ខេត្តរតនគិរី៖ សេចក្តីរាយការណ៍បានឲ្យដឹងថា ជនដៃដល់ម្នាក់ត្រូវបានកម្លាំងអធិការដ្ឋាននគរបាលស្រុកកូនមុំធ្វើការចាប់ខ្លួន បន្ទាប់ពីជនដៃដល់បានកាប់និងកាំបិតផ្គាក់បណ្តាលឲ្យជនរងគ្រោះស្លាប់នៅកន្លែងកើតហេតុ រីឯកូនប្រុសរបួសធ្ងន់ ខណៈមានបញ្ហាទំនាស់រឿងដីធ្លី។
ហេតុការណ៍នេះកើតឡើងនៅវេលាម៉ោង៩និង០៥នាទី ថ្ងៃទី២៧ ខែសីហា ឆ្នាំ២០២៣ នៅចំណុចភ្នំទឹកចេញ ស្ថិតក្នុងភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី។
សមត្ថកិច្ចបានឲ្យដឹងថា ករណីឃាតកម្មមួយបានកើតឡើងជនសង្ស័យបានយកកាំបិតផ្គាក់កាប់ទៅលើកូនជនរងគ្រោះចំនួន២កាំបិតចំដៃឆ្វេង រួចហើយស្ទុះទៅកាប់ឪពុកក្មេងរងគ្រោះជាច្រើនកាំបិតត្រូវកញ្ចឹង.កខាងក្រោយ១កាំបិតទៀត បណ្តាលឲ្យស្លាប់នៅនិងកន្លែងកើតហេតុ។
ជនសង្ស័យឈ្មោះ ញឹម សាវឿន ភេទប្រុស អាយុ៤១ឆ្នាំ ជនជាតិខ្មែរ មុខរបរកសិករ មានស្រុកកំណើតនៅភូមិ១ ឃុំត្រពាំងច្រេសស្រុកកូនមុំ ខេត្តរតនគិរី។ជនរងគ្រោះ១-ឈ្មោះ ពេជ្រ ម៉ូលី ភេទប្រុសអាយុ៥៦ឆ្នាំ ជនជាតិខ្មែរ មុខរបរកសិករ មានទីលំនៅបច្ចុប្បន្នភូមិ១ ឃុំត្រពាំងច្រេស ស្រុកកូនមុំ ខេត្តរតនគិរី ស្លាប់នៅកន្លែងកើតហេតុ។២-ឈ្មោះ សាន់ ប៊ីស៊ី ភេទប្រុស អាយុប្រហែលជាង១០ឆ្នាំ ជនជាតិខ្មែរ មុខរបរកសិករ ត្រូវជាកូនប្រុសរបស់ជនរងគ្រោះរបួសចំដៃខាងឆ្វេង។
សមត្ថកិច្ចបានបញ្ជាក់ថា មូលហេតុទំនាស់ដីធ្លីដណ្តើមគ្នាគ្រប់គ្រងដីដែលបានដាំដំណាំហើយ ត្រូវជនរងគ្រោះយកថ្នាំបាញ់ស្មៅមកបាញ់លើដំណាំដែលដាំដុះហើយ បង្កកើតទៅជារឿងកាប់សម្លាប់គ្នាយ៉ាងសាហាវព្រៃផ្សៃ។
ក្រោយឃាត់ខ្លួនសមត្ថកិច្ចបានដកហូតវត្ថុតាង កាំបិតផ្គាក់ចំនួន១ ប្រវែង៦០សង់ទីម៉ែត្រ។
បច្ចុប្បន្នជនសង្ស័យខាងលើនេះ ត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលស្រុកកូនមុំ ដើម្បីកសាងសំណុំរឿងចាត់ការបន្តទៅតាមនីតិវិធីច្បាប់៕ ដោយ៖សាវ័ន្ត
