ខេត្តរតនគិរី៖ ករណីគ្រោះថ្នាក់ចរាចរណ៍រវាងម៉ូតូបុកនិងរថយន្តបណ្តាលឲ្យយុវជន២នាក់ស្លាប់ភ្លាមៗនៅនិងកន្លែងកើតហេតុ។ហេតុការណ៍នេះបានកើតឡើង នៅវេលាម៉ោង១ និង១០នាទីរសៀល ថ្ងៃទី១២ ខែសីហា ឆ្នាំ២០២៣ ក្នុងទិសដៅបញ្ច្រាសទិសគ្នាពីលិចទៅកើត ត្រង់ចំណុចលើផ្លូវជាតិលេខ៧៨ ស្ថិតក្នុងភូមិប៉ាណល ឃុំទីងចាក់ ស្រុកបរកែវ។
លោក ជួប វណ្ណរក្ស អធិការនគរបាលស្រុកបរកែវ បានឲ្យដឹងថា រថយន្តម៉ាកសាំយ៉ុង ពណ៌សរ ពាក់ស្លាកលេខភ្នំពេញ 1J-5466 អ្នកបើកបររថយន្ដក្រោយពីបានប៉ះជាមួយនិងម៉ូតូក៏បានចុះរត់គេចខ្លួនបាត់ស្រមោល បន្សល់ទុករថយន្ដនៅនិងកន្លែងកើតហេតុ។រីឯម៉ូតូម៉ាកអុិចសុិនធឺ គ្មានស្លាកលេខ បើកបរដោយឈ្មោះ រម៉ាម គីន ភេទប្រុស អាយុ១៩ឆ្នាំ ជនជាតិទំពួន រស់នៅភូមិលុងឃុង ឃុំលុងឃុង ស្រុបរកែវ ខេត្តរតនគិរី(ស្លាប់នៅនិងកន្លែងកើតហេតុ)។អ្នករួមដំណើរឈ្មោះ ភូន ផ្សាំ ភេទប្រុស អាយុ១៩ឆ្នាំ រស់នៅភូមិលុងឃុង ឃុំលុងឃុង ស្រុកបរកែវ ខេត្តរតនគិរី(ស្លាប់នៅនិងកន្លែងកើតហេតុ)។
លោកថា ក្រោយពីកើតហេតុរួចកម្លាំងប៉ុស្តិ៍និងកម្លាំងជំនាញនៃអធិការនគរបាលស្រុកបរកែវ ចុះមកធ្វើការអន្តរាគមន៍វាស់វែងរឹបអូសយកម៉ូតូមករក្សាទុកបណ្តោះសន្ន នៅប៉ុស្តិ៍រដ្ឋបាលឃុំទីចាក់ និងរថយន្តបានយកមករក្សាទុកនៅអធិការដ្ឋាននគរបាលស្រុកបរកែវ ដើម្បីរង់ចាំធ្វើការដោះស្រាយនៅពេលក្រោយ។ ចំណែកសាកសពត្រូវបានសមត្ថកិច្ចជំនាញធ្វើកំណត់ហេតុប្រគល់ទៅឲ្យក្រុមគ្រួសារសពយកទៅធ្វើបុណ្យទៅតាមប្រពៃណី៕ដោយ÷ សាវ័ន្ត
