ភ្នំពេញ៖ដោយមានការបង្ហាញឈុតតំណាងក្រុងប៉ោយប៉ែត និងក្រុងបាវិត នៅក្នុងកម្មវិធីប្រកួតកម្មវិធីប្រកួតឈុតតំណាងជាតិធ្វើឡើងនៅថ្ងៃទី២៤ ខែសីហា ឆ្នាំ២០២២ ដោយផ្សាយចេញពីផេកផ្លូវការរបស់កម្មវិធី Miss Grand Cambodia។ ក្នុងកម្មវិធីនេះគេឃើញឈុតចំនួន២ ដែលជាការផ្សព្វផ្សាយរូបភាពល្បែងស៊ីសង នៅពីមុខផ្ទាំងរូបភាពប្រាសាទអង្គរវត្ត ដែលតំណាងឱ្យព្រលឹងជាតិខ្មែរ។
មតិរិះគន់ និងការមិនពេញចិត្តលើឈុតតំណាងក្រុងទាំងពីរនេះជាច្រើន ម្ចាស់ផលិតកម្មមហាហង្ស បានសម្រេចដកឈុតទាំងពីរនេះចេញពីការប្រកួតកម្មវិធី ប្រកួតឈុតតំណាងជាតិកម្មវិធីកញ្ញាឯកដ៏អស្ចារ្យនៃកម្ពុជាឆ្នាំ២០២២ និងសុំអភ័យទោសចំពោះប្រជាពលរដ្ឋកម្ពុជាទាំងក្នុងប្រទេស និងក្រៅប្រទេស ជាពិសេសអាជ្ញាធរ ប្រជាពលរដ្ឋកម្ពុជា ដែលរស់នៅក្នុងក្រុងប៉ោយប៉ែត នៃខេត្ត បន្ទាយមានជ័យ និងក្រុងបាវិត នៃខេត្តស្វាយរៀង។
ម្ចាស់ផលិតកម្មនេះ ក៏បានអះអាងដែរថា ក្រុមហ៊ុនគ្មានបំណងធ្វើឲ្យអាប់ឱនដល់កិត្តិយសប្រជាពលរដ្ឋដែលរស់នៅក្នុងក្រុងទាំងពីរនេះទេ។
ទាក់ទងនឹងបញ្ហានេះ លោក ហ៊ី វីរៈ អ្នកនាំពក្យក្រសួងវប្បធម៌ និងវិចិត្រសិល្បៈ បានសរសេរនៅក្នុងហ្វេសបុកផ្ទាល់ខ្លួន នៅល្ងាចថ្ងៃទី២៥ ខែសីហា ឆ្នាំ២០២២ ថា «វប្បធម៌ខ្មែរប្រែមុខមាត់អ្នក សូមកុំយកជាធ្នាក់ទាក់យកប្រយោជន៍ខ្លួន»។ ត្រង់ឃ្លានេះ លោកបានអត្ថាធិប្បាយថា វប្បធម៌ខ្មែរត្រូវបានជាន់ឈ្លីយ៉ាងគឃ្លើនពីសំណាក់វប្បធម៌បរទេសដែលបានជ្រាបចូលយ៉ាងគំហុកក្នុងយុគសម័យនេះ។ ទន្ទឹមនឹងនេះ ក៏មានការចូលរួមបំផ្លាញយ៉ាងសស្រាក់សស្រាំពីសំណាក់បុគ្គលគ្មានមនសិការមួយចំនួនផងដែរ ដោយយកឈ្មោះ ឬលើកយកការលើកស្ទួយវប្បធម៌ខ្មែរជាខែល តែទង្វើហាក់ផ្ទុយពីសម្តីទាំងស្រុងទៅវិញ។
ខណៈនេះសង្កេតឃើញថា មានការចែករំលែកយ៉ាងច្រើន និងរិះគន់យ៉ាងខ្លាំងពីសំណាក់ពលរដ្ឋខ្មែរដែលស្រលាញ់វប្បធម៌ជាតិ ព្រោះឃើញមានការផ្សព្វផ្សាយរូបភាពល្បែងស៊ីសងក្នុងអំឡុងការហាត់សមកម្មវិធី Miss Grand Cambodia ២០២២ ដែលកម្មវិធីប្រកួតផ្លូវការនឹងប្រារព្ធឡើងនៅថ្ងៃទី២៧ ខែសីហា ឆ្នាំ២០២២ ក្នុងឈុតសម្លៀកបំពាក់តំណាងក្រុងប៉ោយប៉ែត និងក្រុងបាវិត។លោកហ៊ី វីរៈ បានចាត់ទុកការរិះគន់ពីសំណាក់ពលរដ្ឋខ្មែរ ចំពោះការផ្សព្វផ្សាយរូបភាពល្បែងស៊ីសងក្នុងអំឡុងការហាត់សមកម្មវិធី Miss Grand Cambodia ២០២២ គឺជាការចូលរួមយ៉ាងសកម្ម។ លោកគាំទ្រយ៉ាងខ្លាំងចំពោះការរិះគន់ក្នុងន័យស្ថាបនាទាំងអស់ ដើម្បីលើកស្ទួយ និងអភិរក្សសិល្បៈវប្បធម៌។ ភាពឈឺឆ្អាល ការយកចិត្តទុកដាក់ ការិះគន់ ការបារម្ភ ការហួងហែង និងការចូលរួម ជាសូចនាករយ៉ាងសំខាន់ ដើម្បីថែរក្សាមរតកវប្បធម៌ឱ្យបានគង់វង្ស៕ដោយ៖សេរី
