ខេត្តសៀមរាប៖យោងតាមទិន្នន័យ របស់ក្រសួងទេសចរ បានឲ្យដឹងថា ភ្ញៀវទេសចរ ដែលចេញដើរ កម្សាន្តនាសប្ដាហ៍ចុងខែធ្នូ ចាប់ពីថ្ងៃទី១៩ដល់ថ្ងៃទី ២៥ ខែធ្នូ ឆ្នាំ២០២២ នៅទូទាំងប្រទេស ទទួលបាន ភ្ញៀវទេសចរ សរុបមានចំនួន ៤៣៩,០៤៦នាក់ ក្នុងនោះភ្ញៀវជាតិមាន ៤០២,៣៤៧នាក់ និងភ្ញៀវបរទេសមាន ៣៦,៦៩៩នាក់។ នៅក្នុងទិន្នន័យដដែលនេះក៏បានបង្ហាញថា នៅក្នុងខេត្តសៀមរាបទទួលបានភ្ញៀវទេសចរចំនួន៧៦,០២២នាក់ក្នុងនោះភ្ញៀវជាតិ៧០០០០នាក់ និងភ្ញៀវទេសចរបរទេសមានចំនួន៦០២២នាក់ផងដែរ។
ក្នុងឱកាសនោះដែរ បងប្អូនប្រជាពលរដ្ឋ បានដើរនាំគ្នារលេងកំសាន្ត ប្រកប មុខរបរ បំពេញការងាររៀងៗខ្លួន មានសេចក្តីសុខ ទូទាំងប្រទេស ជាមួយស្នាមញញឹម នឹងភាពកក់ក្តៅ។
ពលរដ្ឋបានសម្តែងនូវការអរគុណនូវគោលនយោបាយចាក់វ៉ាក់សាំងកូវីដ-១៩ របស់ រាជរដ្ឋាភិបាលកម្ពុជា ដែលជាយុទ្ធសាស្ត្រគន្លឹះ និងជាខ្សែក្រវ៉ាត់ការពារទីមួយ សំខាន់ជាងគេ ដើម្បីការពារអាយុជីវិតប្រជាជន ក្នុងការបង្កើនឲ្យបាននូវភាពស៊ាំក្នុងសហគមន៍ ទប់ទល់នឹងមេរោគកូវីដ-១៩ រហូតអាចបើកដំណើរការប្រទេសជាតិពេញលេញលើគ្រប់វិស័យ និងការរស់នៅតាមបែបគន្លងប្រក្រតីភាពថ្មីឡើងវិញដូចបច្ចុប្បន្ននេះ។
សូមរម្លឹកថា បុណ្យណូអែលជាភាសាបារំាងរឺអង់គ្លេសហៅបុណ្យគ្រិស្តម៉ាស គឺជាបុណ្យសាសនានៃទិវាប្រសូតរបស់ព្រះយេស៊ូគ្រិស និងជាថ្ងៃព្រះយេស៊ូគ្រិស្តរស់ឡើងវិញ ។ គ្រិស្តសាសនិកជននៅទូទាំងពិភពលោកតែងតែប្រារព្ធពិធីបុណ្យនេះ ជារៀងរាល់ឆ្នាំ នៅថ្ងៃទី២៥ ធ្នូ ដែលជាខួបកំណើតរបស់ព្រះយ៉េស៊ូគ្រឹស្តនៅទីក្រុងប៊ែតឡេហ៊ែម ប៉ាឡេស្ទីន ។
