ខេត្តឧត្តរមានជ័យ៖ សេចក្តីរាយការណ៍បានឲ្យដឹងថា មុខសញ្ញាចោរកម្មលួចម៉ូតូក្នុងខេត្តឧត្ដរមានជ័យ ជាច្រើនករណី ក្រោយទទួលដំណឹងពីនគរបាលខេត្តកំពង់ធំ កាលពីថ្ងៃទី១៨ ខែសីហា ឆ្នាំ២០២៣ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្ដរមានជ័យ បានចាត់ផែនជំនាញនគរបាលព្រហ្មទណ្ឌ សហការជាមួយកម្លាំងនគរខេត្តកំពង់ធំ ចុះធ្វើការឃាត់ខ្លួនជនសង្ស័យម្នាក់ ឈ្មោះ ឈឿន ឈុត ភេទប្រុសអាយុ ៤៦ ឆ្នាំ ភូមិដងផ្ដៀក ឃុំដូង ស្រុកប្រាសាទបល្ល័ង្គ ខេត្តកំពង់ធំ រួមនឹងម៉ូតូ ០១គ្រឿង ក្រោយជំនាញសួរនាំ ជនសង្ស័យបានសារភាពថាធ្លាប់បានទិញម៉ូតូចំនួន ៥គ្រឿង ក្នុងមួយគ្រឿងតម្លៃ ៥០០ដុល្លារ ម៉ូតូដែលបានលួចមកពីខេត្តឧត្តរមានជ័យ ។
បន្ទាប់ពីទទួលព័ត៌មានភ្លាម ដោយមានការសម្របសម្រួលពី ឯកឧត្តម ព្រះរាជ្ញាអមសាលាដំបូងខេត្តឧត្តរមានជ័យ លោក ឧត្តមសេនីយ៍ទោ ហួត សុធី ស្នងការស្នងការនគរបាលខេត្ដ បានបន្តចាត់កម្លាំងជំនាញចុះសហការជាមួយកម្លាំងនគរបាលខេត្តកំពង់ធំ និងខេត្តសៀមរាប ឈានដល់ឃាត់ខ្លួនឈ្មោះ គង់ លក្ខ ភេទ ប្រុស អាយុ ៤៩ឆ្នាំ និងដកហូតរថយន្ត ០១ គ្រឿង, ម៉ូតូ ០១ គ្រឿង និងឧបករណ៍ប្រព្រឹត្តបទល្មើសមួយចំនួន ក្រោយសួរនាំ ជនសង្ស័យបានសារភាពថា ខ្លួននិងបក្សពួក ០៦នាក់ បានប្រព្រឹត្តបទល្មើសជាមួយគ្នា ។
ការធ្វើសកម្មភាពលួចម៉ូតូ មានចំនួន ០៨ លើក លើកទី១៖ នៅឆ្នាំ២០២១ នៅចំណុចមុខសាលាវិទ្យាល័យពងទឹក ស្រុកបន្ទាយអំពិល មានគ្នា ០៣ នាក់ ។ លើកទី២ ឆ្នាំ ២០២១ នៅចំណុចភូមិមនោរម្យ២ ឃុំគោកខ្ពស់ ស្រុកបន្ទាយអំពិល មានគ្នា ០៣ នាក់ ។ – លើកទី៣ នៅចំណុចផ្ទះការ ស្ថិតក្នុងភូមិតាម៉ាន ឃុំបេង ស្រុកបន្ទាយអំពិល មានគ្នា ០២ នាក់ – លើកទី៤ មានគ្នា ០៣ នាក់។ – លើកទី៥ ឆ្នាំ២០២២ នៅចំណុចរង្វង់មូលផ្អុង សង្កាត់កូនគ្រៀល ក្រុងសំរោង មានគ្នា ០៣ នាក់ ។ – លើកទី៦ ថ្ងៃទី២៦ ខែវិច្ឆិកា ឆ្នាំ២០២២ នៅចំណុចក្រោយផ្សារសំរោង ភូមិសំរោង ក្រុងសំរោង មានគ្នា ០២ នាក់ ។ – លើកទី៧ ថ្ងៃទី០៧ ខែកក្កដា ឆ្នាំ២០២២ ធ្វើសកម្មភាពកំហែងយក តាមដងផ្លូវលំ ស្ថិតក្នុងភូមិវល្លិ៍យាវ ឃុំបេង ស្រុកបន្ទាវអំពិល មានគ្នា ០២ នាក់។ – លើកទី៨ នៅចំណុចផ្សារសំរោង សង្កាត់-ក្រុងសំរោងមានគ្នា ០៣ នាក់ ។ ក្រោយសួរនាំរួច ជំនាញបានចេញប្រតិបត្តិការ រហូតឈានដល់ឃាត់ខ្លួនជនសង្ស័យបានជាបន្តបន្ទាប់ ចំនួន ០៤នាក់ ១- ឈ្មោះ ថ្លាន់ ថ្លៃ អាយុ ៤៩ឆ្នាំ រស់នៅភូមិក្រូចសាខន សង្កាត់កូនគ្រៀល ក្រុងសំរោង ខេត្តឧត្តរមានជ័យ ២- ឈ្មោះ គង់ រិទ្ធ អាយុ ៤៩ឆ្នាំ រស់នៅភូមិកំពង់ក្ដី ឃុំកំពង់ចិនត្បូង ស្រុកស្ទោង ខេត្តកំពង់ធំ ៣- ឈ្មោះ ឆាតជី អាយុ ៤៤ឆ្នាំ រស់នៅភូមិបេង ស្រុកស្រីស្នំ ខេត្តសៀមរាប ៤- ឈ្មោះ ហាត់ ហ៊ាង អាយុ ១៦ឆ្នាំ រស់នៅភូមិកំប្រាក់ ឃុំយាង ស្រុកជាំក្សាន្ត ខេត្តព្រះវិហារ និងឃាត់បានរថយន្ត highlander ០១ គ្រឿង ធ្វើសកម្មភាពលួចម៉ូតូ នៅស្រុកត្រពាំងសាទ ។
បច្ចុប្បន្នជនសង្ស័យទាំងអស់ខាងលើនេះ កម្លាំងជំនាញកំពុងកសាងសំណុំរឿងបញ្ជូនទៅតុលាការ រីឯបក្សពួកដែលនៅសេសសល់ សមត្ថកិច្ចកំពុងបន្តស្រាវជ្រាវ៕ឧត្តរ
