ខេត្តសៀមរាប៖អាជ្ញាធរសង្កាត់ជ្រាវ បានប្រាប់អ្នកសារព័ត៌មាននៅរសៀលថ្ងៃទី១៩ខែមីនាឆ្នាំ២០២៥នេះថា ការបង្ហោះព័ត៌មានលើបណ្តាញហ្វេសប៊ុករបស់បុគ្គលឈ្មោះ(Samnang Norn) ដែលសរសេរថា មិននឹក ស្មានថា អ្នកជំនាន់ក្រោយឈូសប្រាសាទធ្វើជាផ្លូវសោះ#បណ្តាសារដូនតា(សូមកុំមើលងាយកេរបុព្វ បុរសរបស់ខ្លួន! )នៅសង្កាត់ជ្រាវ ក្រុងសៀមរាប ខេត្តសៀមរាប។
ជាមួយនឹងខ្លឹមសារដែលភ្ជាប់ដោយរូបភាពផង លោក ក្អោប រ៉ន ចៅសង្កាត់ជ្រាវ បានអះអាងថា ការបង្ហោះដែលគ្មានមូលដ្ឋានរបស់បុគ្គលខាងលើ ត្រឹមតែចង់ បានLike. Share តែប៉ុណ្ណោះ ប៉ុន្តែវាធ្វើអោយប៉ះពាល់យ៉ាងធ្ងន់ធ្ងរដល់អាជ្ញាធរពាក់ពន្ធ័។
ជាមួយគ្នានោះលោកក៏បានច្រានចោលទាំងស្រុងនូវព័ត៌មានមិនពិតខាងលើ ព្រមទាំងចេញលិខិតបំភ្លឺជូនថ្នាក់លើ រួមទាំងសាធារណ:ជនបានជ្រាបទៀតផង។
យោងលិខិតស្រាយបំភ្លឺលេខ០៥/២៥ សជណ ចុះថ្ងៃ១៨ ខែមីនាឆ្នាំ២០២៥ ដែលចុះហត្ថលេខាដោយលោកក្អោប រ៉ន បានបញ្ជាក់ថាកាលពីថ្ងៃទី១៧ខែមីនារដ្ឋបាលសង្កាត់ជ្រាវកត់សម្គាល់ឃើញថា មានការចុះផ្សាយលើ Facebook របស់ឈ្មោះSamnangNornថា៖មិននឹកស្មានថា អ្នកជំនាន់ក្រោយឈូសប្រាសាទធ្វើជាផ្លូវសោះ#បណ្តាសារដូនតា(សូមកុំមើលងាយកេរបុព្វ បុរសរបស់ខ្លួន! )នៅសង្កាត់ជ្រាវ ក្រុងសៀមរាប ខេត្តសៀមរាប ដោយភ្ជាប់រូបភាពមួយចំនួនផងដែរ។
លិខិតបញ្ជាក់ទៀតថា ពាក់ព័ន្ធការចុះផ្សាយខាងលើរដ្ឋបាលសង្កាត់ជ្រាវ មានកិត្តិយសជម្រាបជូនអាជ្ញាធរពាក់ពន្ធ័និងសាធារណ:ជនអោយបានជ្រាបថាការចុះ ផ្សាយរបស់Facebookឈ្មោះSamnang Nornគឺពុំមានមូលដ្ឋានទិន្ន័យច្បាស់លាស់ទេ ដោយយករូបភាពចាស់មកបង្ហោះ។ ចំពោះផ្លូវនៅក្នុងរូបភាពដែលបង្ហោះនោះគឺមានតាំងពីសម័យអាណានិគមបារាំងមកម្លេះ។
ក្រោយមកក្នុងឆ្នាំ២០១៣រាជរដ្ឋាភិបាលមានគម្រោងសាងសង់ផ្លូវក្រវ៉ាត់ក្រុងទី២ និងកំឡុងពេលកំពុងសាងសង់ផ្លូវនេះក៍ជួបប្រទះទួលប្រាសាទបុរាណ(គោកប្រាសាទបឹង)ហើយអាជ្ញាធរជាតិអប្សរាមិនអនុញ្ញាតអោយសាងសង់ផ្លូវចាក់កៅស៊ូឆ្លងកាត់ចំណុចប្រាសាទនោះឡើយ ដោយតម្រូវអោយធ្វើផ្លូវវាងទៅខាងត្បូងប្រសាទវិញ។
ប៉ុន្តែបន្ទាប់ពីបានសិក្សាផលប៉ះពាល់ជាច្រើនលើកច្រើនសារមិនអាចដោះស្រាយបាននិងតម្រូវអោយទុកចន្លោះប្រវែង៣០០ម៉ែត្រត្រង់ចំណុចប្រាសាទដោយរក្សាទុកផ្លូវនៅជាទ្រង់ទ្រាយដើមតាមលំនាំផ្លូវតាំងពីសម័យអាណានិគមបារាំង ដោយពុំមានការឈូសឆាយជួសជុលផ្លូវត្រង់ចំណុចប្រាសាទនេះឡើយរហូតមកទល់បច្ចុប្បន្នបន្ទាប់ពីអាជ្ញាធរជាតិអប្សរារកឃើញថាជាទួលប្រាសាទ។ ចំពោះរូបចម្លាក់ដែលបានបង្ហោះនោះត្រូវអាជ្ញាធរជាតិអប្សរាស្រាវជ្រាបប្រមូលយកទៅរក្សាទុកអស់ហើយតាំងពីឆ្នាំ២០១៣មកម្លេះ ហើយថ្មដែលនៅសល់ជាថ្មខឿនប្រាសាទប៉ុណ្ណោះ។
ក្រៅពីខ្លឹមសារក្នុងលិខិត លោកចៅសង្កាត់ជ្រាវក៍បានបញ្ជាក់បន្ថែមថា ប្រសិនបើជាអ្នកសារព័ត៍មានមុនចុះផ្សាយនៅរឿងអ្វីមួយដែលមានបទល្មើសសូមមេត្តាប្រមូលប្រភពអោយច្បាស់លាល់ជៀសវាងប៉ះពាល់កិត្តយសដល់អ្នកដទៃឬមន្ត្រីរាជការ។ តែបើជាអ្នកហ្វេសប៊ុក កុំព្រោះតែចង់បាន Like. Share ធ្វើអោយប៉ះពាល់ដល់ថ្នាក់ដឹកនាំ និងបំពុលសង្គម៕ដោយ៖AFN