បុណ្យគ្រិស្តម៉ាស ឬណូអែល ចាប់ផ្តើមប្រារព្ធធ្វើប្រមាណជា២០០ឆ្នាំ ក្រោយគ្រិស្តសករាជ ។ កាលពីឆ្នាំ២២១ ប្រវត្តិវិទូសម័យក្រុងរ៉ូម ឈ្មោះ Sextus Julius Africanus បានកំណត់ក្នុងសៀវភៅ ប្រវតិ្តពិភពលោករបស់គាត់ ដោយយកថៃ្ង ២៥ ធ្នូ ជាថៃ្ងបុណ្យគ្រិស្តម៉ាស។ ដោយបុណ្យគ្រិស្តម៉ាស នៅជាប់នឹងរដូវរងាដែលជាឱកាសសប្បាយរីករាយរបស់ជនជាតិជាច្រើន ក្នុងតំបន់ត្រជាក់ចំហៀងខាងជើងនៃពិភពលោក បុណ្យនេះក៏ចេះតែកើនប្រជាប្រិយភាព ខ្លាំងឡើងចាប់ពីសតវត្សរ៍ ទី៤ រៀងរហូតមកក្នុងអាណាចក្ររ៉ូម៉ាំង ។
យោងតាមឯកសារដទៃទៀត បុណ្យគ្រិស្តម៉ាស បានត្រូវរៀបចំឲ្យមានបែបបទត្រឹមត្រូវតាមពិធីសាសនា កាលពីយុគកណ្តាល ហើយទម្លាប់ចែកចាយអំណោយ ឬកាដូនោះ ក៏កើតមានចាប់ពីសតវត្សទី១៥មក ។ នៅប្រទេសអង់គេ្លស ក្រោយមានការប្តូរទៅកាន់និកាយប្រូតិស្តង់ ក៏មានការហាមមិនឲ្យធ្វើបុណ្យគ្រិស្តម៉ាសនៅអង់គេ្លស រួមទាំងស្កត់ឡែនដ៍ និងក្នុងចំណោមនិគមជនអង់គេ្លស នៅទ្វីបអាមេរិកផងដែរ កាលពីឆ្នាំ ១៦៤៧ ។ ទាល់តែចូលដល់ពាក់កណ្តាលសតវត្សរ៍ទី១៩ ហើយទើបបុណ្យគ្រិស្តម៉ាស បានទទួលប្រជាប្រិយភាពឡើងវិញ ដោយបានក្លាយជាបុណ្យ ដែលមិនសូវទាក់ទងនឹងខាងសាសនា ដូចមុនទៀត តែជាបុណ្យរីករាយប្តូរអំណោយគ្នាទៅវិញទៅមក ហើយស៊ីផឹកសប្បាយជួបជុំញាតិមិត្ត ។
ក្នុងឱកាសបុណ្យគ្រិស្តម៉ាស និងចូលឆ្នាំថ្មីដំបូងបង្អស់បានកើតមានប្រមាណ១៦០ឆ្នាំមុននេះ ហើយគំនិតស្តីពីសាន្តាខ្លូស ( Santa Claus ឬ Pere Noe) ដែលសើចហ៊ោជិះគាវលើទឹកកកអូសដោយសត្វរមាំង នាំកាដូ ចុះតាមបំពង់ផែ្សងទៅចែកឲ្យកេ្មងៗ ដែលជាការប្រព្រឹត្តល្អនោះ ក៏ចាប់ផ្តើមទទួលប្រជាប្រិយភាពពីសតវត្សរ៍ទី១៩ នៅក្រុងញូវយ៉ក ។ បុណ្យគ្រិស្តម៉ាសនៅសហរដ្ឋអាមេរិក បានត្រូវប្រកាសជាបុណ្យជាតិ នៅឆ្នាំ១៨៧០ គឺ៥ឆ្នាំ ក្រោយសង្រ្គាមស៊ីវិលរវាងរដ្ឋខាងជើង និងខាងត្បូង ។
