ខេត្តរតនគីរី៖ ក្រុមការងារចម្រុះរបស់រដ្ឋបាលខេត្តរតនគិរី ដឹកនាំដោយ លោក កុល ផាន់ណា ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្ត សហការជាមួយអាជ្ញាធរក្រុងបានលុង លោក ពុត ដានី អភិបាលរងក្រុង កាលពីរសៀលថ្ងៃទី២០ ខែតុលា ឆ្នាំ២០២២ បានធ្វើយុទ្ធនាការចុះរុះរើស្លាក យីហោ អាហ្វីស ប៉ាណូ ផ្សព្វផ្សាយពាណិជ្ជកម្ម ដែលមិនមានច្បាប់អនុញ្ញាត ឬអស់សុពលភាពនៅក្នុងភូមិសាស្រ្តក្រុងបានលុង។
លោក កុល ផាន់ណា បានបញ្ជាក់ថា ការចុះរុះរើស្លាកសញ្ញាផ្សព្វផ្សាយពាណិជ្ជកម្ម អាហ្វីស ប៉ាណូ ដែលពុំបានចុះបញ្ចីសុំសិទ្ធផ្សព្វផ្សាយនៅអង្គភាពច្រកចេញចូលតែមួយរបស់រដ្ឋបាលខេត្តនាពេលនេះ គឺអនុវត្តតាម ស.ជ.ណ របស់រដ្ឋបាលខេត្តឲ្យចុះពិនិត្យ និងរុះរើ ស្លាកសញ្ញាផ្សព្វផ្សាយពាណិជ្ជកម្មតាមរយៈអាហ្វីស ប៉ាណូនានា ដែលមិនមានច្បាប់អនុញ្ញាតត្រឹមត្រូវក្នុងភូមិសាស្រ្តខេត្តរតនគិរី។
លោកបានបញ្ជាក់ទៀតថា ការចុះរុះរើនេះក៏ជាការរៀបចំសណ្តាប់ធ្នាប់ និងពង្រឹងការអនុវត្តន៍តាមអនុក្រឹត្យលេខ១៨ ស្តីពីបង្កើតយន្តការច្រកចេញចូលតែមួយរបស់រដ្ឋបាល រាជធានីខេត្ត និងបទដ្ឋានមួយចំនួន ក៏ដូចជាពាក់ព័ន្ធនឹងប្រកាសអន្តរក្រសួង ដើម្បីប្រមូលចំណូលចូលរដ្ឋ។ព្រោះបច្ចុប្បន្ន រាជរដ្ឋាភិបាលបានប្រតិភូកម្ម អំណាចមកកាន់ថ្នាក់ក្រោមជាតិ ដើម្បីពង្រឹងការប្រមូលចំណូលតាមយន្តការច្រកចេញចូលតែមួយរបស់រដ្ឋបាលខេត្ត ដូច្នេះបើសិនជាក្រុមហ៊ុន ឬអាជីវករនានា ដំឡើង និងផ្សព្វផ្សាយផ្សព្វផ្សាយពាណិជ្ជកម្មតាមរយៈ ស្លាកយីហោ អាហ្វីសប៉ាណូគ្មានច្បាប់ទម្លាប់ត្រឹមត្រូវវានឹងធ្វើឲ្យបាត់បង់ចំណូលរដ្ឋ និងការផ្សព្វផ្សាយដោយពុំមានឆ្លងកាត់មន្ទីរជំនាញធ្វើឲ្យខ្លឹមសារនៃការផ្សព្វផ្សាយនោះប៉ះពាល់ទំនៀមទំលាប់ប្រពៃណី និងសណ្ដាប់ធ្នាប់សាធារណៈផងដែរ។
យុទ្ធនាការនេះ ក្រុមការងារ នឹងអនុវត្តដូចភ្លៀងរលឹម ចាប់ពីថ្ងៃទី២០ ខែតុលា ឆ្នាំ២០២២នេះតទៅ។ ដូច្នេះតាមរយៈនេះ សូមអំពាវនាវដល់ប្រជាពលរដ្ឋ ឬក្រុមហ៊ុនឯកជន ដែលមាន ស្លាកយីហោ អាហ្វីស ប៉ាណូ ផ្សព្វផ្សាយពាណិជ្ជកម្ម ត្រូវចូលរួមសហការជាមួយក្រុមការងារចម្រុះរបស់រដ្ឋបាលខេត្ត និងមន្ទីរអង្គភាពពាក់ព័ន្ធ ដើម្បីអនុវត្តនការងារឲ្យមានប្រសិទ្ធភាពខ្ពស់ និងមកបំពេញកាតព្វកិច្ចបង់ចំណូលនៅអង្គភាពច្រកចេញចូលតែមួយនៅសាលាខេត្តរតនគិរីរៀងរាល់ម៉ោងធ្វើការ៕
