាករយៈពេលយូរនេះមិនមានករណីជំងឺកូវវីដ-១៩ ឆ្លងចូលទៅក្នុងសហគមន៍ណាមួយនៅឡើយទេ ពោលគឺកម្ពុជាមានតែករណីនាំចូលពីក្រៅប្រទេសប៉ុណ្ណោះ។តែយ៉ាងណាក្តី លោកស្រី នៅតែបន្តអំពាវនាវដល់ប្រជាពលរដ្ឋ ត្រូវបន្តអនុវត្តវិធានការសាមញ្ញៗរបស់ក្រសួងសុខាភិបាល ក៏ដូចជាគោលការណ៍ណែនាំរបស់រាជរដ្ឋាភិបាលជាបន្តទៀតដូចជា ត្រូវពាក់ម៉ាស់ពេលចាំបាច់ លាងដៃជាមួយសាប៊ូ ជែល ឬទឹកអាល់កុល និងរក្សាសុវត្ថិភាពគម្លាតបុគ្គលសង្គមយ៉ាងហោចណាស់ឲ្យបាន១ម៉ែត្រកន្លះ ដើម្បីចៀសវាងការឆ្លងចូលទៅក្នុងសហគមន៍។
សូមរម្លឹកថា ប្រទេសកម្ពុជា បានរកឃើញករណីជំងឺកូវីដ-១៩ ដំបូងបំផុតនៅថ្ងៃទី២៧ ខែមករា ឆ្នាំ២០២០ ហើយរហូតមកដល់ព្រឹកថ្ងៃទី១៤ ខែសីហា ឆ្នាំ២០២០ បានធ្វើតេស្តចំនួន ៨៨៦៩៩ ស្មើនឹង៥៣៤៣ ក្នុង១លាននាក់។ ក្នុងនោះ មានអ្នកឆ្លងជំងឺកូវីដ-១៩ ចំនួន២៧៣នាក់ អ្នកជាសះស្បើយចំនួន១៦៣នាក់ និងនៅសល់១០ទៀត កំពុងសម្រាកព្យាបាលតាមមន្ទីរពេទ្យរដ្ឋ និងឯកជនមួយចំនួន៕