បុណ្យគ្រិស្តម៉ាសចាំបាច់ត្រូវស្គាល់ Santa Claus ឬ Pere Noel ដែលគេតែង ពណ៌នាថា ជាបុរសចាស់ ពុកមាត់ពុកចង្កា.ស ស្រមូម ដុះពោះស្ពីង ស្លៀកពាក់ខោអាវពណ៌ក្រហម ថែប.ស ជាមនុស្សចិត្តល្អដែលមានផ្ទះនៅឯប៉ូលខាងជើង ដែលគ្របដណ្តប់ទៅដោយទឹកកក។ ជនជាតិហុល្លង់មានទំនៀមស្គាល់សន្តបុគ្គលឈ្មោះ Saint Nicolas ដែលតែងតែចែកស្ករគ្រាប់ និងអំណោយផេ្សងៗ ឲ្យកូនកេ្មងនៅថៃ្ងបុណ្យណូអែល ។ លុះពួកហុល្លងដ៍អន្តោប្រវេសន៍ ទៅនៅអាមេរិក គេក៏បាននាំយកជំនឿនោះទៅជាមួយ ហើយនៅសតវត្សទី១៩ អាមេរិក ក៏បានប្តូរឈ្មោះ គាត់ជា santa claus ឬ Saint Nicolas ។
នៅរៀងរាល់យប់ទី២៤រំលងអធ្រាត្រចូល២៥សាន្តាខ្លូសនឹងជិះគាវទឹកកក ដឹកកាដូ យកទៅចែកឲ្យកូនកេ្មង ដែលប្រព្រឹត្តល្អមិនខ្ជិលច្រអូស ហើយដែលបានសរសេរសំបុត្រ សូមអំណោយពីគាត់ ។ គេនិយាយប្រាប់កូនកេ្មងតូចៗថា សាន្តាខ្លូស ចុះតាមបំពង់ផែ្សងយកកាដូទៅដាក់នៅក្រោមដើមស្រល់ដែលគ្រួសារនីមួយៗតុបតែងដោយអំពូលភ្លើង ខែ្សបូ ផ្កាក្រដាស និងផ្កាយពណ៌.សរួចហើយសាន្តាខ្លូស ក៏នឹងទទួលទាននំ និងទឹកដោះ ដែលគេតែងដាក់ថ្វាយគាត់នៅលើតុ ។
ក្រៅពីថៃ្ងបុណ្យនេះ សាន្តាខ្លូសនឹងនៅផ្ទះជាមួយភរិយា ហើយផលិតគ្រឿងលេងផេ្សងៗ ដោយមានពួកទេវតាតូចៗ ជួយគាត់ ដើម្បីទុកសម្រាប់ចែកឲ្យកូនកេ្មងនៅឆ្នាំក្រោយទៀត ។ មានរឿងនិទានសៀវភៅកំណាព្យល្ខោន និងភាពយន្តជាច្រើនរៀបរាប់ពីបុណ្យគ្រិស្តម៉ាស ដែលថ្វីបើជាបុណ្យខាងសាសនាគ្រិស្ត ព្រោះជាទិវាប្រសូតរបស់ព្រះយេស៊ូ តែក៏បានក្លាយទៅជាបុណ្យ នៃទឹកចិត្តសប្បុរស បុណ្យនៃការចែកចាយអំណោយ។
នៅថ្ងៃបុណ្យណូអែល អ្នកណាដែលមិនទិញអ្វីចែកគ្នា គេតែងប្រដូចទៅនឹងសេដ្ឋីកំណាញ់ស្វិតឈ្មោះស្រ្គូច ក្នុងរឿងនិទានរបស់ឆាល្ស៍ ឌិកខឹនស៍ ដែលកំណាញ់ មហាកំណាញ់ ទាល់តែត្រូវខ្មោចលង ស្ទើរស្លាប់ស្ទើររស់ ទើបប្រែក្លាយមកជាចិត្តល្អវិញ ។ សម័យមុនអំណោយបុណ្យគ្រិស្តម៉ាស ច្រើនជាប្រដាប់កេ្មងលេង គ្រឿងឧបករណ៍អគ្គិសនី វិទ្យុ ទូរទស្សន៍ សម្លៀកបំពាក់ គ្រឿងឧបករណ៍តន្រ្តី និងកីឡា ជាដើម៕ដោយ៖សេរី
