អន្តរជាតិ៖លោក Ferdinand Marcos Jr ប្រធានាធិបតីហ្វីលីពីន បាននិយាយថា ភាពតានតឹងជាមួយចិននៅសមុទ្រចិនខាងត្បូងបានកើនឡើងក្នុងប៉ុន្មានខែថ្មីៗនេះ។ ស្របពេលដែលលោកស្នើឲ្យជប៉ុន និងអាស៊ានគួរបង្កើនកិច្ចសហប្រតិបត្តិការក្នុងវិស័យសន្តិសុខ ខណៈដែលពួកគេបាននិងកំពុងធ្វើលើបញ្ហាសេដ្ឋកិច្ច។
លោកបានផ្ដល់បទសម្ភាសន៍ផ្តាច់មុខជាមួយសារព័ត៌មាន NHK កាលពីថ្ងៃសៅរ៍នៅទីក្រុងតូក្យូ ក្នុងពេលដែលលោកកំពុងស្ថិតក្នុងរដ្ឋធានីរបស់ប្រទេសជប៉ុន ដើម្បីចូលរួមក្នុងកិច្ចប្រជុំកំពូលពិសេសមួយដែលប្រារព្ធខួប៥០ឆ្នាំនៃមិត្តភាពរវាងជប៉ុននិងអាស៊ាន។
លោកបញ្ជាក់ថា ភាពតានតឹងជាមួយចិននៅក្នុងតំបន់បានកើនឡើងក្នុងប៉ុន្មានខែថ្មីៗនេះ ហើយស្ថានភាពកាន់តែស្មុគស្មាញ។ ដូច្នេះ អ្នកចូលរួមក្នុងកិច្ចប្រជុំកំពូលជប៉ុន-អាស៊ាន ត្រូវតែស្វែងរកមធ្យោបាយដើម្បីរក្សាសន្តិភាព។
លោកបន្ថែមថា ហ្វីលីពីនក៏នឹងធ្វើឲ្យស៊ីជម្រៅផងដែរនូវកិច្ចសហប្រតិបត្តិការត្រីភាគីជាមួយជប៉ុន និងសហរដ្ឋអាមេរិក ហើយស្វែងរកកិច្ចសហប្រតិបត្តិការជាមួយប្រទេសជាច្រើនទៀតដោយធ្វើសមយុទ្ធរួម។
នាពេលថ្មីៗនេះ កប៉ាល់របស់រដ្ឋាភិបាលចិនបាននឹងកំពុងប្រើប្រាស់កាណុងបាញ់ទឹកលើនាវាហ្វីលីពីន និងរារាំងការធ្វើនាវាចរណ៍របស់ពួកគេនៅក្នុងសមុទ្រចិនខាងត្បូង ដែលនេះបានធ្វើឲ្យមានភាពតានតឹងកានតែខ្លាំងរវាងប្រទេសទាំង២ផងដែរ៕
(ប្រភពពី៖NHK)
